Read Paite Chin JEREMIAH 7 Bible Online

JEREMIAH 7 - Paite Chin bible

JEREMIAH 7

¹TOUPA apan a Jeremiah kiang a thu hongtung:

²TOUPA inn kongpi ah ding inla, huai ah hiai thu phuang inla, huchi in chi in: Nou Judah mi tengteng, TOUPA be ding a hiai kongpi a lutte’n TOUPA thu ngaikhia un.

³Sepaihte TOUPA’N hichi in a chi: Na omdan uleh na thilhihte uh bawlhoih unla, hiai mun ah k’on tengsak ding hi.

⁴Hiai “TOUPA inn, TOUPA inn, TOUPA inn ahi” chih zuauthute um kei un:

⁵Na omdan uleh na thilhihte uh na bawlhoih petmah ua, mi leh invengte kikal a thu diktak a na vaihawm sak ua,

⁶Namdang mite, pa neiloute, meithaite na nuaisiah louh ua, hiai mun a midiktat sisan na suahlouh ua, na hoihlouhna ding ua pathian dangte na delh sam kei ua leh,

⁷Hiai gam, tuma siah a na pipute uh kiang a ka piak ah tangtawn in k’on tengsak ding hi.

⁸Ngai un, zuauthu, phattuamna om hetlou na um zaw ua.

⁹Gukgu in, tualthat in, angkawm in, zuau a kichiam in Baal kiang a gimlim hal in, pathian dang, na theih ngeilouhte uh na delh uhi.

¹⁰Hiai inn, ka min mahmah a loh ah ka ma ah hong ding in, hiai thil kihhuai tengtengte hih zel kawm in, hotkhiak ka hita, na chi ding ua hia?

¹¹Hiai inn ka min mahmah a loh, na mitmuh un suamhatte kawkhuk banglel ahi hia? Ngai un, kei, kei mahmah in ka mu hi, chih TOUPA thupawt ahi.

¹²A tung a ka min ka tensakna, ka mun Shiloh ah hoh dih ua, ka mi Israel gitlouhna ziak a ka thilhih va en un.

¹³Tuin hiai thil tengteng na hih ua, phalvak a thou a na kiang ua thu ka gengente na ngaihkhiak louh ua, nou k’on sap a, na dawn louh ziak un:

¹⁴Shiloh tung a ka hih bang in hiai ka min lohna inn, noumau leh na pipute uh kiang a ka mun piak, na muan uh tung ah ka hih dek ahi.

¹⁵Na unau tengteng uh, Ephraim nam pumpi nangawn ka paihkhiak bang in ka mitmuh a kipan nou k’on paikhe ding, chih TOUPA thupawt ahi.

¹⁶Huaiziak in, hiai mite ading in thum kenla, kikou khia in thum kenla, ka kiang ah leng ngetsak sam ken; k’on ngaikhe kei ding hi.

¹⁷Judah khopite a leh Jerusalem kholakte a a thilhih uh na mu ka hia?

¹⁸Naupangte’n sing a tom ua, a pate un mei a toh ua, numeite’n van kumpinu kiang a lat ding tanghou a mek ua, pathian dangte ding in dawn ding thillat a tungkhia ua, a hon hehsakna lel ding un.

¹⁹Kei ahi maw hon hehsak uh? chih TOUPA thupawt ahi: amau zumna ding in amau ahizaw kei uh maw?

²⁰Huaiziak in TOUPA Pathian in hichi in a chi: Ngai dih uh, hiai mun tung ah ka hehna leh thangpaihna ka sungkhe ding a; a kang dia, a mit kei ding.

²¹Sepaihte TOUPA, Israel Pathian in hichi in a chi: Na kithoihnate uah haltum kithoihnate behlap unla, sa ne un.

²²Halmang thillat hiam, kithoihnate hiam tungthu ah zaw na pipute uh kiang ah thu ka gen kei a, Aigupta gam a kipan ka pikhiak lai in leng thu ka pe sam kei:

²³Ka aw ngaikhia unla, na Pathian uh ka hi ding a, nou leng ka mite na hi ding uh; na hoih theihna ding un na omdan ding uh k’on hilh tengteng zui un, chi in thu ka pe zaw hi.

²⁴Himahleh a ngaikhe kei ua, bil a doh sam kei uh: a lungtang gilou uh hihnang in amau thuthu in a omzaw uh, malam zawt sang in a nungtawn zawta uhi.

²⁵Na pipute uh Aigupta gam a kipan a pawt ni ua kipan a tunitan in ka nasemmi, zawlnei tengtengte phalvak a thou in na kiang uah niteng in ka sawl zel a,

²⁶Himahleh a hon ngaikhe tuankei ua, bil a doh sam kei uh: a lungsim uh a khauhsak ua, a pipute uh sang in a gilou zawta uhi.

²⁷Hiai thu tengteng a kiang ua na gen ding ahi: himahleh a hon ngaikhe kei ding ua; amau na sam ding a, a hon dawng kei ding uh.

²⁸A kiang uah, Hiai nam TOUPA a Pathian uh aw ngaikhe lou a, thununna tanglou nam eive ua, na chi ding a: thudik a mangthangta, a kam ua kipan paihmang ahita.

²⁹Na sam tan inla, pai mang inla, mun sang giaute ah kapkhia in; TOUPA’N a hehna tangmi suante paikhia in a ngeingaih kei hi.

³⁰Judah tate’n lah ka mitmuh in thil gilou a hih ngal uh chih TOUPA thupawt ahi: ka minlohna inn ninsak ding in a thil kihhuaite uh a koih khin uhi.

³¹A tanute uh, a tapate uh hal ding in Ben Hinnom guam ah Taphet mun sangte a bawl ua; huaite ka thupiak ahi kei a, ka lungsim ah leng a lut ngei sam kei.

³²Huaiziak in, ngai dih uh, nite a hongtung dek, chih TOUPA thupawt ahi: huai guam pen, Tophet, chih ahi nawn kei ding a, Ben Hinnom guam, chih leng ahi sam kei ding; Kithahna guam, chih ahita ding: Tophet ah a vui ding ua, vuina ding mun a omta kei ding.

³³Mite luang tung a leng vasate leh gamsate an ahi ding; kuamah in a delhmang kei ding uh.

³⁴Judah khopite ah leh Jerusalem kholakte ah nuamsa husate leh kipahna gingte, mouneipa awte, mou awte leng ka daisak ding: a gam segawp ding ahi ngal a.