Read Paite Chin EZEKIEL 16 Bible Online

EZEKIEL 16 - Paite Chin bible

EZEKIEL 16

¹TOUPA thu ka kiang ah a hongtung nawn a:

²Mihing tapa, Jerusalem a kihhuainate theikhe sak inla, a kiang ah,

³TOUPA Pathian in Jerusalem kiang ah hichi in a chi ahi: Na pawtna gam leh na pianna gam Kanan mite gam ahi a, na pa Amor mi ahi a, na nu Hit mi ahi.

⁴Huan na pianna thu bel na pian ni’n na laigui at ahi kei a, nang hihsiang ding a tui a sil na hisam kei, chi nuh na tuak kei a, tuam lum na hi kei.

⁵Lainat ding a na tung a hiaite hih ding in kuamah mit in nang a hon hehpih kei ua: gam lak a paihkhiak na hita, na pian ni a kipan kiha om na hi hi.

⁶Huan na kiang a k’ong pai in sisan a talin k’on mu a, na kiang ah, “Sisan ah om lechin leng ‘hing in!’ k’on chi a”: ahi, ka honchi ahi; “Sisan ah om mahle chin ‘hing in!’.

⁷Gam thil pakmum bang in k’on khangsak a, na sam a hong hoih a; savuak leh vuaktang lel na hi lailai hi.”

⁸Huan na kiang a k’ong pai a k’on etin, deihhuai tham na hong hita a, ka puan k’on zawn a, na vuaktanna k’on khuhta hi: ahi, na kiang ah ka kichiam a, thukhun ah k’on lutpih a, kei a na hita hi, chih TOUPA Pathian thupawt ahi.

⁹Huchi in tui in k’on sil a, ahi, na sisan k’on hihsiang sipsip a, sathau k’on nuh hi.

¹⁰Puanzem in k’on van a, saham vun khedap k’on bunsak a, puanmalngat hoih in k’on van a, silk puan k’on khusak hi.

¹¹Kizepna hoih in k’on zem a, na khut ah taute, na ngawng ah dangkaeng khainiangte,

¹²Na nak ah nakbulhte, na bil ah bilbahte, na lu ah lallukhu hoihtak in k’on zem hi.

¹³Huchi in dangkaeng leh dangkasik a zephoih na hita a, na puansilhte puanmalngat hoihtak leh silpuan leh puankhui kilawm ahi a: na nek tangbuang nel leh khuaizu leh sathau ahi, na kilawm mahmah a, kumpinu leng na ching hi.

¹⁴Na kilawmna namte lak ah a thangkhia a, ka thupina a kivan in na buchingta, chih TOUPA Pathian thupawt ahi.

¹⁵Himahleh na kilawmna na muang lua a, na minthanna na hukloh a, mi vialvak peuh leh na muh peuh na luppih hi.

¹⁶Na puansilhte suah in mun sangte na zuan a, huai ah kizuak in na pang a, hichibang in na om ngei nawn kei ding hi.

¹⁷Ka dangkaeng leh ka dangkasik tuium-belsuan hoih taktak k’on piak na la a, pasal limbawlna ding in na zang, na hukpihta hi.

¹⁸Puansilh khui kilawmte na la a, amau na tuam a, ka sathaute leh ka gimlimte a ma uah na tung hi.

¹⁹K’on tanghou piak leng ka tangbuang hoih leh sathau leh khuaizu k’on vaknate gimlim ding in a ma uah na lui a; hichi a hong hita, chih TOUPA Pathian thupawt ahi.

²⁰Huailou leng na tanu, na tapa, n’on suansakte a kiang uah kithoihna ding in zat bei din na pia a: na hukna thil namai ahi ahia?

²¹Ka tate na thah a, meipi a pailut a a kiang ua na latte?

²²Na kihhuaina leh na hukna tengteng ah na naupanlai a vuaktang a na om leh na sisan a na tal maimah laite na thei nawnta kei hi.

