Read Paite Chin KAHLATE 5 Bible Online

KAHLATE 5 - Paite Chin bible

KAHLATE 5

¹Theigige in, Aw TOUPA, ka tung ua hongtung: a hon kouna uh en in, mu in.

²Ka gouluah uh mikhual kiang a hei ahi a, ka innte uh gamdang mite lam ah.

³Tagah leh pabei ka hi ua, ka nute uh meithai bang ahi uh.

⁴Ka tuidawn ding uh sum in ka lei ua; ka singte uh kou lak a zuak in a om hi.

⁵A hondelhte ka ngawngzang uah a om ua, ka bah ua, khawlna ka neikei uh.

⁶Aiguptate leh Assuriate kiang ah, Tanghou a lungkim ding in ka kipia uh.

⁷Ka pipute uh a khial ua, a omkei uh; a gitlouhna uh kou ka pua uh.

⁸Sikhate’n ka tung uah vai a hawm ua: a khut ua kipan a kou hon tankhe ding kuamah a omkei uh.

⁹Ka hinna uh lauthawnna toh ka tanghou uh ka mu ua gamdai namsau ziak in.

¹⁰Thuk bang in ka vun uh a vom a nakpitak a kialna ziak in.

¹¹Zion a numeite a sual ua, Judah khopite a nungakte.

¹²A khut un lalte khailup in a om ua, upa melte zahtak in a omkei hi.

¹³Tangvalte’n khawl a pua ua, naupangte singnuai ah a kisui uh.

¹⁴Kongpi a kipan upate a khawl ua, a lasakna ua kipan in Tangvalte a khawl uh.

¹⁵Ka lungtang kipahna uh a tawp a, ka lamna uh dahna a suak hi.

¹⁶Ka lu ua kipan ka lallukhu uh a kia a, ka tung uh a gik hi! ka khelh ziak un.

¹⁷Hiai ziak in ka lungtang uh a bah a; hiai thilte ziak in ka mitte uh a mial hi;

¹⁸Hihsiat a om, Zion mual ziak in; sehalte a tung ah a vak uh.

¹⁹Aw TOUPA, nang tangtawn in na om gige; na mangtutphah khang khat a kipan in khang khat tan in a om hi.

²⁰Bangdia tangtawn a hon mangngilh a, hichi tantan hon nungngatsan na hia?

²¹Nang lam hon ngasak in, Aw TOUPA huchi in bawlhoih nawn in ka om ding uh; nidanglai bang in ka nite uh thaksak in.

²²Ahihkeileh n’on paikhe hilhial ahia? Ka tung uah na heh mahmah ahia?