Read Paite Chin EZEKIEL 17 Bible Online

EZEKIEL 17 - Paite Chin bible

EZEKIEL 17

¹TOUPA thu ka kiang ah a hongtung a, ka kiang ah,

²Mihing tapa, Israel inkawte kiang ah thuhaksa bawlkhia inla, gentehna in gen in,

³TOUPA Pathian in hichi in a chi ahi, chi in: Muvanlai lianpi, kha zapi, khaveng saupi gial em um, mul bittak Lebanon tang ah a leng a, Sidar sing zik a tuah hi.

⁴A hiang ziknou pen a kitan a, mi vialvakna gam ah a lenpih a, sumsinna khopi ah a phut hi.

⁵Huai gam haichi leng a tuah a, leihoih ah a pawi pou a, tui tampi gei ah a phut a, nahkai sing bang in a phut hi,

⁶Huan a khang a, grepgui niam bilbial a honghi a, selte a honsuah a, a hiangte a hong dawnta hi.

⁷Muvanlai lianpi dang a om nawn a, kha zapi leh mul bittak a nei tei a, ngai in, hiai grep kung amah lam ah a zung a zam a: a suanna mun a kipan in amah lam ah hiangte a pou khia a, amah tui a a vak theihna ding in.

⁸Hiangte a suah a, grep hoihtak a hih theihna ding in tui tampi gei a lei hoih a phuh ahi.

⁹TOUPA Pathian in hichi in a chi ahi: A piching den dia hia? A vuai maimah theihna ding in a nahte satkhia in, a zung toh a botkhe kei dia hia? Anah selthak tengteng in leng a vuailoh ding; a zung toh botkhe ding in thilhihtheihna thupitak hiam, muvanlai tampi a kiphamoh tuankei dia hia?

¹⁰Ahi, ngai in, phuh hileh leng a piching den dia hia? Suahlam huih in a honnuai hun chiang in a vuai khin maimah kei dia hia? A pouna mun mah ah a vuai maimah ding chi in, a chi a.

¹¹TOUPA thu ka kiang ah a hongtung nawn a, ka kiang ah,

¹²Helhat inkawte kiang ah gen in, hiai thil omdan a theikei ua hia? Hilh in, ngai un, Babulon kumpipa Jerusalem ah a hongpai a,

¹³A kumpipa uleh a heutu uh a man a, amah kiang ah Babulon ah a pi a, a kumpipa uh suan khat a man a, thukhun a bawlpih a, thu a chiam teitei a, gam a miliante a pimang vek a,

¹⁴A lalna gam a keniam a, amah a a dinkhiak theih nawn louhna ding in a thukhun lenkawm kia a a din theihna ding in.

¹⁵Himahleh sakolte leh mi tampi honsawl ding a ngen ding in Aigupta gam a palai sawl in a tung ah a helta hi. A lohching ding hia? Hichibang hihmi a suakta ding hia? Thukhun hihse ngal in a pawtkhe thou ding hia?

¹⁶A hin a ka hin laiteng, chih TOUPA Pathian thupawt ahi; kumpipa, kumpipa dia bawlpa tenna ngei ah a kichiamnate musit leh, a thukhunte bohsia a, amah kiang mahmah ah Babulon ah a si ding hi.

¹⁷Mi tampi hihlup ding a mualpawngte leh kulhte a bawl hun chiang un leng Pharo sepaih hon leh pawl thupi mahmah leng bangmah a hihsak theikei ding uhi.

¹⁸Thukhun bohsia in kichiamna a musitta ngal ua: thu a kichiam nung in hiai thil tengteng a hih nawn a, a suakta peuhmah kei ding hi.

¹⁹Huaiziak in TOUPA Pathian in hichi in a chi ahi: ka kichiamna a musit a, ka thukhun a bohsia a, a hin a ka hin laiteng, amah tung ah ka bung ngeingei ding hi.

²⁰Len in ka khuh ding a, ka thang ah a awk ding a, Babulon ah konpi ding a, huchi in a bohsiatna, ka tung ngei a a bohsiatnate ziak in amah ka sual ding.

²¹Huan a pawl tengteng a taikekte tengteng namsau in a si ding ua, a omlaite kawlmong chih ah a dalh ding uh: huan kei TOUPA’N ka genta chih a thei khe ding uh.

²²TOUPA Pathian in hichi in a chi ahi: "Sidar sang mahmah dawn ken ka la ding a, ka phut ding; a zikpi pen a ziknou ka khiak ding a, tang sang kidoh ah ka phut ding.

²³Israel sanna tan ah kaphut ding a, hiangte a hong sel ding ua, a hong gah ding, sidar thupitak ahi ding; a nuai ah tungleng vasa chichih a teng ding ua, a hiang limte ah a om ding uh.

²⁴Huan gam sing tengteng in kei TOUPA’N sing sangte ka niamsak a, sing niamte ka sangsak a, sing hingte ka keusak a, sing keute ka hingpha sak a, ka chi nalai hi, a chi hi. Kei TOUPA'N ka genta a. Ka gen bang in ka hih ding hi.