Read Paite Chin JEREMIAH 9 Bible Online

JEREMIAH 9 - Paite Chin bible

JEREMIAH 9

¹Ka lu tui hi in, ka mit khitui nak hi le aw, ka mi, ka tanu thahte ading in a sun a zan in ka kap ding,

²Gamdai ah khualbuk nei thei leng aw! ka mite paisan in, om mangsan leng aw; angkawmhat mi ahivek ngal ua, khemhat omkhawm lel ahi uh.

³A lei uh thalpeu bang in zuau in a zang ua, gam ah a khanglian ua, thutak a khang lou in, gilou lam ah a khang ua, kei hon theilou in, chih TOUPA thupawt ahi.

⁴Noumau inveng lak ah pilvang chiat unla, na unaute himhim uh muang kei un; unaute lah khemhat ahi ngal ua; invengte leng gensiat hat ahi uh.

⁵Amau inveng chiat a khem ding ua, thudik a gen kei ding uh; a lei uh zuaugen a kisinsak ua, thulimlouhna sem in a gim uhi.

⁶Khemhat lak ah na teng a, a khemna uh ziak in kei a honthei nuam kei uh, chih TOUPA thupawt ahi.

⁷Huaiziak in sepaihte TOUPA’N hichi in a chi: Ngai un, amau ka tuisuak sak dia, ka ze-et ding: ka mi, ka tanu ziak in bang dang ahia ka hih tak ding aw?

⁸A lei uh sihna thal ahi a, khemna thu a gen zel, mi’n kam in invengte kiang ah kituahna thu gen mahleh, a lungtang ah amah a tang giugiau hi.

⁹Hiai thilhihte ziak in ka gawt kei dia hia? chih TOUPA thupawt ahi: nam hichibang tung ah phu ka lakei dia hia?

¹⁰Tangte ading in ka kap dia, ka mau vungvung ding, gamdai loupa munte ka sun ding a, kuamah pai nawnlouhna ding a a kat khittak ziak in, gan husa mite’n a za nawnta kei ding ua, tung a leng vasate leh gamsate leng a taikek ua, a pai mangta uh.

¹¹Huan Jerusalem bel thilsia omkhawm lel in ka bawl dek a, sehalte tenna mun ahi ding; Judah khopite tengmi omlou in ka hihgawp ding.

¹²Hiai theisiam ding in mi pil kua ahia? Phuang ding a TOUPA thugen na sangmi pen kua ahia? Bangziak in ahia gam a siat khit a, kuamah pai louhna ding a gamdai bang a a kat khit?

¹³Huan, TOUPA’N, Ka dan, a ma ua ka koih a paisan ua, ka pau kamsuak a mang kei ua, a zui kei ua,

¹⁴a lungtang khauh uh zui a, a pipute un a sinsak uh Baalte a delh zawktak ziak un;

¹⁵Sepaihte TOUPA, Israel Pathian in hichi in a chi: Ngai un, amau, hiai mite mahmah gamsai in ka vak ding a, tui kha leng ka dawnsak ding.

¹⁶Nam, amau leh a pipute un leng a theih ngeilouhte lak ah ka dalhsak ding a; ka hih manthat vek mateng namsau ka delhsak ding.

¹⁷Sepaihte TOUPA’N hichi in a chi: Ngaihtuah unla, numei kap mite hongpai ding in sam un, numei khutsiamte hongpai ding in sam lai un.

¹⁸Hongkin uhenla, hong kahkhum peuhmah le uh, ka khitui a luan a, i mitte ua tui a pawt theihna din.

¹⁹Zion a kipan kah husa zak ahi ngal a, i naksiat khittak dan uh: gen ding i thei mahmah kei ua, i gam i paisan ziak uleh, i tennate a paihkhiaktak ziak un.

²⁰Aw nou numeite aw, TOUPA thu ngaikhia unla, a kamsuak thu na bil uah lut henla, na tanute uh kah sinsak unla, michih in a invengnu kiang ah sunna la.

²¹I tawlet uahte sihna kal lut in i kumpipa inn uahte a lutta hi, inn pawlam a kipan a naupang hihmang ding leh, kholak a kipan a tangval hihmang ding.

²²TOUPA thupawt in hichi in a chi: Mi luangte gamlak ah ekvut bang in a puk ding ua, buhlami buhmaih bang in; kuamah in a lakhawm kei ding, chi in.

²³TOUPA’N hichi in a chi: Mi pil in a pilna suang kei henla mihat in a hatna suang sam kei hen, mi hau in a sum leh pai suang kei hen.

²⁴A suang peuhmah in hiai suang hen, Kei TOUPA, chitna, vaihawmdikna, diktatna lei a zangpa ka hi chih a theih a, a theihsiamna tak; hiai thilte ka kipahlam ahi ngal a, chih TOUPA thupawt ahi.

²⁵Ngai un, nite a hongtung hi, chih TOUPA thupawt ahi, zeksum hi ngal, sumlouh bang zaw ka gawt ding;

²⁶Aigupta, Judah, Edom, Ammon leh Moab, gamdai a teng, baksam met giaute; nam tengteng zeksumlouhte ahi ngal ua, Israel inkaw tengteng leng lungtang a zeksumlouh ahi uhi.