Read Paite Chin KAHLATE 2 Bible Online

KAHLATE 2 - Paite Chin bible

KAHLATE 2

¹Bangchidan a TOUPA’N a hehna a Zion tanu meipi a tuam ahia! Israel kilawmna van a kipan lei ah a paikheta a, a hehni in a khengakna a theigige kei hi.

²Jakob tenna tengteng TOUPA’N a nawmvalh a a hehpih kei; a hehna ah Judah tanu kulh hatte a laichim a, lei toh kilual in a koih hi; gam leh huai a vaihawmte a hihninta hi.

³A heh mahmahna ah Israel ki tengteng a sat tan; melma ma a kipan a khut taklam a la kikta: mei kuang, kimvel hulbei bang in Jakob a kang beita hi.

⁴Melma bang in a thalpeu a lai a, gal bang in a khut taklam toh a ding, mit a ding a etnop huaite tengteng a that: Zion tanu puanin ah mei bang in a thangpaihna a sungbua hi.

⁵TOUPA melma bang a honghi, Israel a nawmvalhta; a Innpi tengteng a nawmvalh vek a, a kulh muanhuaite a hihseta: Judah tanu ah sunna leh kahna a pungsak hi.

⁶Huan hileh kilawm bang in, a biakbuk hiamgamtakin a lamang a; a kikhopna mun a hihseta: TOUPA’N kikhawm thupi leh khawlni Zion ah mangngilh in a omsak a, a hehna thangpaihna in kumpipa leh siampu a musit hi.

⁷TOUPA’N a maitam a paimang a, a munsiangthou a kih a, a Inpi kulhbangte melmate khut ah a peta hi: kikhop thupi ni bang in TOUPA inn sung ah belam a bawl uhi.

⁸Zion tanu kulhbang TOUPA’N suksiat a tumta; a khauzan a, suse lou din a khut a lakei hi: himahleh leichian leh kulhbang a kapsak a; a kigawp tuak uhi.

⁹A kongpite lei ah a tum ua; a kalhna chiangte hihsia in a kuaitan hi: dan omlouhna namte lak ah a kumpipa leh a lalte a om uh; ahi, a zawlneite’n TOUPA a kipan meng a mu kei uhi.

¹⁰Zion tanu upate leitung ah a tu ua, a pau kei uh; a luzang ua leivui a khi ua; saiip puan a silh uhi: Jerusalem nungak siangthoute’n lei lam ah a lu uh a kun uhi.

¹¹Khitui in ka mitte a zuau a, ka lungsim a mangbang hi, leitung ah ka sin buakkhiak in a om a, ka mite tanu siatna ziak in khopi kongzingte a naupang tuailaite leh nawi nelaite a sihbup ziak un.

¹²A nute uh kiang ah, buh leh bal leh uain kaw om ahia? a chi ua. Khopi kongzingte miliamte bang a a sihbup lai un, a nute uh angsung a a kha uh sun buak a a omlai in.

¹³Na kiang ah bang ka theisak dia? Nang toh bang ka teh dia, Aw Jerusalem tanu? Aw Zion tanu siangthou, k’on lungmuan theihna ding in, bang toh k’on kikim sak dia? Na siatna lah tuipi bang in a thupi ngal a: kuan nang a hon hihdam thei dia?

¹⁴Na zawlneite’n bangmahlou leh haina nang ading in mengmuh in a mu ua; na koltanna pinawn ding in, na gitlouhna a mukhe kei uh: himahleh bangmahlou puakgik leh pimang a omna ziakte nang honmuh sak uh.

¹⁵Honpai kheng tengteng in nang a khut uh a hon betkhum ua; Jerusalem tanu a kikou khum ua; a lu uh a sinkhum uh, hiai khopi kilawmna bukim, lei tengteng a nuamsakna, a chih uh ahi maw? achi uhi.

¹⁶Nang siatna ding in na melmate tengteng in a kam uh lianpiin a ka ua: hiai ni i ngakngak uh ahi mahmah hi; i mukheta a, i muta uhi.

¹⁷TOUPA’N a lunggel a hih tangtungta nidanglai a a thupiak a hih tangtung a; a paita, a hehpih kei: na tung a melma a kipaksak a, na galte ki a tawisangta hi.

¹⁸TOUPA kiang ah a lungtang a kikou a: Aw Zion tanu kulhbang, sun leh zan in khitui luipi bang in luangsak in; khawl kipe kenla; na mit khawlsak ken.

¹⁹Thou in, zan in kikou in, zanvente kipatna ah; TOUPA mai ah tui bang in na lungtang sungkhia in; na ta tuailaite hinna ading in amah lam ah na khutte liktou in, kongzingte ah anngawl in a bahgawp uhi.

²⁰Aw TOUPA, en inla, ngai in, hichibang a na hihna; numeite’n a gah uh a ne ding uam, khut a awih a om naupangte? TOUPA munsiangthou sung ah siampu leh zawlnei thah a om ding uh hia?

²¹Kongzingte ah leitung ah tuailaite leh putek a lum ua; namsau in ka nungak siangthoute leh ka tangvalte a puk uh: na heh ni’n amaute na that a; na that a, na hehpih kei hi.

²²Kikhawmpi thupi lai bang in, munchih ah a unaute na sam a, TOUPA heh ni’n kuamah suakta hiam, om hiam a omkei: huai ka dontei a ka khoilette ka melma in a negaita hi.