²³Huan hiai na thulimlouhna tengteng khit in leng, hichi a honghi a, na tung a gik hi: TOUPA Pathian in a chi ahi.

²⁴Mun kiphoute na kibawlna, kongzing chiteng ah mun sangte na lam a,

²⁵Lampi kipatna tengah munsang na lam a, na kilawmna kihhuai in na bawl a vialvak peuhmahte kiang ah na kilem dawk a, na hukna a uang semsem hi.

²⁶Aigupta mi, na inveng, sami mahmah toh kingaihna khelhna leng na hihta; hon hehsak ding in na hukna na uangsakta ahi.

²⁷Huaiziak in ngai in, na tung ah ka khut ka lik a, na annek ka kiamsak a, nang hon mudah Philistia tanute, na hukdan zumpih mahmah nute kiang ah ut ut a a honbawl ding un k’on peta hi,

²⁸Assuria mite kiang ah leng na kizuak a, huntawk chih lah nei tellou chin a; ahi, a kiang uah kizuak in na pang a, na kham tuan sam kei hi.

²⁹Kanan gam ah, Kaldai mite kiang ah na hukna na uangsak lailai a, na kham tuankei hi.

³⁰Nang lungtang seta namai e, na tatdan numei genhak gilou mahmah mai thil na hih a, chih TOUPA Pathian thupawt ahi.

³¹Lamka thuam teng a milim biakna inn na bawl a, kongzing chih a munsangte na bawlte loh na delhlouh ziak in kizuak leng na bang kei hi.

³²Zi angkawm, pasalte sang a mi tuam deihzaw nu:

³³Kizuak kiang ah thil a pesek ua, nang bel na lehpiak a hon deihmi ang ah, gamchih a kipan a hongpai ua, a hon luppih theihna ding un na nou zawnak ahi.

³⁴Huan na huk thu a kuamah in a honzot louh midang toh na kibatlouhna uh ahi; nang a man na pe zawsop a, kuamah in man a honpiak louh uh na lamdanna ahi.

³⁵Huaiziak in aw mi huknu, TOUPA thu ngai in:

³⁶TOUPA Pathian in hichi in a chi hi: Na kihhuaina buakkhiak a hih a, na mingaihte toh na kithuahna lam ua na vuaktanna suklat a hih ziak leh na kihhuaina milim tengteng ziak leh a kiang ua na piak na tate sisan ziak in:

³⁷Ngai in, nang hon ngaimi na nuamtatpihte tengteng leh na nangaih khitsa tengteng leh na muhdahte tengteng ka samkhawm ding a, he, na kim ah ka pikhawm ding a, na vuaktanna tengteng a muh theihna ding un a kiang uah na vuaktanna ka hihlang ding hi.

³⁸Huan numei pasal khen a, amah ta sisan suah tungthu a bang in k’on vaihawm khum ding; hehna leh mullitna sisan na tung ah ka tungsak ding.

³⁹A khut uah k’on pedia, na mun kidohte a hihpuk ding ua, na munsangte a chimsak ding ua; na puansilhte a suah ding ua, na suangmantamte a honsut ding ua, savuak leh vuaktang in a hon nuse ding uhi.

⁴⁰Na tung ah mipi a kaikhawm ding ua, suang in a hon deng ding ua, namsau in a hon kui pailet ding uh.

⁴¹Na innte mei in a hal ding ua, numei tampi mitmuh in na tung ah vaihawmna a tangtung sak ding uh; na hukna ka tawpsak ding a, loh leng na pe ta kei ding hi.

⁴²Huchi in ka hehna na tung ah ka lungdam sak ding a, k’on mullitna a daita ding, ka daidide dia, ka heh ngei nawn kei ding hi.

⁴³Na tuailai nite na theihgige louh a, hiai thilte a n’on vuisak zawk ziak in ngai in, na tatdan dan, na tung ah ka tun ding, chih TOUPA Pathian thupawt ahi: huan na kihhuaina tengteng behlap in hiai hukna na hih nawn kei ding.

