Read Paite Chin EZEKIEL 2 Bible Online

EZEKIEL 2 - Paite Chin bible

EZEKIEL 2

¹Huan ka kiang ah, Mihing tapa, na khe in ding in, na kiang ah thu ka gen ding hi, a chi hi.

²Ka kiang a thu a genlai in kha kei ah a honglut a, ka khe in a hon dingsak a, huchi in kei hon houpihpa ka ngaikhia hi.

³Ka kiang ah, Mihing tapa, Israel tate kiang ah, helhat nam, ka tung a helnakte kiang ah k’on sawl hi: amau leh a pipute un leng hiai ni pha nangawn in ka tung ah a talek uhi.

⁴Suan paupeng leh genhakte ahi ua, a kiang uah nang k’on sawl hi; a kiang uah, “TOUPA Pathian in hichi in a chi” na chi ding ahi.

⁵Huchi in amau a ngaikhia uhiam, a ngaikhe kei uhiam, helhat a inkuan hi ua, a lak uah zawlnei a om chih a theigige ding uhi.

⁶Nang, mihing tapa, amaute kihta kenla, a thu uah leng lunglel sam ken, na kiang ah khaulingnei leh loulingneite om in, aikam lak a teng himah lechin: helhat mi himahle uh, a thu uh kihta kenla, a latdan uah leng lunglel sam ken.

⁷A ngaikhia uhiam, a ngaikhe kei uhiam, a kiang uah ka thu na gen ding ahi: helhat inkuan ahi uhi.

⁸Himahleh nang mihing tapa, na kiang a ka gen ngaikhia in; mi helhat inkuan bang in helhat kenla: na kam ka inla, ka honpiak ne in, a chi hi.

⁹Huan ka en a ngai in, khut in a honsawk a, ngai in huai ah laibuzial a om hi;

¹⁰Ka ma ah a phalh a, a sunglam leh a pawlam gelh ahi; kahna, lusunna leh tunggikna gelhna a om hi.