Read Paite Chin EZEKIEL 1 Bible Online

EZEKIEL 1 - Paite Chin bible

EZEKIEL 1

¹Saltan kum sawmthumna, kha lina, huai kha ni ngana ah Kebar lui a saltangte lak a ka omlai in hichi a honghi a, van a kihong a, Pathian kilakna ka mu hi.

²Huai kha ni ngana ah, huai bel kumpipa Jehoiakin saltan kum ngana ahi.

³Kaldai gam a Kebar lui ah, Buzi tapa siampu Ezekiel kiang ah TOUPA thu a hongtung a; huai ah TOUPA khut a tung ah a om hi.

⁴Huan ka en a, ngai in, mallam a kipan huihpi thupi mahmah a hong kuan a, meipi a saha sah, kuang zoizoi, a kim tengteng tanvak puappuap asung mei laitak ah sikam bang a am a om hi.

⁵Huchi in huailai a kipan in thilhing li kibatpih a hong pawtkhia ua, a kimuh dan uh hichibang ahi: mihing batna a nei uhi.

⁶Mai li a neichiat ua, kha li a neichiat uhi.

⁷A khete uh a tang ahi a; a khepek nuai lam uh bawngnou khepek bang ahi a; huan dalte mahmah bang in a vakkhe zualzual uhi.

⁸A pang lite ua a khanuai uah mihing khut bang a nei ua: huchi in a li un a mel uleh a khate uh hichibang in a pu uhi;

⁹A khate uh a kizom a; a pai un leng a kihei ngeikei ua, a mazawn uah a paichiat uhi.

¹⁰A mel un a kibatpihte mihing mel bang ahi a, a li un a taklam pang uah humpinelkai mel a pu ua, a li un a veilam pang uah bawngtal mel a pu ua, a li un muvanlai mel a punawn ua, a mel uh huchibang ahi.

¹¹Huan a khate uh a zakkhia ua, a kha nihte un a kizak zom chiat ua, nih in a pumpi uh a khuh uh.

¹²Malam ah a paichiat ua, kha paina lam ding ah a pai ua, a pai un leng a kihei ngeikei uhi.

¹³Thilhingte lak ah suangkuangthei ampha bang, meisel bang mai a suk leh tou in a pai a; meibel a ampha mahmah a, mei a kipan khopi a hong suakkhe zualzual hi.

¹⁴Thilhingte khophe zualzual bang in a vialtai uhi.

¹⁵Huan thil hingte ka et lai in, ngai in, thil hingte zul ah a mel lite uh ading in lei ah kangtalai khe khat zel ka mu hi.

¹⁶Kangtalai khe leh a tatdan beril suang zia bang mai in a lang a, a li un latdan khat a nei ua, a latdan uh leh a tatdan uh kangtalai khe khat sung a kangtalai khe dang om bang ahi hi.

¹⁷A pai chiang un sik li in a pai thei ua, a pai un leng a kihei ngeikei uh.

¹⁸A kangtalai khe kual sangtak leh mulkimhuaitak ahi a; a li un kual, mit a dim teptup a nei uhi.

¹⁹Huchi in thilhingte a pai chiang un a zul uah kangtalai peite a paisam uhi: thil hingte lei a kipan dopkang a a om uleh kangtalai khete leng dopkang in a omsam uhi.

²⁰Kha paina ding lam peuhmah ah a pai ua; huai lam ah kha a pai ding ahi hi; huchi in, kangtalai khete a zul uah dopkang in a om ua, thilhing kha kangtalai khete ah a om hi.

²¹Huaite a pai chiang un hiaite a pai uhi: huaite adin chiang un hiaite ading ua: huaite lei a kipan a dopkang a a om chiang un kangtalai khete amau zul ah dopkang in a om ua, thilhingte kha kangtalai khete ah a om hi.

²²Thil hingte lu tung ah van kibatpih a om a, kristal vak bang a te mulkimhuai tak a lu tung uah a kiphalh zeizoi hi.

²³Van dum nuai ah a kha uh a kopkhat thil hing dangte sun in a zak ua, a kha uh kop khat nawn in a pumpi uh a khuh uhi.

²⁴Huan a len uleh a kha ging uh tui tampi mahmah ging bang, bangkim hihtheipa aw bang mai, mipi ging vengvung husa, sepaihhon husa bang mai in ka za a; adin uleh a kha uh a kaisak uhi.

²⁵A lu tung ua van dum tung ah aw a hongom a, adin uleh a kha uh a kaisak uhi.

²⁶Huan a lu tung ua van dum tung ah mangtutphah bang, sapphir suang bang mai a kimu a om a: huai mangtutphah bang tak tung ah mihing bang a kilang a om hi.

²⁷A kawngchiang tunglam sik hal ap bang mai in ka mu a, a kawng hileh kilawm chiang nuailam mei bang mai hi in ka mu a, a vak kimvel lelaw hi.

²⁸Vuahzuk ni a meipi tung a sakhituihup latdan bang in a kim vak a lang hi. Hiai TOUPA thupina latdan bang ahi. Huan ka muh in a khup in ka puk a, thugenpa aw ka za hi.