Read Paite Chin EZEKIEL 22 Bible Online

EZEKIEL 22 - Paite Chin bible

EZEKIEL 22

¹TOUPA thu ka kiang ah a hongtung a, ka kiang ah,

²Nang mihing tapa, sisan suahhat khopi na langsin ahia? Na langsin ahia? A kihhuaina tengteng theisak dihve:

³Huan a kiang uah, TOUPA Pathian in hichi in a chi: khopi, a hun hongtunna ding a amah sung a sisan suah leh amah kihihnin ding a milim bawl:

⁴Na sisan suahna ah mawhna na pua a, na milim bawl ah na kihihnin ahi; na hunte na naisaka, na kumte na tung phialphiala; huaiziak in namte kiang ah gensiat ding leh gam tengteng engbawl ding in k’on bawl ahi.

⁵Na naih a mi leh na gamlata mite’n a hon simmawh ding ua, nang, minsiat pua leh buaina a dim mi:

⁶Ngai in, Israel heutute michih in a thilhihtheihna bangzel ua sisan suah mai ding in nangmah ah a om uhi.

⁷Nang ah min nu leh pate a musit ua, nang ah mikhualte a nuaisiah ua, nang ah tagahte leh meithaite a mawkbawl uh.

⁸Ka thiltante na musit a, ka khawlnite na bohsia hi.

⁹Nang ah sisan suah ding in mi hekhatte a om ua, nang ah tangsang a nete a om ua, nang ah hukna a ching uh.

¹⁰Nang ah a pate uh vuaktanna lemsak a om ua, nang ah numei kizenlouh lai luppih a om uh.

¹¹Huan min a inveng zi tung ah thil kihhuai a hih a, midang in huktak in a mou a hihnin a, midang in nang ah a sanggamnu, a pa tanu ngei a zahlaksak hi.

¹²Nang ah sisan suah ding in golhna a la ua, a nou leh a pung na la a; na inveng nuaisiah in huaihamtak in na lepguksak hi; kei mahmah leng n’on mangngilh a, chih TOUPA Pathian thupawt ahi.

¹³Huaiziak in, ngai in, na lepgukna thu ah, nang a sisan pawt thu ah khut k’on betkhum ding.

¹⁴Nang k’on sual ni chiang in na lungtang in a thuakzou in na khut a hat thei diam maw? Kei TOUPA ngei in ka genta a, ka hihlai ding.

¹⁵Huan nam lak ah k’on hihdalh ding a, gamchih ah k’on thehzak ding; nang a kipan in na nitnate ka hihmang vek ding.

¹⁶Namte mitmuh in nangmah kihihnin na hi ding, huan, TOUPA ka hi chih na thei ding, chi in, a chi hi.

¹⁷TOUPA thu ka kiang ah a hongtung a, ka kiang ah,

¹⁸Mihing tapa, Israel inkawte ei ading in eksia lel a hong hita ua; avek un haltuina meilai ah dalte, langvate, sikte, suante ahi uh, dangkasik eksia lel ahita uh.

¹⁹Huaiziak in TOUPA Pathian in hichi in a chi ahi: Eksia lel na hong hih ziak un, ngai un, Jerusalem lai ah k’on khawm ahi.

²⁰Dangkasikte, dalte, sikte, suante, langvate haltuina mei a a koihkhawm ua, tuisak ding a a tung a mei a toh bang un ka hehna leh ka thangpaihna ah nou k’on khawm ding, huai ah k’on koih ding a, k’on tuisak ding.

²¹Ahi, k’on khawm ding a, na tung uah ka hehna mei ka toh ding a, a lai ah na tuikhin ding uhi.

²²Haltuina mei lai a dangkasik a tui bang in nou leng, huai lai ah na tuikhin ding uh, kei TOUPA’N na tung uah ka hehna ka sung ahi chih na theita ding uh, a chi hi.

²³TOUPA thu ka kiang ah a hongtung a, ka kiang ah, Mihing tapa, a kiang ah gen inla.

²⁴Gam khuahsiang louh hehna ni chia vuahtui tanglou na hi.

²⁵Humpinelkai in humham a samat a zong bang mai in nang ah zawlnei sawmnate a om ahi: mi hinnate a nekhin ua, goute leh thil manphate a laksak ua, a lai ah meithai tampi a bawl uh.

²⁶A siampute leng nakpitak in ka dan ah a talek ua, ka thil tante a hihnin uh ahi, thiltante leh thil namai a khen kei ua, mite lah thil siangthou leh siangthou lou a khentuan kei uh; ka khawlnite a kitheihmohbawl ua, a lak uah hih minsiat in ka om hi.

²⁷A lai a heutute lah nge duhgawl nekding zong banglel ahi ua, sisan suah a mi hinnate hihmang in ginomlou tak a a lep theihna ding un.

²⁸Huan, a zawlneite’n sunu in bang a nuh ua, kilakna bangmahlou lel a mu ua, zuau in ai a san ua, TOUPA’N bangmah a genlouh in leng, “TOUPA Pathian in hichi in a chi” a chi uh.

²⁹Gam a mipite’n nuaisiah a ching ua, loh a hat ua, ahi, mi genthei leh tasamte a mawkbawl ua, dikloutakin mikhualte a nuaisiah uhi.

³⁰Gam ka hihsiat louhna ding in a lak ua daikai ding leh gamhuma ka ma a pang ding mi ka zong a, ka mu kei hi.

³¹Huaiziak in a tung uah ka hehna ka sungbawta a, ka thangpaihna mei in ka halmangta ahi; a omdan ngei uh a tung uah ka tungsak ahi, chih TOUPA Pathian thupawt ahi, chi in, a chi hi.