Read Paite Chin EZEKIEL 18 Bible Online

EZEKIEL 18 - Paite Chin bible

EZEKIEL 18

¹TOUPA thu ka kiang ah a hongtung nawn hi:

²Israel gam tungtang a hiai paunak a zat uh bang chihna ahia, Pate’n grep thuk a ne ua, a tate uh ha a zau hi, chih?

³A hin a ka hin laiteng, Israel ah hiai paunak zat nawn chih na neikei ding uh, chih TOUPA Pathian thupawt ahi.

⁴Ngai un, hinna tengteng kei avek ahi, pa hinna kei a a hih bangmah in tapa hinna leng kei a ahi: kha khial peuhmah a si ding.

⁵Himahleh mi a diktat a, siang leh dik a hih a,

⁶Mun sangte a nelou a, Israel inkawte milim lam nga samlou a, numei kizen lou leng naih lou a, kuamah tung a thil hihkhial lou a,

⁷leibami thil khamna koih penawn zaw a, kuamah hiamgam a loklou a, gilkial kiang a nekding pia a, vuaktang puansilh sak a;

⁸a pung delh ding a leitawi saklou a, a sumpung leng la sam lou a, thil gilou hihdia a khut kidek a, mi leh mi kikal a diktak a vaihawmsak a;

⁹Ka dan bawlte zui a, diktak a hih a, ka vaihawmnate a zuih leh, mi diktat ahi a, a hing ngei ding chih TOUPA Pathian thupawt ahi.

¹⁰Himahleh tapa guktak ching a suan a, sisan suahmi a hih a, hiai bang a hih a,

¹¹A hih ding zaw pen a hihlouh a, munsangte a a nek zawk a, invengte zi a hihbuah a,

¹²Genthei leh tasamte a simmawh a, a loh a, a khamna koih a piak louh a, milimte lam a nga a, thil kihhuai a hih hi.

¹³A pung delh a a piak a, apung a lakleh, a hing ding hia? A hing hetkei ding; hiai thil kihhuai tengteng a hihta a, a si ngeingei ding, amah sisan mawh a puak ding ahi.

¹⁴Huan, ngai in, tapa na nei tei taleh, a pa thil gilou hihsa tengteng a muh a, lau a,

¹⁵Huchibang a hih teitei louh a, mun sang a a neklouh a, Israel inkawte milim lamte a ngatlouh a, invengte zi a hihnit louh a,

¹⁶Kuamah tung a thil a hihkhelh louh a, khamna koih bangmah la lou a, kuamah lok lou a, gilkialte nekding pe zaw a, savuakte a silhsak a;

¹⁷Genthei lak a a khut a kidek sak a, a nou leh a pung lalou a, ka thupiakte zang a ka dan bawlte zuimi ahihleh, a pa thulimlouhna ziak in a si kei ding a, a hingzaw ngei ding hi.

¹⁸A pa bel kheltak a mi a nuaisiah a, a unaupa hiamgam a sual a, a mite lak a thil hoihlou a hih ziak in, ngai in, a thulimlouhna ziak in a si ding ahi.

¹⁹Himahleh, Bangdia tapa in a pa thulimlouhna thuaklou ding, na chi nak uh? Tapa in dan a zuih a thil kizen a hih a, ka dan bawl tengteng a zuih a, a hih lai leh, a hing ngeingei ding hi.

²⁰Kha khial a si ding: tapa in a pa thulimlouhna a thuak kei ding a, pa in leng tapa thulimlouhna a thuak sam kei ding; mi diktat diktatna amah mah tung ah a om ding, migilou gitlouhna amah mah tung ah a om ding hi.

²¹Himahleh, migilou in a khelhna hih tengteng a lehngatsan a, ka dan bawlte a zuih a, dan zui a thil diktat ahihleh a hing ngei ding, a si kei ding.

²²Tatlekna a na hihsa theihsak ahita kei ding: a na hihsa a diktatna ah a hing ding,

²³Migilou sihna ah kipahna ka nei ahia? A lampite a lehngatsan a, a hinna zaw pen lou? chih TOUPA Pathian thupawt ahi

²⁴Himahleh mi diktat in a diktatna lampi a lehngatsan a, thulimlouhna a hih a, migiloute hih bangzel a thil kihhuaite a hih in a hing dia hia? A thil diktat hihsa bangpeuh leng theih gige ahi nawnta kei ding a, a tatlekna hih ah leh a khelhna hih ah, huai mahmah ah a si ding hi.

²⁵Himahleh, TOUPA hihdan a kibang gige kei hi, na chi sek uh. Israel inkawte aw, ngai un: ka hihdan a kibang gige kei maw? Na hihdan uh a kibang kei gige zaw ahi kei maw?

²⁶Mi diktat in a diktatnate a lehngatsan a, thulimlouhnate ahihleh huai ah a si ding a, thulimlouhna a hih ah a si ding.

²⁷Huailou leng, migilou in a khelhna a hihsate lehngatsan a, dan a zuih a, thil diktat ahihleh a hinna a humbit ding.

²⁸A kingaihtuah a, a tatlekna a hihsa tengteng a lehngatsan ziak in a hing ngei ding, a si kei ding hi.

²⁹Himahleh Israel inkawte’n, TOUPA hihdan a kibang gige kei, a chi uhi. Aw Israel inkawte aw, ka hihdante a kibang gige ahizaw kei maw?

³⁰Nou hihdante bel a kibang kei gige zaw ahi kei maw? Huaiziak in, aw Israel inkawte aw, michih, noumau hihdan bangzel in vai k’on hawmsak ding a, chih TOUPA Pathian thupawt ahi. Kihei unla, na tatlekna tengtengte uh lehngatsan un: huchi in thulimlouhna na puksiatna uh ahi kei ding hi.

³¹Na tatlekna tengteng uh, na tatleksate uh paimang vek unla, lungtang thak leh lungsim thak kibawl un: Bang ding in na si ding ua oi, aw Israel inkawte aw?

³²Mi sihna ah kipahna mahmah ka neikei a, chih TOUPA Pathian thupawt ahi: huaiziak in kihei unla, hing un.