Read Paite Chin EZEKIEL 10 Bible Online

EZEKIEL 10 - Paite Chin bible

EZEKIEL 10

¹Huchi in ka en a, ngai in, cherubte lu tung a van dum om ah sapphir suang hileh kilawmtak, mangtutphah bangtak a kimu a honglang a.

²Aman puanmalngat silhpa kiang ah, “Cherub nuai a kangtalai peite kikal ah valut inla, cherubte kikal a meivu na khut langnih dim in valuak inla, khopi tung ah thehzak in” a chi hi.

³Ka mitmuh lai mahmah in a kuanta hi. Huan mi a hohlai in cherubte Inpi taklam pang ah a ding ua; huang sungnung pen meipi in a dimta hi.

⁴TOUPA thupina cherubte a kipan a paitou a, biakin kongpi tung ah a vadingta a, huai inn meipi in a dim a, huangsung TOUPA thupina vak in a dimta hi.

⁵Cherubte khazap gingte huangsung pawnung zaw leng Pathian Bangkim hihthei in a hon houpih lai a a om bang mai in a kiza hi.

⁶Huan hichi ahi a, puanmalngat silhpa kiang ah, “Cherubte kikal a kangtalai pei kikal a kipan mei vala in” chi a thu a piak leh, amah a valut a, kangtalai khe chin ah a dingta hi.

⁷Huan cherubim, cherubte kikal a kipan in, cherubte kikal a mei om a sawka, a la a, puanmalngat silhpa khut ah a pia a, aman a na la a, a pawtkheta hi.

⁸Huchi in cherubte bel a kha nuai uah mihing khut bangtak a honglang a.

⁹Huan ka en a, ngai in, cherubte sik ah kangtalai khe li, Cherub khat kiang ah, kangtalai khe khat, Cherub dang kiang ah kangtalai khe dang ka mu a; kangtalai khe latdan bel beril suang zia bang ahi hi.

¹⁰A latdan un a li un kibatna khat a nei ua, kangtalai khe khat sung a kangtalai khe dang om bang mai ahi hi.

¹¹A pai chiang un sikli in a pai thei ua, a pai un leng a kihei ngeikei uh; himahleh amasa ngatna lam a zuizel uhi, a pai un a kihei tuankei uhi.

¹²Huan a pumpi uh a pum in a nungte uh, a khutte uh, a khate uleh kangtalai khete leng a kim in mit in a dim a, a li ua kangtalai khete leng.

¹³A kangtalai khete bil a ka zak mahmah in, “Kangtalai khe kipei” chih ahi.

¹⁴Michih in mel li chiat a nei ua, mel khat Cherub mel ahi a, nihna mihing mel ahi a, thumna humpinelkai mel, lina muvanlai mel ahi.

¹⁵Huchi in cherubte a paitou ua; hiai bel Kebar luigei a thil hing ka muh ahi.

¹⁶Huan, cherubte a pai uleh kangtalai khete a kiang uah a paitei a, cherubte’n lei a kipan paitou ding a a khate uh a zak uleh kangtalai khete’n a lehngatsan ngeikei uh.

¹⁷A din uleh hiaite a ding tei ua, a paitouh uleh hiaite a paitei zel ua, thil hing kha amau ah a om hi.

¹⁸TOUPA thupina Inpi kongpi tung a kipan a pawtkhia a, cherubte tung ah a dingta hi.

¹⁹Huan cherubte’n a kha a zak ua, a pawt un ka mit muh mahmah in lei a kipan a paitou ua; kangtalai khete a kiang uah a om zel a: huan TOUPA Inn lutna suahlam kongkhak chin ah a dingta hi; Israel Pathian thupina a tung uah a om hi.

²⁰Hiai bel Kebar lui a Israel Pathian nuai a ka thil hing muh mah ahi; cherubte ahi uh chih ka thei hi.

²¹Michih in maituam li leh kha li a neichiat ua, a kha nuai uah mihing khut bang mai a om hi.

²²Huan a mel lam uh ahihleh Kebar lui a ka muh melte mah bang, a latdan uleh amau mahmah leng ahi uhi; huan a mazawn zel uah a paichiat uhi.