Read Paite Chin EZEKIEL 11 Bible Online

EZEKIEL 11 - Paite Chin bible

EZEKIEL 11

¹Huan kha in a hon domkang a, TOUPA’N inn suahlam lutna, suahlam muhna a hontun a: ngai in, lutna kongkhak chin ah mi sawmnih leh nga a na om ua: a lak uah Azzur tapa Jaazaniah leh Benaiah tapa Pelatiah, mipi heutute, ka mu hi.

²Aman ka kiang ah, “Mihing tapa, hiaite gitlouhna sawmkhete ahi ua, hiai khopi ah gitlouh sawmkhe mite ahi uh.

³Inn lam hun ahi naikei hi; hiai khopi sa ui bel ahi a, eite a sa i hi uh” chite.

⁴Huaiziak in thu gen inla, aw mihing tapa, a tung uah thu gen in” a chi hi.

⁵Huan TOUPA kha ka tung ah a hongtung a, aman ka kiang ah, “Gen in, TOUPA’N hichi in a chi a: Hichibang in na hihsek ua, aw Israel inkawte aw, na lungsim ua thil hongtungte ka thei siang vek hi.

⁶Hiai khopi ah na mithahte uh na pungsak huthut ua, a kongzingte na mithah un na dimsakta uhi.

⁷Huaiziak in TOUPA’N Pathian in hichi in a chi: Na mi thah uh a lai a na koihte uh a sa ahi ua; hiai khopi a sa ui bel ahi, himahleh a lai a kipan suankhiak in na om ding uhi.

⁸Namsau na kihta ua, na tung uah namsau ka hontun ding, TOUPA’N Pathian in a chi ahi:

⁹A lai a kipan ka hon pawtkhe sak ding a, namdangte khut ah k’on mansak ding a, na tungthu uh a ngaihtuah ding uh.

¹⁰Namsau in na si ding ua, Israel gamgi lam ah na tungthu uh ka ngaihtuah ding: huchi in kei TOUPA ka hi chih na thei ding uh.

¹¹Hiai khopi na sa ui bel uh ahi kei ding a, nou a sung a sa na hi sam kei ding ua, Israel gamgi lam ah na tungthu uh ka ngaihtuah ding hi.

¹²TOUPA’N ka hi chih na theita ding uh, ka dan bawl na zuikei ua, ka thupawt leng na zui sam kei ua: na kim ua namte hihdan na zui zawta uh” a chi, chi in.

¹³Huan hichi ahi a, thu ka gen a leh Benaiah tapa Pelatiah a na sita mai a, Huchi in ka khuppuk a, aw ngaihtak in ka kikou in, “Ah, TOUPA Pathian: Israel omsunte chimihna na bawl ding ahia?” ka chi hi.

¹⁴Huan TOUPA’N thu ka kiang ah a hongtung a, ka kiang ah”:

¹⁵Mihing tapa, na unaute, na chi leh kuangte ngei leh Israel inkawte tengteng, avek un. “Jerusalem luah mite’n TOUPA a kipan paimang un, hiai gam kou adia piak ahita hi” a chihnate uh ahi uhi.

¹⁶Huaiziak in TOUPA’N Pathian in hichi in a chi ahi: Gamlapi ah namte lak ah ka suanmang a, gam tampi ah ka hihdalh na a, sawtloukal in a va tunna gam uah amau ding in Mun Siangthou ka hi ding, a chi hi.

¹⁷Huaiziak in TOUPA’N hichi in a chi ahi: Namdangte a kipan in k’on pikhawm nawn ding a, na dalhna gam ua kipan k’on kaikhawm nawn ding. Israel gam k’on pe ding hi.

¹⁸Huchi in huai ah a hongpai ding ua, thil nin tengteng leh thil kihhuai a kipan a lamang ding uhi.

¹⁹Lungtang khat ka pe ding a, na sung uah lungsim thak ka koih ding: Huan a sa ua kipan lungtang sak ka lamang ding a, lungtang nem a kiang uah ka pe ding hi:

²⁰Ka dan bawlte a zuih ua, ka thusehte a vom ua, a hih theihna ding un, Huchi in ka mite ahi ding ua, keileng a Pathian uh ka hi ding.

²¹A nitna uleh a kihhuaina laigil lungtang zuite bel a khelhna uh avek in amau ka khusak ding, TOUPA’N a chi.

²²Huchi in cherubte’n a khate uh a zak ua, a kiang uah kangtalai khete a om a, Israelte Pathian thupina a tung uah a om hi.

²³TOUPA thupina khopi lai a kipan in a paitou a, khopi suahlam pang a tang sang ah a vadingta hi.

²⁴Huan kha in a hon domkangta a, kilakna ah Pathian kha in Kaldai gam a saltangte kiang ah a hontun hi. Huchi in ka kilakna muh in a hon paitouh santa hi.

²⁵Huchi in saltangte kiang ah TOUPA’N thil a hon etsak tengteng ka genta hi.