Read Paite Chin EZEKIEL 23 Bible Online

EZEKIEL 23 - Paite Chin bible

EZEKIEL 23

¹TOUPA thu ka kiang ah a hongtung a, ka kiang ah,

²Mihing tapa, numei nih, nu khat ta a om uhi.

³Aigupta gam ah a hukmang ua, a tuailai neu ua huk ahi ua, huai ah a angnem uh a zawtsak ua, a tuailai nawi uh a meksak ek uhi.

⁴Khat, a upapen min Aholah ahi a, a sanggamnu bel Aholibah ahi; kei a a hong hita ua, tapate tanute a suang ua. A min uh, Aholah Samaria ahi a; Aholibah bel Jerusalem ahi.

⁵Huan Aholah kei a a hih nung in a hukmang nawn a, a deihtak, invengte, Assuria a nou a;

⁶Ukpipate, vaihawmmite, tangval iplahhuai mahmah ngen, sakol tungtuang mi, puan sandup a kizemte.

⁷Hiai Assuria tangval hoihte tengteng lak ah a kiphalvek ua, a etlahte milim tengteng in a kihihnin nawn behlap hi.

⁸A tuailai neu a kipan a nawite a meksak uh leh a luppih ziak un Aigupta a kipan in a huk a tawp tuankei a, amau leng a hukna uh a tung uah a hih piching uhi.

⁹A deihtakte, Assuria, a nouhnouhte khut ngei ah ka mansak ahi.

¹⁰Hiaite’n a vuaktanna a lemdawk ua, a tanu leh a tapate a laksak ua, amah leng namsau in a that ua, numeite lak ah a kikhemlauna pen uh a hong hita, a tung a gel bang a mualsuahta hi.

¹¹Huan a sanggamnu Aholibah in hiai a mu a, himahleh a u sang in a deihtak nouhnouhna ah a uangzaw in, a hukna a uang semsem lai hi.

¹²Assuria mi, invengte gam ukpipa leh vaihawmpa tangval etlahhuaitak ngen, sakol tungtuangmi, kilawmtaka kivante a nounou hi.

¹³Hihnit in a om chih ka mu a, a nih un lam kibang a tawn uhi.

¹⁴Huchi in a huknate a uangsak sem a, pasal lim bang a tuang, Kaldai mite lim, sanau tak a kizem,

¹⁵A kawng ah kawnggak a gak a, dial kilawm tak khim in, avek ua milian bang in, Kaldai gam, a pianna gam ua Babulon mite bangtakte a muh ziak in.

¹⁶Amau a muhtak in a nounou a, a kiang uah Kaldai pha in mi a sawl hi.

¹⁷Huchi in Babulon mite a kiang ah, kingaihna lupna ah a hongpai ua, a hukna un a hihnin ua, a kihih kihhuai khinta ua, amau amah a nel mahmah uhi.

¹⁸Huchi in a hukna a hihlang a, a vuaktanna a lemsak a, a sanggamnu’n a honnel bang in aman leng a honnelta hi.

¹⁹Himahleh a tuailai a Aigupta gam a a huklai a theihgige ziak in a huktuan semsem hi.

²⁰A angkawmpihte van, sabiltung a bang mai ahi a, a thilpawtte leng, sakolte a thilpawt bang mai ahi.

²¹Huchibang in na tuailai hukna Aigupta min na tuailai nawite a hon khoihsak lai na theikhe nawnta ahi.

²²Huaiziak in, aw Aholibah, hichibang in TOUPA Pathian in a chi ahi; Ngai in, nang hon it, na lungsim in a nelsate ka tamsak ding a, kilchih a kipan ka pikhawm ding.

²³Babulon mite leh Kaldai mi tengteng, Pekodte, Shoate, Koate leh a kiang ua Assuria mi tengteng toh; tangval etlahhuai taktakte, ukpipate, vaihawmmite, avek un mi liante leh minthangte, avek un sakol tung tuang in a hongpai ding uh.

²⁴Galvante, kidouna kangtalaite, kangtalaite leh mipi omkhawmin a hongsual ding ua; lum lian leh lum neu, dal lukhute toh na kim ah a hon um ding ua; a kiang uah vaihawmna ka kemsak ding a, a thugel bangzel un na tung ah a hih tangtung ding uhi.

²⁵Huan na tung ah ka lunghihlouhna ka tungsak ding a, heh mahmah in nang a honsual ding ua, na nakte leh na bilte a tan ding ua, a damsunte namsau in a si ding uh, na tanu leh na tapate a hon laksak ding ua, a damsunte mei in a kanglum ding.

