Read Paite Chin EZEKIEL 19 Bible Online

EZEKIEL 19 - Paite Chin bible

EZEKIEL 19

¹Huailou in leng Israel heutute tungtang ah sunna la phuah ahi:

²Na nu bang ahia a hih? Humpinelkaipi ahi; humpinelkaite lak ah a kual a, humpinelkai lunlaite lak ah a noute a vaklian a.

³Huan a noute lak ah khat a vaktei a; humpinelkai lunlai a honghi: samat a siam a, mite a negai hi.

⁴Namte’n leng a tanchin a za ua: a kawkhuk uah mat in a om: huan Aigupta gam ah sikkawiin amah a pi ua.

⁵Huchi in a ngak a, a lametna a vuaksuak chih a theih in, a noute lak ah a khat a la a, humpinelkai lunlai in a bawl hi.

⁶Humpinelkai lak ah a paisuk paitou, humpinelkai lunlai a honghi: samat a siam a, mite a gai hi.

⁷A innpi sesate uh a thei a, a khopite uh a hihgawp a, gam a segawp a, a humham husa ziak in, huai a tengteng.

⁸Huchi in bialte a kipan in ningchih a namte’n amah a dou ua: a tung ah a len uh a zak ua; a kawkhuk uah mat in a omta hi.

⁹Sikkawite in bawm sung ah a koih ua; Babulon kumpipa kiang ah a pi ua; kulh muanhuaite sung ah a pi lut ua, huchi a Israel tangsangte tung a aw a kizak nawn louhna ding in.

¹⁰Na nu na sisan a grepgui bang ahi, tuite kiang a suan: tui tampite ziak in gahthei leh hiangte in a dim.

¹¹Huan vaihawmna pawte lalchiang sikchiang khauh a nei in, nah bawk pha lak ah a sandan uh hihsang in a om hi, huchi in a hiang tampite utoh sangpi a muh in a om uhi.

¹²Himahleh thangpaihna a bohkhiak in a om a, lei a paih in a om a, suahlam huih in a gah a mutkeu: a kung khauhte a kitan a, a keu; mei in a maute a kang beita.

¹³Huan tuin gamdai ah, gamkeu leh tui omlou ah phuh in a om,

¹⁴Huchi in a hiang a sikchiang apan mei a paikhia, a gah a hulbei a, huchi in amah ah vaihawm ding in lalchiang ding sikchiang khauh a omkei hi. Hiai kahla ahi, Kahla a ding a sak ahi ding hi.