Read Paite Chin EZEKIEL 14 Bible Online

EZEKIEL 14 - Paite Chin bible

EZEKIEL 14

¹Huchi in Israel upa khenkhatte ka kiang ah a hongpai ua, ka ma ah a tu ua.

²TOUPA thu ka kiang ah a hongtungta, ka kiang ah:

³Mihing tapa, hiai mite’n a milimte uh a lungtang uah a lalut ua, a ma uah a thulimlouhna pukna uh a koih uhi; kei hon dong peuhmah ding ua hia?

⁴Huaiziak in, amau houpih inla, TOUPA Pathian in hichi in a chi ahi: Israel inkuan a michih a lungtang ua milim lalut a, a ma ua a thulimlouhna pukna koih a, zawlnei kiang a hongpai peuhmah kei TOUPA’N a milim uh tamdan bangzel in ka dawng ding;

⁵Israel inkawte a milim uh ziak a hon na omtuam san ziak ua a lungtang ua ka mat theihna ding in.

⁶Huaiziak in Israel inkawte kiang ah TOUPA Pathian in hichi in a chi ahi: Hongkik unla, na milimte ua kipan in hongkik un, na kihhuaina tengteng uh lehngatsan un.

⁷Israel inkaw lak a mi kuapeuh hiam, mikhual Israel gam a teng tei hiam, kei a kipan a kihihtuam, a lungtang ua milim lalut a, a ma ua thulimlouhna pukna koih kawm a, a tungtang ua hondong ding a zawlnei kiang a hohkei leh TOUPA ngei in ka dawng ding hi.

⁸Huai mi ka masuan ding a, min lamdang a sak ding in tangtawn tangtawn a gen ding in ka mite lak a kipan ka hihmang ding; huchi in kei TOUPA ka hi chih na thei ding uhi.

⁹Huan zawlnei khem a om in thugen henla, kei TOUPA’N zawlnei ka khem ahi a, a tung ah ka khut ka lik ding a, ka mi Israelte lak a kipan ka hihmang ding.

¹⁰A thulimlouhna uh a paw ding ua: Zawlnei thulimlouhna amah dongmite thulimlouhna bang mai ahi ding hi.

¹¹Israel inkawte kei a kip a a man nawnlouh ua, a tatleknate tengteng ua a kihihnit nawn sam louhna ding un, ka mite a hihzawk ua a Pathian uh ka hih theihna ding in, TOUPA Pathian in a chi, chiin gen in, a chi hi.

¹²TOUPA thu ka kiang ah a hongtung a.

¹³Mihing tapa, gam mite’n tatlekna thilhih a, ka tung a thil hihkhial a, ken ka khut ka lik a, a an uh, hinna bul ka hihsiat a, a tung ua kial ka tunsak a, mi leh sate k’on hihman leh hiai mi thum,

¹⁴Noah, Daniel leh Job hial leng hongom bang hileh, a diktatna un amau hinna kia a humbit ding ahi, chih TOUPA Pathian thupawt ahi.

¹⁵Gam sahangte a gam uh ka tuansuak sak a, gam a hihsiat ua, a hong kigawp a, gamsa ziak a kuamah paisuak ding a omkei uleh

¹⁶Hiai mi thumte om le uh, a hin a ka hin laiteng, chih TOUPA Pathian thupawt ahi, a tanute uh, a tapate uh a humbit tuankei ding uh: amau kia hotdam in a om ding ua, gam a segawp ding hi.

¹⁷Ahihkeileh huai gam ah namsau ka lik dia, “Namsau, gamsung teng ah gamtang in” mi leh gamsa ka gawimang ding hi:

¹⁸Hiai mi thumte om le uh leng, a hin a ka hin laiteng, chih TOUPA Pathian thupawt ahi, a tanute uh, a tapate uh a humbit tuankei ding ua, amau hinna kia humbit in a om ding uh.

¹⁹Ahihkeileh, huai gam ah, hipi k’on lensak a, mi leh sa hihmang ding a sisan suah a ka hehna huai gam tung a k’on sun leh:

²⁰Noah, Daniel leh Job hial leng na om le uh, a hin a ka hin sung teng, chih TOUPA Pathian thupawt ahi, a tanu uhiam, a tapa uhiam a humbit kei ding ua, a diktatna un amau hinna ngei a humbit lel ding uhi.

²¹TOUPA Pathian in hichi in a chi ngal a: Jerusalem tung a ka vaihawmna na mahmah lite, namsaute, kialte, gam sahangte, hipite, mi leh sa gawimang vek ding a kontut hun chiang in bangzah a thupi ahi diam aw?

²²Himahleh ngai in, huailai a omsun pikhiak dingte nutsiat in a om ding ua, tanute leh tapate leng: ngai un, a kiang uah a hong pawtkhe ding ua, a omdan uh a thilhihte na mu ding uh, Jerusalem tung a thil hoihlou ka hontut thu ah lungmuan in na om ding ua, a tung a kontut tengteng thu ah leng.

²³A omdan uleh a thilhihte uh na muh hun chiang un a hon lungmuan ding uh; a tung a ka thilhih tengteng hihsan neilou in ka hihkei chih na thei ding uh chih TOUPA Pathian thupawt ahi, chi in.