²⁶Na puansilhte a hon hawksaklai ding ua, na kizepna kilawm taktakte a lamang ding uh.

²⁷Na hukna leh Aigupta gam a kipan a na kizuakna a hon tawpsak ding ua, huchi in amau lam ah na mit na lengsak nawn keidia, Aigupta gam na theigige nawn kei ding hi.

²⁸TOUPA Pathian in hichi in a chi ngal a: Ngai in, na huat mahmah, nang hon chimtakte khut mahmah ah k’on mansak ding.

²⁹Huat petmah in a honhaw ding ua, na sepgim gah tengteng a hon laksak ding ua, vuaktang in kihawmkhai in a hon taisan ding uh; na kizuakna vuaktanna, na hukna leh na kizuakna ngei hihlat in a om ding hi.

³⁰Hiai thilte na tung ah a hongtung ding, namdangte delh in na hukmang ding a, a milimte ua na kihihnit ziak in.

³¹Na sanggamnu lampi na tawn sam a, huaiziak in amah nou na khut ah ka honpe ding.

³²TOUPA Pathian in hichi in a chi hi: Na sanggamnu nou thuk leh lian na dawn ding a, nuihsan leh simmawh in na om ding:

³³Khamna leh lungkhamna’n na dim dia, lamdangsakna leh siatna nou, na sanggamnu Samaria nou toh na dawn gai keuhkeuh ding hi;

³⁴Na dawn ding a, a nou leng na tawpsiang vek ding; na sam na botkhe dia, na nawite na ham kek ding; Kei, TOUPA Pathian in ka chita hi.

³⁵Huaiziak in TOUPA Pathian in hichi in a chi ahi: N’on mangngilh a n’on na dal ziak in na hukna leh na kizuakna mawh na paw mai ding hi.

³⁶Huailou leng TOUPA’N ka kiang ah a gen nawn a, Mihing tapa, Aholah leh Aholibah na langsin ahia? A kihhuaina uh a kiang uah phuang in.

³⁷Ang a kawmta ua, sisan a khut uah a bang a, a milim kiang ah ang a kawmta uhi; a tapate uh kei adia a suan uh a kiang ua kangmang ding in mei ah a pai uhi.

³⁸Huailou in leng, ka kiang ah hiai a chi uh ahi; amau mah in ka Mun Siangthou a hihnin ua, ka khawlnite leng a bohsia uhi.

³⁹A milimte uh adia a tate uh a thah nung un, amau mah in ka Mun Siangthou hihnin ding in a lut ua; ngai in, hichibang in ka inn sung mahmah ah a hih uhi.

⁴⁰Huailou leng, gamlapi a mi hong ding in na thukhak ua, mi na sawl ua, ngai in, a hong ua, amau hel in na kisilsiang a, na mit na nuh a, kizephoihna dangte na silh a, lupna thupi tak ah na tu a;

⁴¹A ma ah dohkan na bawl a, ka gimlim leh ka sathaute huai ah na lui hi.

⁴²Huai ah mipi nuamtal husa zak ahi a, mi namai kia lou leng gamdai a kipan in zukhamte a honpi ua, a nih un taute a bun ua, lukhu kilawmte a khu uhi.

⁴³Huan ken, Angkawmnu tek nung a kithuahpih nuam sin un aman a ngap peuhmah diam maw? ka chi hi.

⁴⁴Huchi in kizuak kiang a a hoh bang un a kiang ah a lutta thou ua; huchi in numei huk Aholah leh Aholibah kiang ah a lutta uhi.

⁴⁵Himahleh mi diktatte’n angkawmnute leh sisan suahhat numeite vai a hawm bang un a hawm sak ding ua, angkawmnute a hih ua, a khut ua sisan a ban ziak in.

⁴⁶TOUPA Pathian in hichi in a chi hi: Na tung uah mipi ka kaikhawm ding a, k’on loksak ding a, k’on bawlsak ding hi.

⁴⁷Mihonte’n suang in a deng ding ua, a namsau un a satlum ding ua, a tanute uh, a tapate uh a that ding ua, a innte uh a halsak ding uh.

⁴⁸Hichibang in hukna gam a kipan ka hihmang ding a, numei tengteng in na hukna uh chin louh hial ding ahi chih na theihna ding un.

⁴⁹Huchi in na tung uah na hukna uh a honthuk ding ua, na milim khelhnate uh na thuak ding uh, kei TOUPA Pathian ka hi chih na thei ding uh, a chi hi.