Read Paite Chin EZEKIEL 13 Bible Online

EZEKIEL 13 - Paite Chin bible

EZEKIEL 13

¹Huan TOUPA thu ka kiang ah a hongtung nawn a,

²“Mihing tapa,” Israel zawlnei, amah lungtang kia a kipan a gen chingte tung ah thu gen inla, “TOUPA thu ngai un” TOUPA Pathian in hichi in a chi ahi.

³Zawlnei hai, amau ngaihdan zui a, bangmah muloute tung a gik hi:

⁴Aw Israel, na zawlneite khawpi sesa a sehal om banglel ahita uh.

⁵TOUPA ni a kidouna ading zou ding a kulhbang dingkip sak ding leh Israel inkawte hum ding a kulhbang lam ding in na paitou kei uhi.

⁶“TOUPA thupawt ahi” chi mite’n bangmahlou lel leh genkholhna lim lel a tang ua, TOUPA sawl ahi kei uhi; a thu uh hingei ding bang in mite a gingta sak ua.

⁷Kilakna hong vuaksuak lel na mu un, thugenkholh dik lou na gen uh ahi kei maw? “TOUPA thupawt ahi” na chi nawn ngal ua, ken ka gen ahia?

⁸Huaiziak in TOUPA Pathian in hichi in a chi ahi: Bangmahlou phet na gen ua zuau lel na muh ziak un, ngai un, ka honnang ahi, chih TOUPA thupawt ahi.

⁹Huan ka khut in bangmahlou mute leh zuaugen kholmite a nang ding a, ka mite kidot khawmna ah a tel kei ding ua, Israel inkuante min gelhna ah gelh in a omsam kei ding; huchi in TOUPA Pathian ka hi chih na thei ding uh.

¹⁰Galmuanna omloupi a, “Muan huai e” chi a mite a pimang ziak un leh mi bang bawl a, sunu nuhmite’n,

¹¹A ke nawn mai ding, vuahpi a hongzu ding a, nou gial lian pite aw, na hong ke ding ua, huih thupi in a hihse ding, chi in.

¹²Ngai un, bang a chip khit chiang in, “Na sunu nuh uh koi ah, a honchi kei ding ua hia?”

¹³Huaiziak in TOUPA Pathian in hichi in a chi ahi: Ka heh in huihpi thupi in ka hihse vek ding, ka heh in vuahpi a hongzu ding a, ka heh in gial thupitak hihmang ding in a hong ke ding.

¹⁴Huchi in sunu na nuh ngou bang uh ka chim sak ding a, lei pha in a chim dia, huchi in a suangphumte a dawk hial ding hi: huan a chim ding a, bang chim ah hihmang in na om ding uh; huchi in TOUPA ka hi chih na thei ding uh.

¹⁵Hichibang in bang tung ah leh sunu nuhmite tung ah ka hehna ka damsak ding; huan, bang a om nawn kei a, a bangzutte leng a om nawnta kei uh, k’on chi ding hi.

¹⁶Huai bel Israel zawlnei Jerusalem tung thugen a, galmuanna omloupi a galmuanna musakmite ngei, a om nawn kei uh, chih TOUPA Pathian thupawt ahi.

¹⁷Nang mihing tapa, na mite tanute, a lungtang lel ua genmite masuan inla, amau kalh in thu gen in, TOUPA Pathian in hichi in a chi ahi:

¹⁸Numei, mite ban a sik bunsak leh mi hinnate mat belhna ding a mi liante lu khuhna khuimite a tung uh a gik hi: Nou hinna ding in ka mite hinna na man ding uh maw?

¹⁹Buhman tawmchik leh tanghou them mu ding a si lou ding sisak ding leh hing lou ding hingsak ding in na zuaugen uh ka mite’n a up ziak un ka mite lak ah ka min a thanghuai ahi.

²⁰Huaiziak in TOUPA Pathian in hichi in a chi a: Ngai un, mi hinna, vasa bang a man ding a na thil butsakte uh ka mudah ahi; na bante uh ka bot ding a, na mimat dingte uh vasa bang a na mat dingte uh hinna ka pawtsak vek ding hi.

²¹Na lukhuhnate uh leng ka botkek ding a, ka mite na khut ua kipan ka suakta sak ding, na mat theih ding un na khut uah a omta kei ding uh; huchi in TOUPA ka hi chih na thei ding uh.

²²Kei lungkham sak hilou a, mi diktatte lungtang zuau a na hihnat ziak un leh migilou hingdam a a omna ding a a khelhna lampi a kipan a kilehhei louhna ding in migilou khutte na hihhat ua,

²³Huaiziak in bangmahlou lel, thu genkhol diklou hiam zaw na mu nawn kei ding uh; huan ka mite na khut ua kipan ka hunkhe ding a, TOUPA ka hi chih na thei ding uh, a chi, chi in gen in, a chi hi.