⁴⁴Ngai in, paunak zang peuhmah in hiai paunak a zang ding uh, A tanu in a nu a sun, chih.

⁴⁵Na nu, amah pasal leh tate mudahnu tanu na hi a, ki tanauna lam ah bel, amah pasal leh tate mudahnu tanau na hi: na nu Hit mi ahi a, na pa Amor mi ahi.

⁴⁶Huan, na tanau, na u bel Samaria, na veilam a teng amah leh a tanute toh ahi uh; na tanau, na nau, na taklam a teng Sodom leh a tanute ahi uhi.

⁴⁷Himahleh amau omdan na zuikei a, a kihhuaina bang uh na hih keina a, na omdan tengteng a na thulimlouh zawkdan ngaihtuah in huaite bangmah tham ahi kei hi.

⁴⁸A hin a ka hin sungteng, chih TOUPA Pathian thupawt ahi, nang leh na tate’n a hih bang uh na tanau Sodom leh a tanute’n leng a hih hetkei uh.

⁴⁹Na tanau Sodom thulimlouhna hiaite ahi: kisaktheihna, nekvah luatnate, amah leh a tanute nuamtat mawkmawkte ahi, mi gentheite leh tasamte a panpih tuan sam kei uh.

⁵⁰Huan mi uang ahi ua, ka ma a thil kihhuai hihsa ahi uh; huchi in hoih ka sak bang in ka hihmangta ahi.

⁵¹Samaria in na khelhna kimkhat leng a hih sam kei; amau sang a na kihhuainate na nak hihzawk ziak in na hihsa na kihhuaina tengteng in na sangamnute siam na tangsak hi.

⁵²Na sanggamnute dikzaw a na suklat ziak in nangmah in na zahlakna na puak ding ahi; amau sang in thil kihhuai uangzawte na hih a, na khelhnate ziak in amau nang sang in a diktat zaw uhi; ahi, na sanggamnute siam na tansakna ah nang anen aham in zahlakna na tang ding ahi.

⁵³Huan a omdan uh, Sodom leh a tanu omdante, Samaria leh a tanu omdante, amaute toh ton in nang omdan mahmah ka hei ding.

⁵⁴Amau dia lungmuanna nana hih sekna a na thilhihsa tengteng ziak a na zum theihna ding in.

⁵⁵Huan na sanggamnute, Sodom leh a tanute, Samaria leh a tanute a omdan uh masa bang in a omnawn ding ua; nang leh na tanu leng na omdan uh masa bang in na omnawn ding uh.

⁵⁶Na thulimlouhna muh khiak a hih ma a na kihihthupi nite in na sanggamnu Sodom na kamse khuahna ahi sek kei maw?

⁵⁷Tun zaw Suria tanu leh a kim a mi tengteng, Philistia tanute na kim a hon simmawh mite’n a hon genseta uhi.

⁵⁸Na hukna leh na kihhuaina na paw zel ahi, chih TOUPA thupawt ahi.

⁵⁹Huchi in TOUPA Pathian in hichi in a chi: Thukhun bohsia in thuchiam na khawksak louhdan bangzel in na tung ah ka hih teisin ahi.

⁶⁰Himahleh na naupanlai a na kiang a ka thukhun ka theigige ding a, na kiang ah tangtawn thukhun ka bawl ding hi.

⁶¹Huchi in na sanggamnute ka pom hun chiang in na omdante na honthei khe ding a, na kizumpih ding: amau lah na tanu ding in ka honpia hi, na thukhun ziakbel hilou in.

⁶²Na kiang a ka thukhun ka hihkip ding a, TOUPA ka hi chih na theita ding uh.

⁶³Na thilhih tengteng k’on ngaihdam vek hun chiang in na theihgigena na zum ziak a na kamkat mahmah nawn louhna ding in, chih TOUPA Pathian thupawt ahi.