Read Paite Chin EZEKIEL 25 Bible Online

EZEKIEL 25 - Paite Chin bible

EZEKIEL 25

¹TOUPA thu ka kiang ah a hongtung a, ka kiang ah:

²Mihing tapa, Ammon tate masuan inla, a tungtang thu uh gen in.

³Ammon tate kiang ah, TOUPA Pathian thu ngaikhia unla, TOUPA Pathian in hichi in a chi ahi: ka Mun Siangthou hihnit a om a, Israel gam hihgawp a a om a, Judah Inkawte sal a pi a omlai ua, Awi ing e: Numei: na chihziak in,

⁴Ngai in, suahlam mite kiang ah a hontan ding un k’on pe ding ahi; nang ah buk a koih ding ua, nang ah tenna a bawl ding uh; na theigahte a ne ding ua, na nawitui a dawn ding uh.

⁵Rabah khua sangawngsau inn ding in ka bawl dia, Ammon tate mun ganhon kualna mun ding in ka bawl ding; huchi in TOUPA ka hi chih na thei ding uh.

⁶TOUPA Pathian in hichi in a chi hi: Israel gam tung a na khut na bet a, na khe na pek a, lungsim tengteng a a siatna tung a na kipah ziak in.

⁷Ngai in, na tung ah ka khut ka lik ding a, namte kiang ah gallak ding in k’on mansak ding a; mite a kipan k’on phuk ding a, huai gam a kipan in k’on hihmang vengveng ding, k’on hihse ding a, huchi in TOUPA ka hi chih na thei ding, chi in.

⁸TOUPA Pathian in hichi in a chi ahi: Moab leh Seir in, Ngai in, Judah Inkawte namdang bang ahi uh, a chih ziak un.

⁹Moab pang khat, khopite lampang, gamgi zul a khopi, a gam thupina pente, Bethzeshimotte, Baal meonte, Kiriathaimte lampang ka hong ding a,

¹⁰Suahlam tate tan ding in Ammon tate toh kape ding a, Ammon tate namte lak a theih gige a hih nawnlouhna ding un.

¹¹Moab gam tung ah thu gel ka tangtung sak ding a, huchi in TOUPA ka hi chih a thei ding uh, chi in.

¹²TOUPA Pathian in hichi in a chi a: Edom in Judah inkawte tung a phuba la in nakpitak in thil a hihkhial hi, amah thu kia a a tung ua phu a lak ziak in.

¹³Huaiziak in TOUPA Pathian in hichi in a chi hi: Edom tung ah ka khut kalik ding a, a lak ua kipan mi leh sate ka phukmang vek ding; Teman a kipan in ka hihgawp ding a; Dedan pha in namsau in a si ding uh.

¹⁴Huchi in ka mi Israelte khut in ka phulakna ka tungsak ding a, Edom tung ah ka hehna bangzel leh ka thangpaihna bangzel in a hih ding ua, ka phulakna a na thei ding uh, chih TOUPA Pathian thupawt ahi.

¹⁵TOUPA Pathian in hichi in a chi ahi: Philistia mite’n phula a, tangtawn kimelmakna a, mi hihman utna lungsim sia pu a phu a lak ziak un.

¹⁶TOUPA Pathian in hichi in a chi hi, ngai in, Philistia mite tung ah ka khut kalik ding a, Kareth khomite ka phukvek ding a, tuigei a mi omsunte ka hihmang vek ding hi.

¹⁷Huan, heh mahmah in sal in a tung uah phu ka la ding a, huchi a a tung ua ka phulakna ka tunsak hun chiang in TOUPA ka hi chih a theita ding uh, a chi hi.