Read Paite Chin EZEKIEL 12 Bible Online

EZEKIEL 12 - Paite Chin bible

EZEKIEL 12

¹TOUPA thu ka kiang ah a hongtung nawn a, ka kiang ah.

²“Mihing tapa, helhat inkuan, muhna ding mit nei a mulou, zakna ding bil nei a zaloute lak ah om na hi, helhat inkuan ahi him uhi.

³Huaiziak in, nang mihing tapa, saltanna a paiding bang in na vante lomgak dimdiam inla, sun khovak ah a mitmuh mahmah un paikhia in: a muh mahmah na mun ua kipan mun dang ah na paikhe ding ahi: helhat inkuan ahi ua, a kingaihtuah loh khamai ding uhi.

⁴Huan na van sun khovak in a mitmuh mahmah uah saltang pai ding van lak in na lakhe ding a, nang mahmah leng a mitmuh uah gamdang a khakmang ding pai in na pai ding ahi.

⁵A mitmuh mahmah uah kulhbang vangsak inla, huai ah lakhia in.

⁶A mitmuh mahmah uah na paw ding a, mial ah na paikhe ding ahi: lei na muh louhna ding in na mai na khuh ding ahi; Israel inkawte ading in etsak kholhna din nang k’on bawl ahi ngal a, a chi hi.

⁷Huchi in a hon thupiak bang in ka hihta; ka van saltang ding van bang in sun khovak in ka lakhia a, ka khut in bang ka sunvang a, khomial lai in ka lakhia a, a mitmuh mahmah uah ka pua hi.

⁸Huan zingsang in TOUPA thu ka kiang ah a hongtung hi.

⁹Mihing tapa, Israel inkuan, helhat inkuante’n na kiang ah. “Bang hih na hia?” a honchi uh ahi keimaw?

¹⁰A kiang uah “TOUPA Pathian in hichi in a chi: hiai thuphuan Jerusalem heutute leh Israel inkaw pumpi, a omna uh mite tungthu ding ahi.

¹¹Nou adin etsak kholhna ka hi a, ka chih bang geiha a tung ua hih ahi ding; khak mang in, saltang ding in a paimang ding uh” chi in.

¹²Huan a lak ua heutu omsun in mialnuai ah a liang in a paw ding a, a paikhe ding: a lakkhiakna ding un bang a vangsak ua, a mit in gam a muh nawnlouh ziak in a mai a khuh ding ahi.

¹³Amah ka len in ka khuh ding a, ka thang a awk ahi ding: Kaldai gam a Babulon ah k’on pi ding a, muh zaw a mu kei ding; huai ah a si ding hi.

¹⁴Amah panpih ding a a kiang a omte leh a chingmite tengteng gamchih ah ka hihzak ding a, namsau dok in ka delh ding hi.

¹⁵Huan namte lak a ka delhzak a, gamchih a ka hihdalh hun chiang in TOUPA ka hi chih a thei ding uh.

¹⁶Himahleh namsau, kial, hipi a kipan mi tawmchik ka hawi ding; huaite’n a hongpaina gam ua namte kiang ah a kihhuaina tengteng a phuanna ding un; kei TOUPA ka hi chih a thei ding uh, a chi hi.

¹⁷Huan TOUPA thu ka kiang ah a hongtung nawn hi.

¹⁸Mihing tapa, na an ling vonvon kawm in ne inla, na tui lungzing a lingkawm in dawn in;

¹⁹Huan gam a mite kiang ah TOUPA Pathian in Jerusalem a tengte tungtang ah leh Israel gam tungtang ah hichi in a chi ahi: A ante uh lau kawm in a ne ding ua, a tui uh lungzingtak in a dawn ding ua, a gamsung a tengte hiamgamna ziak in asung a thilom tengteng a kipan hihgawp in a om ding hi.

²⁰Huchi in mi tenna khopite a inn-gam ding a, gam hihsiat in a om ding a, huchi in TOUPA ka hi chih na thei ding uh, a chi hi.

²¹Huan TOUPA thu ka kiang ah a hongtung hi:

²²Mihing tapa, Israel gam a hiai paunak na neih uh bang chihna ahia? “A nite a sawt chian kilakna peuhmah a vuaksuak nawn zel” na chih uh.

²³Huaiziak in “TOUPA Pathian in hichi in a chi ahi: Hiai paunak ka hihbei ding a, Israel gam ah a zang nawn ngeikei ding uh; kilakna tundik ni ding a naita a, chi in a kiang uah genzaw in.

²⁴Israel inkuante lak ah kilakna hong vuaksuak leh aisan hoihlam a maitang phatna a omta kei ding hi.

²⁵TOUPA ka hi a, ka gen ding a, ka gen tangtun ahi ding a, sit ahi kei ding: Aw helhat inkuante aw, na damlai mahmah un thu ka gen ding hi, ka tang tungsak pahding, chih TOUPA Pathian thupawt ahi, a chi hi.

²⁶TOUPA thu ka kiang ah a hongtung nawn a:

²⁷Mihing tapa, ngai in, “Israel inkawte a min Kilakna a muhte bel ni tampi ading ahi a, a genkholhte leng gamlapi ding ahi” a chi uhi.

²⁸Huaiziak in a kiang uah, TOUPA Pathian in hichi in a chi ahi: Ka thu bangmah sit ahi kei ding a, ka thugen peuhmah hih tangtun in a omzaw ding, chih TOUPA Pathian thupawt ahi, chi in hilh in, a chi hi.