Read Paite Chin EZEKIEL 26 Bible Online

EZEKIEL 26 - Paite Chin bible

EZEKIEL 26

¹Kum sawm leh khatna kha, ni masapen in hichi ahi a, TOUPA thu ka kiang ah a hongtung a,

²Mihing tapa, Tura in Jerusalem tungthu a, Nuam e, Namte kongkhak a seta, keilam ah a kihong, hih siatgawp a a omvek ziak in, katan hoih ding ahita, a chih ziak in TOUPA Pathian in hichi in a chi hi:

³“Ngai in, aw Tura, k’on dou ahi, tuipi in a kihot a voktou bang mai in na tung a hongpai ding in nam tampi k’on sawl ding.

⁴Huchi in Tura kulhte a hihse ding ua, a insangte a chimsak ding ua, amah a kipan leivui tengteng ka kheuhsiang ding a, suangpi keu lel in ka bawl ding hi.

⁵Tuilai a len phoukeuna mun ahimai ding, ken ka chita ngal a, chih TOUPA Pathian thupawt ahi; huchi in namte adin gallak ahi mai ding.

⁶Huan a tanu gam a omte namsau a hihlup a hih chiang un TOUPA ka hi chih a thei ding uh.

⁷“Ngai in, Tura tung ah Babulon kumpipa Nebukadnezzar, Kumpipate kumpipa mallam a kipan in, sakolte toh sakol tung tuangmite, a pawl leh mipi tampi mahmah ka honpi dek ahi.

⁸Gam ah namsau in na tanute a that ding; kulh a bawl ding a, nang nanna ding in, nang douna ding in a bawl ding, mual pawngte, nang douna kidalna a bawlkhe ding.

⁹Kulhsuksiatna a bawl, na kulh phelna ding, na insang a chimsak ding, heipi in.

¹⁰A sakol tam ziak in a hontuam ding, leivui in, khopi siat a mite a lutsek bang in, na kongpi a honglut hun chiang un, na kulhpi a ling ding a, sakol tungtuangte husa leh kidou kangtalai husa in.

¹¹Sakol khechin in a chilse ding, na kongzingte; na mite a thatkhin ding, namsau in; na hatna bangbang lei ah a chim ding hi.

¹²Na gouthil gallak in a la ding ua; na van tengteng a gubei ding uh; na kulhbang lei ah a chimsak ding ua, na Inpi nuam a hihse vek ding uh, na suangte, na singte, na leivuite tuilai ah a pai ding uh.

¹³Ka khawlsak khin ding a, na lasak husate, na kaihging leng a daiden ding hi.

¹⁴Suangpi keu lel in k’on bawl ding a, len phoukeuna ding na honghi ding hi, dinsak nawn na hi kei ding, kei TOUPA’N ka chita ngal a, chih TOUPA Pathian thupawt ahi hi.

¹⁵TOUPA Pathian in Tura khua kiang ah hichi in a chi a, na sung a kithahnate a om hun a, miliamte a thum hun chiang in na puk ging in tuipi gei gamte a ling kei ding ua hia?

¹⁶Tuipi tung a heutute tengteng a tutphah ua kipan a paisuk ding ua, a puan thupite uh a koih ding ua, a puansilh zephoihte uh a suahta ding ua; linna in a kivan zawta ding ua, lei ah a tu ding ua, a lingling ding ua, lamdang a honsa ding uh.

¹⁷Huchi in nang sunna la a phuak ding ua, na kiang ah, Khopi minthang, tuipi tung a hat, tui siam mitengteng tenna sek, amah leh asung a tengte tengteng, mi vialvakte’n a honlauh lauh utoh, na siatna thupi hina tele:

¹⁸Na pukna ni’n a ling uh, tuikulh gamte; tuipi tuikulh a lunglel ua, na man ni’n, a chi ding uh chi in.

¹⁹TOUPA Pathian in hichi in a chi hi, khopi gam, kuamah luahlouh khopi bang a k’on bawl hun chiang in, tui thukpi ah k’on tumsak ding a, tui thupi mahmah in a hontum ding hi;

²⁰Leinuai lam ah, nidang a segawpsa, khuk thuk a paisate kiang ah k’on tengsak ding a, kuamah in a hon luahlouhna ding un leh mihingte lak a thupina na muh nawn hetlouhna ding in.

²¹K’on hihmang vengveng ding a, na om nawnta kei ding, min honzong mahle uleng, a hon munawnta kei ding uh chih TOUPA Pathian thupawt ahi.