Read Paite Chin JEREMIAH 8 Bible Online

JEREMIAH 8 - Paite Chin bible

JEREMIAH 8

¹Huai hun chiang in, chih TOUPA thupawt ahi: Judah kumpipate guhte, a heutute guhte, siampute guhte, zawlneite guhte, Jerusalem a tengte guhte a han ua kipan a lakhe ding ua;

²Nite, khate, van a om tengteng, a it ua, na a sep ua, a delh ua, a zon ua, chibai a bukte uh ma ah a phoukhe ding uh: lakkhawm ahi nawnta kei ding ua, vui ahi sam kei ding uh; leitung a ekvut lel ding ahi ding.

³Hiai inkuan gilou mahmah omlai sung tengteng, ka hawlzakna mun a omlaite’n hin sang in sih a telzaw ding uh, chih sepaihte TOUPA thupawt ahi.

⁴Huai lou leng a kiang uah huchi in na gen ding hi: TOUPA’N hichi in a chi: Mi a puk un a thou nawn kei ding ua hia? Mi a vakmang in a hongkik nawn kei dia hia?

⁵Bang achia hiai Jerusalem mite, tangtawn a nungtawn ding a a tolhpuk uh? Khemna a len kip ua, kiknawn a ut kei uh.

⁶Ka bildoh in ka ngaikhia a, kuamah in thudik a gen kei uh, kuamah in, Bang ahia ka hih? chi in a thulimlouhna uh a kisik sam kei uh; michih amau lampi a nga chiat ua, kidouna mun a sakol dianglut bang mai in.

⁷Ahi, van a tuivapi in a hunbite a thei a, vakhute, lensiamte, tuivanelkaite, a hun geihgeih in a hongtung zel uh. Ka mite’n bel TOUPA thuseh a theikei uh.

⁸Bangchi’n ahia, mi pil i hi ua, TOUPA dan i kiang uah a om, na chih uh? Ngai un, Laigelhmi laigelhna zuauthei in, zuau in a suaksak zaw uhi.

⁹Mipilte a zum un a lungdong ding ua, mat in a om ding uh; ngai un, TOUPA thu a paikhia ua, amau ah bang pilna a om a ahia?

¹⁰Huaiziak in a zite uh midangte kiang ah ka pe ding a, a loute uh leng a hon neimi dingte kiang ah; michih, a neupen a kipan a thupipen tan in en hat ahi uhi. Zawlnei a kipan a siampu tan in leng michih khemhat ahi uhi.

¹¹Ka tanu, ka mite liam awlmohlou tak in, A hoih a ka, a hoih a ka, chi in a thoih ua, lah a hoih hetkei hi.

¹²Thil kihhuai a hih uh a zum uhia? Ii, a zum hetkei ua, a mel uh leng a san kei. Huaiziak in pukte lak ah a puk tei ding ua, amaute gawt hun chiang in paikhiak in a om ding uh chih TOUPA thupawt ahi.

¹³Amau ka hihmang vek ding, chih TOUPA thupawt ahi: grepguite a gah kei ding a, theipi kungte a gah sam kei ding; a nah leng a vuai ding a, amaute tummang dingte ka sep khinta hi.

¹⁴Bangdia tu lailai i hi ua? Ki kaikhawm unla, khopi kulhneite ah lut unla, huai ah i mangthang diam ding uh; TOUPA tung a i gitlouh tak ziak in; TOUPA i Pathian un gutui dawn ding honpia in manthatna ah a hon koih hi.

¹⁵Muanna i zong ua, hoihna bangmah a hongtung kei, hihdamna hun ding leng, ngai in, lungdonna lel!

¹⁶A sakol nak ging uh Dan a kipan a zak ahi a, a sakol uh ham ging in gam pumpi a ling a, a hongtung ua, asung a om teng, a gai vek ua, khopi leh asung a tengte toh.

¹⁷Ngai un, na lak uah gulpi ka sawl ding a, gul gu nei, khoizual vuallouhte: huaite’n nou a hontu ding ua, chih TOUPA thupawt ahi.

¹⁸Aw lungkhamna ah ki lungmuan thei leng aw! sunggil ah ka lungtang a bahkhinta hi.

¹⁹Ngai un, gam gamlapi a kipan, ka tanu, ka mite kap husa, Zion ah TOUPA a om ka hia? Asung a a Kumpipa omlou ahi maw? milim bawltawmte leh namdang milimte in bang achia hon hehsak ahi ua?

²⁰Buh lak hun a kikhelta, nipi a beita, hotdam in i omkei lailai.

²¹Ka mite, ka tanu natna ah ka na a, ka sun a, lungdonna in a honlen hi.

²²Gilead a singnai damdawi omlou hia? huai ah hihdammi a om ka hia? bangdia ka mite, ka tanu damtheilou ahia?