Read Paite Chin KAHLATE 4 Bible Online

KAHLATE 4 - Paite Chin bible

KAHLATE 4

¹Bangchidan a dangkaeng mial ahia! Bangchidan a dangkaeng siangthou pen lamdangta ahia! Munsiangthou a suangte kongzingte ah sunkhiak ahi.

²Zion tapa manphate, dangkaeng hoih toh teh theih, bangchidan a leibel, belvelmi khutsuak bang a ngaih hi ahia!

³Sehalte nasan in a nawi uh a suah ua, a ta tuailaite uh a tepsak uh: ka mite tanu zaw hong gilou a, gamdai vasa mulneilou bang in.

⁴Nawitep lai naupang lei dangtak ziak in a lei a kam dangtawng ah a belh a: naupang tuailaite’n tanghou a ngen ua, kuamah in amau di’n a balkham kei uhi.

⁵Nuamtak a nete kongzing ah a mangthang ua: puansandup a khangliante’n ekvum a koi uhi.

⁶Ka mite tanu gitlouhna gawtna Sodom khelhna gawtna sang in a thupizaw a, huai bel mitphiat kallou in a kizou a, amah tung ah khut a kinga kei hi.

⁷A miliante vuk sang in a siangthou zaw ua, nawitui sang in a ngou zaw uh, rubi sandup sang in a pum uh a sandup zaw ua, a tetna uh sapphir suangmantam bang ahi:

⁸A mel uh suangkuangthei sang in a vomzaw a: kongzing a theih in a om kei uh: a vun uh a guh uah a belh bikbek a; a keu a, chiangkang a bang hi.

⁹Namsau a thah a om dingte kial a thah a om dingte sang in a hoihzaw uh; gam a gahte duh ziak in hiaite lah a gawng gawp un, nakpi’n a sia uhi.

¹⁰Hehpihthei numeite khut in a tate uh huan in, ka tanute hihsia in a ne uhi.

¹¹TOUPA’N a thangpaihna a hih pichingta, a hehna a sungkhia a; Zion ah mei a toh a, huai in a suangphumte a suse vek hi.

¹²Lei a Kumpipate leh khovel a mi tengteng in leng, Jerusalem kongpiah gal leh melma a lut ding uh chih.

¹³A zawlneite khelhna ziak leh a siampute ginatlouhna ziak ahi, huchibang a a laktak a midikte sisan suah a a om.

¹⁴Mittaw mite bang in kongzing ah a vakvai ua, sisan a suknit in a om ua, mite’n a puante uh a lawng kei uh.

¹⁵Paimang un, Nin! paimang un, paimang un, honlawng kei un, chi in amau a kikou khum ua: a taimang ua, a vialvak lai un, mite’n namte lak ah, hiai ah a om nawn kei ding uh, a chi uh.

¹⁶TOUPA hehna in amaute a hawmzak a; amaute a limsak nawnta kei ding: Siampute min a zahtak kei ua, upate a deihsak kei uh.

¹⁷Koute mitte vaigawp a, huhna mulou a: lametna i ngak uah nam hon hondam theilou ding i ngakta uhi.

¹⁸I kongzingte ua i pai theihlouh na ding in, i kalsuante a zong ua: i tawp uh a nai a, i nite a kimta: i tawp uh lah a hongtungta.

¹⁹Van a muvanlaite sang in ei hon delhte a kin zaw uh: mualtung ah hon delh ua, gamdai ah a hon na buk uhi.

²⁰I nakvangte a hu, TOUPA thaunilh, a kawkhuk ua lak in a om ua; amah thu gen in. A lim nuai a namte lak ah i hing ding, i chi uhi.

²¹Nuamsa inla kipak in Aw Edom tanu, Uz gam a teng: nou lah nang pha in leng a hongpai suak ding; na kham ding a vuaktang in na kibawl ding.

²²Aw Zion tanu, na thulimlouhna gawtna zoh ahita; saltanna ah nang a hon pimang nawn kei ding: na thulimlouhna in a hongveh ding, Aw Edom tanu; na khelhnate a mukhe ding hi.