Read Paite Chin EZEKIEL 20 Bible Online

EZEKIEL 20 - Paite Chin bible

EZEKIEL 20

¹Hichi ahi a, kum sagihna, kha ngana, huai kha ni sawm ni’n Israel Upa kuate hiam TOUPA thu dong ding in a hongpai ua, ka ma ah a tu uhi.

²Huan TOUPA thu ka kiang ah a hongtung a, ka kiang ah,

³Mihing tapa, Israel upate houpih inla, a kiang uah, TOUPA Pathian in hichi in a chi ahi: Kei thudong dia hongpai na hi uh hia? A hin a ka hin laiteng, noute thudot in ka omkei ding, chih TOUPA Pathian thupawt ahi, chi in.

⁴Amau na hawmsak kei dia hia? Mihing tapa, hawmsak tanla, a pate uh kihhuainate theisak in;

⁵Huan a kiang uah, TOUPA Pathian in hichi in a chi hi: Israelte ka tel ni a Jakob inkawte telte kiang ah banzak hial a Aigupta gam a a kiang ua ka kitheihsak a, a kiang ua ka khut ka zak a, Kei TOUPA na Pathian uh ka hi, ka chi hi.

⁶Huai ni a Aigupta gam a kipan pikhia a, amah adia gam kham, nawitui leh khuaizu a luanggam, gam tengteng a kilawmpen a pilut ding a ka khut ka zak ni’n a kiang uah.

⁷Michih in na mit ua muh thil kihhuai paimang unla, Aigupta gam a milimte in kihihnin kei un, kei TOUPA na Pathian uh ka hi hi, chi in ka gen hi.

⁸Himahleh, ka tung ah a hel ua, hon limsak kei ua, michih in a mit ua muh thil kihhuaite leng a paimang kei ua, Aigupta milimte leng a lehngatsan sam kei uh: Huai ah a tung ua ka hehna lungdamsak ding in Aigupta gamsung ngei ah a tung uah ka hehna ka leihbaw kei na diam, ka chi hi.

⁹Himahleh, keimah min ziak in ka gamtang zawta a, a omna namte uh mitmuh in Aigupta gam a kipan pikhia in a kiang uah ka kitheisak a, huai namte mitmuh in ka min gensiat a a omlouhna ding in.

¹⁰Huchi in Aigupta gam pawtsan ding in ka chita a, gamdai ah ka hon pilutta hi.

¹¹Ka dan bawlte amaute ka pia a, ka thugelhte ka ensak a, huai tuh min a zuih ua a hinna ding un.

¹²Huailou leng kei leh amaute kikal a chiamtehna ding in ka khawlnite amau ka pia a, kei TOUPA, amaute koihtuampa ka hi chih a theihtheihna ding un.

¹³Himahleh Israel inkawte gamdai ah ka tung ah a hel ua, ka danbawlte a zuikei ua, ka thugelte, min a hih a a hinna dingtak uh a paikhia ua, ka khawlni nakpitak in a bohsia ua; Huchi in gamdai ah amau hihmang ding in ka hehna a tung uah ka leih keina diam aw, ka chi hi.

¹⁴Ka pikhiak lai in a theimite nam mahmah mitmuh a hihsiat a a omlouhna ding un ka min ziak in ka gamtang zawta hi.

¹⁵Huailou in huai gamdai ah ka gam piak, nawitui leh khuaizu a luang gam, gam tengteng a kilawmpen ah ka pilut kei ding, banzak hial in ka chi hi.

¹⁶Ka thugelhte a paikhia ua, ka dan bawlte a zuikei ua, ka khawlnite a bohsiat ziak un: a lungtang un a milimte uh a zui uhi.

¹⁷Himahleh hihmanglou ding in ka mit in a muh maihta a, gam ah leng ka hihmang vekta kei hi.

¹⁸Huan gamdai ah a tate uh kiang ah, Na pate uh dan bawl zuikei unla, a thugelte uh zuikei unla, a milimte un kihihnin sam kei un;

¹⁹Kei TOUPA na Pathian uh ka hia, ka dan bawlte zui unla, ka thugelte vom unla, zui un:

²⁰Ka khawlni tang unla, kei leh noute kikal a chiamtehna ahi ding a, TOUPA na Pathian uh ka hi chih na theihna ding un ka chi hi.

²¹Himahleh a tate uh ka tung ah a hel ua, ka dan bawlte a zuikei ua, ka thugelte, min a hih a a hinna ding tak, zui ding in a vom sam kei uh; khawlni a bohseta ua; Gamdai ah ka hehna lungdamsak ding in a tung uah ka hehna ka leih kei na hiam ka chi hi.

²²Himahleh ka khut ka kideksak a, ka pikhiak lai a theimite nam ngei mitmuh a hihsiat a a omlouhna ding un ka min ziak in ka gamtang zawta ahi.

²³Huailou leng, namte lak ah amau ka dalhsak ding a, gamchih ah ka thelthang sak ding, gamdai ah banzak hial in ka na chi hi.

²⁴Ka thugelte a zuikei ua, ka dan bawlte a paikhia ua, ka khawlni a bohsia ua, a pate uh milim lam a ngat ziak un,

²⁵Huailou leng, dan bawl hoihlou ka pia a, a hin louhna ding ua thugelte toh;

²⁶A thiltan uh, sul hong tengtengte’n mei a a paihna uah amaute ka hihnin a, ka lungzuang sak a, a tawp a TOUPA ka hi chih a theihna ding un.

