Read Paite Chin EZEKIEL 24 Bible Online

EZEKIEL 24 - Paite Chin bible

EZEKIEL 24

¹Kum kua na, kha sawmna, huai kha, ni sawm ni’n TOUPA thu ka kiang ah a hongtung nawn a,

²Mihing tapa, tuni ni min ngei gelh in; hiai ni in Babulon kumpipa’n Jerusalem a hongsual pan hi.

³Huan helhat Inkawte kiang ah gentehna thu gen inla, a kiang uah, TOUPA Pathian in hichi in a chi ahi;

⁴Sa uina bel suang inla, suang nilouh inla, a sung ah tui sung inla: sabakte kha inla, a sa hoih tengteng, a pheite, a liangte, a guhbawk hoih tata in hihdim in.

⁵Gan honte lak a a hoih tata la inla, a nuai ah singkhuah khul ek inla, sou bolhbolh hen; ahi, a guhbomte ki ui hen.

⁶Huchi in TOUPA Pathian in hichi in a chi ahi: Sisan suahhat khopi, sa ui bel, a sung kanggem, a gem daingei nailou a tung a gik hi: tel tuanlou in, a sa bak khatkhat in thuk in.

⁷A sisan suah amah tung ah a om a, leivui vuh theihna dia lei a sunbuak gentak louh in suangpi keu tung ah a sungbaw zawta hi.

⁸Phula ding a hehna a hong kisak theihna ding in vuh louh in a sisan suah suangpi keu tung ah ka sung ahi.

⁹Huaiziak in TOUPA Pathian in hichi in a chi ahi: Sisan suahhat khopi a tung a gik hi: Kei mahmah in ka vum venvon ding.

¹⁰Sing vum venvon unla, mei chihsa unla, sate ui min unla, satui chiktak in, a guhte leng kangmang hen.

¹¹Huchi in bel a vuak in meivu tung ah suan hi nilouh henla, a hongsa ding a, a dal a hong am ding a, a nitna a hongzul mang ding, a kangkhem a katmang theihna ding in.

¹²Chimtak khop a sual in leng a kangkhem a siang tuankei a, mei in leng a kang siang sam kei hi.

¹³Na nitna hukna ahi a, k’on khuah a, na sian tuanlouh ziak in na tung ah ka hehna ka lungdamsak mateng chikmah chiang in na nitna a kipan khuahsiang na hi nawnta kei ding hi.

¹⁴Kei TOUPA’N ka chita ahi, a hongtung mahmah ding, ken ka hih ding, ka nungkin kei ding a, ka hawi sam kei ding a, ka lunghei sam kei ding; na omdante leh na thilhih bangzel in vai a hon hawmsak ding uh, chih TOUPA Pathian thupawt ahi, chi in, a chi hi.

¹⁵TOUPA thu ka kiang ah a hongtung nawn a, ka kiang ah,

¹⁶Mihing tapa, ngai in, thakhat in na mit taina pen k’on laksak ding a, na sun ding ahi kei dia, na kah ding leng ahi sam kei, na khitui leng a kiak ding ahi kei hi.

¹⁷A sim in thum inla, misi sunna nei ken, na dial khim inla, na khedap bulh inla, na muk hum kenla, mite an leng ne ken, a chi hi.

¹⁸Huchi in zingsang lam in mipite kiang ah thu ka gen a, nitaklam in ka zi a si maimah a; zingsang lam in a hon thupiak bang in ka hih hi.

¹⁹Mite’n ka kiang ah, hichibang na thilhihte kou ding in bang ahia a hih na honhilh kei dia hia? a chi uhi.

²⁰Huchi in ken a kiang uah, TOUPA thu ka kiang ah a hongtung a.

²¹Israel inkawte kiang ah gen inla, TOUPA Pathian in hichi in a chi ahi: ngai un, ka Mun Siangthou, na hatna suan pen uh, na mittaina pen uh, na deihlam pen uh ka hihnin ding hi; na tanute uh; na tapate uh, nunglam a na nutsiatte uh namsau in a puk ding uh.

²²Ka hih bang geih in na hihtei ding uhi; na muk uh na hum kei ding ua, mite an leng na ne sam kei ding uh.

²³Na dialte uleng na khim ding ua, na khedap uh na bun ding ua: na sun kei ding ua, na kap sam kei ding ua, na thulimlouhnate uah na mangthang ding ua, na kikah tuah ding uhi.

²⁴Hichibang in Ezekiel nou ading in etsakna ahi ding a, a hihdan bangzel in na hih ding uh ahi: hiai a hongtun hun chiang in TOUPA Pathian ka hi chih na thei ding uh, chi ahi, ka chi hi.

²⁵Huan, nang mihing tapa, amau a kipan a hatnate uh, a thupi kipahnate uh, a mittaina pente uh, a lunglutnapente uh, a tanu uleh a tapate uh ka lakmang ni chiang in,

²⁶Huai ni mahmah chiang in a taikhia na kiang a hongpai ding a, a hong theisak kei ding ua hia?

²⁷Huai ni chiang in taikhe kiang ah na kam na ka ding a, a kiang thu na gen ding a, na dai maimah kei ding; huchi in amau ading in etsakna na hi ding a; huchi in TOUPA ka hi chih a thei ding uh, a chi hi.