Read Paite Chin KAHLATE 1 Bible Online

KAHLATE 1 - Paite Chin bible

KAHLATE 1

¹Khopi mite a dimsek, bangchidan a lungzuang a tu maimah ahia! bangchidan a meithai bang a hongom maimah ahia! namte lak a thupi sek a, bialte lak a lalnu sek, bangchidan a sikha suak ahia!

²Zan in nakpitak in a kap a, a khituite a biang ah a om: a itte tengteng lak ah amah nem ding kuamah a neikei a: a lawmte tengteng a tung ah lepchiahtak in a gamta ua, a melmate a honghi uhi.

³Gimthuakna ziak leh, saltanna thupi ziak in. Judah saltanna ah a paita hi; khovel mite lak ah a teng a, tawldamna a mu kei: mun kawchik ahte amah sawi tengteng in a pha uhi.

⁴Kikhopna thupi a kuamah a hongpai louh ziak un. Zion lampite’n a sun ua; a kongpite tengteng loih in a om a, a siampute a thum huthut uh: a nungak siangthoute gimthuak in a om ua, amah mah haksa thuak in a om hi.

⁵A melmate lupen a honghi a galte a lohching uh; a tatlekna tamluat ziak in TOUPA’N lah amah gim a thuaksak ngal a: gal ma ah a ta tuailaite saltanna ah a pai uh.

⁶Zion tate a pan in kilawmna tengteng a pai mangta; a lalte loupa hing mulou zuktalte bang ahi ua, a delhmi ma ah hatna neilou in a pai uh.

⁷A gimthuak ni leh a haksat ni’n Jerusalem in nidanglai a kipan a om khinsa a thil nuamte tengteng a theigige a: gal khut a mite a puklai un, amah kuamah in a panpih kei, galte’n amah a mu ua, a siatna ah a nuihsan uhi.

⁸Nakpitak in Jerusalem in thil a hihkhial a; huaiziak in thil nin bang in a hongom hi: a vuaktanna a muh ziak un, amah zahte’n a musit ua, ahi, a nak huthut a, nunglam ah a kiheita hi.

⁹A nitna a nik ah a om a; a beina nanung a theigige kei; huaiziak in lamdangtak in a hong kun a; lungmuanmi a neikei hi: ngai in, Aw TOUPA, ka gimthuakna; melmapa a kiliansak hi.

¹⁰Gal in amahnu gou manphate tengteng tung ah a khut a zak a: a munsiangthou sung ah khovelmi a honglut chih a mu ngal a, na kikhopna uah amau a hong lutlouh ding uh ahi chi a thu na piak.

¹¹A mite tengteng a nak huhu ua, tanghou a zong ua; kha hihhalh ding in a thilnuamte uh sa khenna ding in a pia ua: Thei inla, Aw TOUPA, en in ka hong buah ziak in.

¹²Nou ding a bangmahlou ahi maw, nou hon paisuaksante tengteng? Ngai unla, en un, ka tung a hih a om ka lungkhamna bang lungkhamna himhim a om hiam? A heh mahmah lai a TOUPA’N a hon hihgimna bang.

¹³Tung sang a kipan in ka guhte ah mei a honsawl a, amaute a zou a: ka khe a ding in len a zak a, a hon nung heisan; segawp leh nitum a bah in a hon bawlta hi.

¹⁴Ka tatleknate hakkol a khut a khih in a om a; phial khawm in a om ua, ka ngawngzang ah a hongtung ua; ka hatna a vuaksuak sak: amau ka dou zohlouhte, a khut uah TOUPA’N kei a honpia hi.

¹⁵Ka lak a ka mi hatte TOUPA’N bangmahlou in a omsak; ka tangvalte mekgawpna ding in ka siatna ding in aman kikhawmpi poimawh a sam a: uain sukna bang in TOUPA’N Judah tanu siangthou a sikdenta hi.

¹⁶Hiai thilte ziak in ka kap a; ka mit tui in a tuma; lungmuan ding ka kha hihhalh ding kei a pan a gamla ngal a; melma a vualzoh ziak in, ka tate amau kia a nutsiat in a om uhi.

¹⁷Zion in a khutte a zak khia a; amah lungmuan ding kuamah a omkei uh; TOUPA’N Jakob tungthu ah thu a pia a, huchi a a kimvel a omte a galte a hong hihna ding un: Jerusalem a lak uah thilnin bang in a om hi.

¹⁸Toupa a diktat a: a thupiak ka helsan ua; Za un, k’on ngen hi, nou mite tengteng, ka lungkhamna en un: ka nungak siangthoute leh ka tangvalte saltanna ah a pai uhi.

¹⁹Ka itte ka sam a, himahleh a honkhem uh: ka siampute leh ka upate’n amau khate hihhalh ding a an a kizon lai un khopi sung ah a sihloh uhi.

²⁰Aw TOUPA, ngai in; ka dah ua; ka lungsim a mangbang a; ka sung ah ka lungtang a kilumlet a; nakpitak in ka helta ua: pawlam ah namsau thah in inn sung ah sihna a om hi.

²¹Ka thum a za ua: kuamah hon khamuan ding a omkei uh; ka mangbatna ka melmate tengteng in a za ua, na hihziakin a kipak uh: na phuan khiaksa ni na tun ding a, kei bang ahi ding uh.

²²A gitlouhna tengteng uh na ma ah hongtung hen: ka tatlekna tengteng ziak a ka tung a na hih bang in amau tung ah leng hih in: ka thumna lah a tam a, ka lungtang leng a bahta hi.