²⁷Huaiziak in mihing tapa, a kiang uah thu gen inla, a kiang uah, TOUPA Pathian in hichi in a chi ahi: Na pate un hiaite ah a hon gense lailai uh ahi, ka tung a tatlekna thil ahihte uah.

²⁸Banzak hial a amaute ka chiam gam ah k’on pilut in, tang sang leh singbuk lian a muh peuhmah uah a kithoihnate uh a lan ua, a thillat uh hehhuai mahmahte a pia uh. A gimlimte uh a bawl ua, a dawn ding thillatte uh a bungkhia uh, chi in.

²⁹Huchi in ken a kiang uah, munsang a na hohnak uh bang na chihna uh ahia? ka chi a; huchi in a min ading in tunitan in, Bamah, chih ahita hi.

³⁰Huchi in Israel inkawte kiang ah gen inla, TOUPA Pathian in hichi in a chi ahi: Na pate uh bangzel in noumau na kihihnin un a kihhuaina bang un hupmang na hi ding uh maw?

³¹Na thil tan uh na lan un, na tate uh mei ah na pai ua, tunitan in na milimte tengteng un na kihihnin uh ahi kei maw? Noute thudot ding ka hi ahia, aw Israel inkawte aw? A hin a ka hin laiteng noute thudot in ka omkei ding, chih TOUPA Pathian thupawt ahi.

³²I kim ua namdang pautuam mite bang a singbul suangbul be ding i hi uh, na lungsim un na chi ua, na hi hetkei ding uh.

³³A hin a ka hin laiteng, khut thagui hattak in, banzak kawm leh heh suah in na tung uah vai ka hawm ngeingei ding, chih TOUPA Pathian thupawt ahi.

³⁴Namte lak a kipan k’on pikhe ding a, dalhsak a na omna gam ua kipan khut hattak leh banzak leh hehsuah in k’on pikhawm ding.

³⁵Pau tuam mite gamdai gam ah k’on pilut ding a, ki maituah in i kisual ding uh,

³⁶Aigupta gam gamdai a na pate uh ka sual bangtak in nou leng k’onsual ding, chih TOUPA Pathian thupawt ahi.

³⁷Chiang nuai ah k’on lutsak ding a, thukhun delhkhumna nuai ah k’on pilut ding hi;

³⁸Huan na lak ua kipan mihelte leh ka tung a talekmite ka khuahsiang ding a, a omna gam ua kipan in ka pikhe ding a, himahleh Israel gam ah a lut hetkei ding uh: huchi in TOUPA ka hi chih na thei ding uh.

³⁹Noute ahihleh, Aw Israel inkawte aw, TOUPA Pathian in hichi in a chi ahi: Ka thu na ngaihkhiak kei uleh tunung chiang in na milim na uh semchiat maita unla; himahleh ka min siangthou bel na thilpiakte uleh na milimte un na hihninta kei ding uhi.

⁴⁰Ka tang siangthou, Israel sanna tang ah, huai ah Israel inkawte tengteng in avek un, huai gam ah ka na a sem ding uh; huai ah amaute ka pakta tadia, huai ah na thillatte uh na thilpiak hoih tatate uh, na thil tan tengteng uh ka deihta ding.

⁴¹Namte lak a kipan k’on lakkhiak hun chiang in leh gamchih a na dalhna ua kipan k’on pikhawm hun chiang in, gimlim ding in noute k’on sangta ding a, namte mitmuh in noute ah ka sianthou dan a langta ding, TOUPA Pathian in a chi hi.

⁴²Huan Israel gam, banzak hial a na pate uh piak ka chiam gam a noute k’on pilut hun chiang in TOUPA ka hi chih na thei ding uh,

⁴³Huan huai ah na omdante uleh na thilhih uh, na kihihnitna tengteng uh na theita ding uh; huchi in na thil hoihlou hih tengtengte uh ziak in noute mitmuh ngei in na kihta ding uhi.

⁴⁴Na omdan hoihloute uh bang hilou a, na thilhih uh thulimloute bang leng hi samlou a, ka min ziak a noute k’on pichinsak hun chiang in, aw Israel inkawte aw, TOUPA ka hi chih na theita ding uh, chih TOUPA Pathian thupawt ahi, chi in.

⁴⁵TOUPA thu ka kiang ah a hongtung a, ka kiang ah,

⁴⁶Mihing tapa, simlam masuan inla, simlam nga in na thukhah inla, simlam gammangpi lam ah thu gen inla,

⁴⁷simlam gammangpi kiang ah, TOUPA thu ngai in, TOUPA Pathian in hichi in a chi ahi: Ngai in, nang ah mei ka toh ding a, nang a sing hing tengteng a kang bei ding a, sing keu peuhmah leng: mei kuang luahluah a dai kei ding, sim a kipan a mal tan in, matuah teng a kangvom ding hi.

⁴⁸Huan mi tengteng in kei TOUPA meikhahpa ka hi chih a mu ding ua, a mit kei ding, chi in, a chi hi.

⁴⁹Huchi in ken, “Ah! TOUPA Pathian, Gentehna thugenmi lel ahi a honchi kei dia” ka chi hi.