Read Paite Chin EZEKIEL 21 Bible Online

EZEKIEL 21 - Paite Chin bible

EZEKIEL 21

¹Huan, TOUPA thu ka kiang ah a hongtung a, ka kiang ah,

²Mihing tapa, Jerusalem maituah inla, a Mun Siangthou lam nga in na thu gen inla, Israel gam tung ah thu gen in;

³Israel gam kiang ah, huchi in TOUPA’N a chi ahi: Ngai in, ka hondou ahi, ka namsau a pai a kipan ka phawi ding a, na lak ua mi diktat leh diktatlou kibang sap in ka phuk ding.

⁴Huchi in na lak ua mi diktat leh diktatlou ka phuk ding ziak in ka namsau a pai a kipan a pawt ding a, simlam a kipan mallam pha in mihing tengteng a phuk ding hi.

⁵Huchi in, mi tengteng in, kei TOUPA’N ka namsau a pai a kipan ka phawi ahi chih a thei ding uh, a kikhum ngei nawnta kei ding hi.

⁶Huaiziak in nang mihing tapa, thum huthut inla khasetak in a mit muh un thum in.

⁷Huan, “Bangdia thum na hia?” a hon chih uleh, “Thu thang ziak in ahi, a hongtung sin ngal a, huai hun in lungtang chiteng a zul ding a, khut tengteng a zaw ding a, lungsim teng a bah ding a, khuk tengteng tui bang in a zaw ding a; ngai in, a hongtung hi, a tangtun ding, chih TOUPA Pathian thupawt ahi” chi in, a chi hi.

⁸Huan TOUPA thu ka kiang ah a hongtung a: ka kiang ah,

⁹“Mihing tapa, thu gen inla, huchi in TOUPA’N a chi ahi:

¹⁰Namsau, namsau tat-hiam ahita, tetsak ahita, mi satna ding a tat-hiam ahita, tetsak ahi, khophia bang in! I nuamsa lailai ding maw? ka tapa, chiang na simmawh, sing a bawl peuhmah toh.

¹¹Tetsak ahi, leh ding in ahi namsau tat-hiam tetsak ahi, thatmi khut a tuang ding in.

¹²Mihing tapa, kikou inla; sehal ham inla, ka mite tung ahi ngal a; Israel mi liante teng tung mahmah: piak ahi ua, ka mite toh, namsau nuai ah; huaiziak in kikou inla, na pheipi beng in.

¹³Hiai namsau midang tung a chiamtehsa ahi ngal a, na ngaihsak kei hita leh bang suak ding chih TOUPA Pathian thupawt ahi hi.”

¹⁴Huaiziak in nang, mihing tapa, khut beng hial in thu gen in; thah a om dingte ading namsau nihvei liksuk in om hen, ahi, thumvei; tampi thahna ding namsau ahi:

¹⁵Lungtang zul, a pukna uh a punna ding in, namsaute kong biang teng ah ka giaksak hi; Ah! khophia bang in a te zolzol, sihna namsau.

¹⁶Nakpi’n gamtang in, taklam ah, gamtang in veilam ah leng van zel inla, na mazawn peuhmah ah leng.

¹⁷Ken leng khut ka beng ding a, ka tangtun ngei ding, ka hehna, kei TOUPA’N hiai ka genta hi, chi in, a chi hi.

¹⁸TOUPA thu ka kiang ah a hongtung nawn a, ka kiang ah,

¹⁹Mihing tapa, Babulon kumpipa namsau hongtun theihna ding in lampi nih nabawl in; huai lampi nihte gam khat a kipan in a hong pawtkhe ding uh ahi: lampi kawkmuhna bawl inla, khopi lutna khomual ah bawl in.

²⁰Lampi Ammon mite khua Rabath namsau hongtunna ding in sep inla, Judah gamlai Jerusalem kulh ah leng.

²¹Aisan ding in Babulon kumpipa lampi ka ah ading a, lampi nih kigawmna tak ah; thalte a sing loklok a terephim a dong a, sa sin a en hi.

²²A aisanna ah a khut taklam ah Jerusalem a na tuang a, kulh suksiatnate galsual awng zuazuate, kongpi zawn a kulh suksiatnate, mual pawng sunte, kulh bawlte toh.

²³Aisan vuaksuak lel bang ahi a, himahleh mat a a omna ding ua a thulimlouhna uh theihkhiakna lel ding ahi.

²⁴Huaiziak in TOUPA Pathian in hichi in a chi ahi: na thulimlouhna uh theihgigena dia na bawl ziak un na tatleknate uh a hong kilang, na thilhih tengteng uah na khelhnate uh a kimu kilkel a, theihkhiak na hong hihtak ziak un khut a mat na honghi ding uhi.

²⁵Huan, nang, Israel heutu, migilou si ding a liampa, na gitlouhna gawtna tawp ni a hongtung e;

²⁶TOUPA Pathian in hichi in a chi: Heutu lukhu paihsak unla, lallukhu suhsak un, hiai a ngei in a omkei ding: mi vuallelte tawisang unla, mi liante vuallel sak un:

²⁷Ka lumlet ding, ka lumlet ding, ka lumlet ding; hiai leng a ngei in a omkei ding, a neimi tak ding a hongpai mateng amah ka pe ding hi.

²⁸Huan nang mihing tapa, thu gen inla, hichi in chi in: TOUPA Pathian in Ammon tate tungtang ah leh a gensiatna thu uah hichi in a chi ahi: Namsau, namsau phawi ahita, mi thahna ding leh hihmanna ding khophia bang a tetsak ahita.

²⁹Kilakna taklou nang a hon musak ua, zuau in ai a hon sansak ua, Namsau bel migilou si ding a liam, a gitlouhna ni uh tawp hongtung dingte ngawng ah na golh ding, a honchih un a zuau uh ahi.

³⁰A pai ah thun in, Na pianna siam a na omna gam ngei ah na thu ka ngaihtuah ding.

³¹Na tung ah ka hehna ka sung dia, ka thangpaihna mei na tung ah ka toh ding, mi nunse tak, hihman siamtak khut ah k’on mansak ding.

³²Mei a khul ding na hi ding a, gamlai ah na sisan a baw ding a, theih mahmah na hita kei ding, kei TOUPA’N ka genta ngal a, chi in, a chi hi.