Read Paite Chin KAHLATE 3 Bible Online

KAHLATE 3 - Paite Chin bible

KAHLATE 3

¹A hehna chiang a gimthuakna mu mipa ka hi.

²Khovak ah hilou in khomial ah aman a honpi a, a honvak sak.

³Nitum in ka siatna ding in a khut a hei a hei petmah hi.

⁴Ka sa leh ka vun a upa sak a; ka guhte a kitansak hi.

⁵Ka siatna ding a lam a, khatna leh nauveina in a hon umsuak hi.

⁶Sawtpi a sisate bang in, mun mialte ah a hon tengsak hi.

⁷Ka pawt khiak theihlouhna ding in, ka kimvel in dai a kai a, ka khainiang a gik hi.

⁸Ahi, ka kah a, panpihna ka nget lai in, ka thumna a daltan hi.

⁹Suangsek in ka lampite dai a kaitou a, ka lam zuihte a kawisak hi.

¹⁰Kei ding in amah vompi mibuk leh mun guk a humpinelkai bang ahi.

¹¹Ka lampite a kaihei a, a hon botnen a; a hon bawlgawp hi.

¹²A thalpeu a lai a, a thal adia ngim ding in kei a honbawl hi.

¹³A thalbawm a thalte ka lungtang ah a lutsak a,

¹⁴Ka mite tengteng nuihsat ka honghi a; ni tumtum a a la uh.

¹⁵Hehna in a hon dimsak ua, gamsai in a honvak uhi.

¹⁶Suangtat in ka hate leng a kitamsak a, vut in a hontuam hi.

¹⁷Muanna a kipan gamlapi ah ka kha na suan a; hauhsakna ka mangngilhta.

¹⁸Ka hatna a mang a, TOUPA a kipan ka lametna, ka chi a.

¹⁹Ka gimthuakna leh ka haksatna, gamsai leh khatna theigige in.

²⁰Ka kha in amaute a theigige a, ka sung ah a kun ngiungiau hi.

²¹Hiai ka thei thak a, huaiziak in lametna ka nei hi.

²²TOUPA chitnate ziak ahi hihmang a i omlouh uh, a lainatnate a zuau ngeilouh ziak in.

²³Zingsang teng in a thak zel ua; na ginomna a thupi hi.

²⁴TOUPA ka tantuan ahi, ka kha in a chi; huaiziak in amah lametna ka nei ding.

²⁵Amah ngakte kiang ah TOUPA a hoih, amah zong mi tung ah.

²⁶Min TOUPA hotdamna a lamet a a ngak vengveng a hoih hi.

²⁷Min a tuailaia hakkol a puak amah ading in a hoih ahi.

²⁸Amah tung a a ngaktak ziak in, tangtut henla, dai sipsip hen.

²⁹Leivui ah a kam koih hen; huchi a lametna a om theihna ding in.

³⁰Amah bengpa kiang ah a biang doh hen; kouna in amah dim vum hen.

³¹TOUPA’N lah tangtawn in a delh kei ding a.

³²Dahna suaksak mahleh, a chitna tamdan dungzui in lainatna a nei ding hi.

³³Kilawptakin mite tate a hihgim hiam a lungkhamsak ahi kei hi.

³⁴Lei a suangkulh tangte tengteng khenuai sik kham ding.

³⁵Tungnung Pen maima a mihing thuneihna kaihei ding.

³⁶A thu a mihing bawlsiat, TOUPA’N pha a sa kei.

³⁷TOUPA’N thu a piaklouh in, hichi a honghi, chi kua ahia?

³⁸Tungnung Pen kam a kipan in hoihlou leh hoih a hongpai kei maw?

³⁹Bangding a mihing, a khelhna gawtna ading a mi phun ahia?

⁴⁰I lampite zong in enchian ni, TOUPA lam ah kiknawn ni.

⁴¹Vante a Pathian kiang ah i lungtang leh i khutte liktou ni:

⁴²Ka tatlek ua ka hel uh; na ngaidam kei hi.

⁴³Hehna in na khuh a, kou n’on delh a, that in, na hehpih kei hi.

⁴⁴Meipi in na kituam a, huchi a ka thumna in a pailet louhna ding in.

⁴⁵Mite lak ah deihlouh leh ninneng bang in n’on bawl a.

⁴⁶Ka siatna ding in ka melma tengteng un a kam uh lianpi in a ka uh.

⁴⁷Launa leh kawkhuk ka tung uah a hong tung a, siatgawpna leh siatna.

⁴⁸Ka mite tanu suksiatna ziak in, ka mit tui in a tum hi.

⁴⁹Khawllou in, ka mit in a buak a, a khawl kei hi.

⁵⁰Van a kipan a TOUPA’N a etsuk a, a muh matan

⁵¹Ka khopi tanute tengteng ziak in ka mit in ka kha a dah sak.

⁵²Vasa bang in hondelh bah ua, a ziak bei a ka melma hite’n.

⁵³Leikawhawm sung ah ka hinna a sattat ua, ka tung ah suang a khia uhi.

⁵⁴Ka lutung ah tuite a luang a; satkhiak in ka om, ka chi hi.

⁵⁵Aw TOUPA, leikawhawm niampen apan in, na min ka sam hi.

⁵⁶Ka aw na za a; ka kahna ah, ka nakna ah na bil sel ken.

⁵⁷Nang ka honsap ni’n n’ong pai nai a: Lau ken, na chi hi.

⁵⁸Aw TOUPA, ka kha thu n’on gensak a; ka hinna na tanta hi.

⁵⁹Aw TOUPA, ka diklouhna na mu a, ka thu ngaihtuah in.

⁶⁰Ka tung a a phulakna tengteng uleh a thusawm tengteng uh na muta hi.

⁶¹A kouna uh na za a, Aw TOUPA, ka siatna ding a a thusawm tengteng uh;

⁶²Ka siatna ding a dingte mukte leh, nitum a ka siatna ding a a ngaihtuahna uh.

⁶³A tut uleh adin touh uh nang en in; a la uh ka hi.

⁶⁴Aw TOUPA, a khut nasep dungzui in, a tung uah thuk in.

⁶⁵Lungtang sakna amau pia inla, a tung ua na hamsia.

⁶⁶Heh in amau na delh ding a TOUPA vante nuai a kipan amaute na hihgawp ding hi.