Read Paite Chin EZEKIEL 27 Bible Online

EZEKIEL 27 - Paite Chin bible

EZEKIEL 27

¹TOUPA thu ka kiang ah hongtung a, ka kiang ah,

²Nang, mihing tapa, Tura khaw sunna la phuak inla,

³Tura khua kiang ah, Aw nang tuipi gei a tengsek, tuipi gei gam tampite kiang a sumsin, TOUPA Pathian in huchi in a honchi ahi: Aw nang Tura, ka kilawm bukim na chi maw:

⁴Na gam in tuipi lai a sun hi, nang hon bawlte’n hon kilawm tungtuan sak mah ve ua;

⁵Na singzat Senir meilah in a bawl ua; na longpeu ding in, Lebanon a sidar in a bawl uhi;

⁶Bashan tosaw na longzapna ding in a bawl ua; Saiha suang phum na long pialkhang ding in, tak sing tuipi gam Kupra a kipan in.

⁷Na long puanzak Aigupta puanmalngat gial, nang chiamtehna ding in a natung hi, nang dia limzak dumpuang, sandup, Elishah tui gei a kipan;

⁸Na longkalmi Sidon, Arvad mi ahi; na long hawlmite leng Zemir misiamte ahi ua;

⁹Gebal upa leh mi khutsiam, na long bulhtuahmite ahi ua, tuipi long teng leh a mite’n, nang hong dawl ding in a hongzuan uhi.

¹⁰Na galdoumi, na sepaihhon, Persia, Lud, Put mite ahi ua, a lum uh leh a dal lukhu uh na bang ah a khai ua, nang kilawmsakte ahi uhi.

¹¹Na sepaih hon leh Arvadmite’n na kulhpi kimvel in a veng ua, Gammadim mite’n na insang a veng ua, a lum uh a bang ua, na kulhpi kimvel in a khai uh a, nang kilawmsakte ahi uhi.

¹²Na hauh ziak in, sum leh pai gou thil chiteng, Tarshish nang hon dawlmi a honghi a, na van lei in a honlam hi, dangkasik, sik, langva, leh a suante leng.

¹³Zavan, Tubal, Meshek, nang hon dawlte’n sal leh dal tuium-belsuan in a hondawl ua, na van neihna ding in.

¹⁴Togarmah a mite’n sakol, kidouna sakol leh sabiltung in na van a lei uhi.

¹⁵Dedan mite nang hondawl mite ahi ua, tuigei munchih na sumsinna mun a honghi, saiha leh eboni a hon puak uhi.

¹⁶Van na hauh ziak in, Edom nang hondawl a honghi a, emerald suang, puansandup, puanzep, puanmalngat, khibah, agate suangte in nang a hondawl uh.

¹⁷Judah leh Israel teng nang hondawlte ahi ua, Minnith buh leh Pannag, khuaizu, sathau leh singnai in a hondawl uh.

¹⁸Na hauh ziak in, sum leh pai gou thil chiteng, Damaska nang hondawl a honghi a, Helbon uain leh belam mulkang in a hondawl hi.

¹⁹Uzal uain hontawi in a lei ua, na vante, sikseksa, singguithak leh kawltute na sumsinna.

²⁰Sakol tungphah puante in Dedan in nang a hondawl hi.

²¹Arabia leh Kedar kumpipate nang hondawlte ahivek uh, Belamnoute, belamtalte, keltalte in a hondawl uh.

²²Sheba leh Raamah sumsinmite nang hondawlte a honghi ua, gimlim hoihpente, suangmantam chichih leh dangkaengte in, nang a hondawl uh.

²³Haran, Kanneth leh Eden, Sheba, Assuria leh Kilmad sumsinmite nang hondawlte ahi uh.

²⁴Huaite ahi uh, nang hondawl, puansilh hoih chi, puandum buang, puanzep, pialkhang phah ze kilawm toh, khauhual chiptak a hek in, hiaite in nang hondawl uh.

²⁵Tarsish longhon leh longlian vanpawte ahi ua, Na hong inbul in tuipi tung ah na hong thupita hi.

²⁶Na long hawlpa’n tuipi kihot ah a hon hawllut a, suahlam huih in nang a hon nuaimang, tuipi lai ah.

²⁷Na hauhsakna, na van, na sumsinna thil, na longmite, longhawlmi, bulhtuakmite, sumsin van khengmite, na galbawl mite tengteng, nang a om, na sung a om tengteng toh, na siat ni’n tuipi lai ah na tummang ding uh.

²⁸Na longhawlmite kikou husa in na kim a mite a ling uhi.

²⁹Longkalhna peu lenmite tengteng, longmite leh, tuipi a hawlmite tengteng paisuk in, ading ua, luipiau ah.

³⁰Na tungthu ah a aw uh zak tham in a suah ding ua, khasetak in a kap ding ua; a lu ua leivuite buak in, vut lak ah a kitholh ding uh.

³¹Nang ziak in kimet giau in, saiip puan a teng ding ua; khase lua in nakpitak a kap in nang a honsun ding uh.

³²Nang hon sun in kahla a sam ding ua, nang sun in Tura bang khopi kua a om a, amah tuipi lai ah, Dai sipsip hi.

³³Na vante’n tuipi a pan pawt in mi tampi a vak kham sek; na dangka leh na van in lei kumpipate na hausak hi.

³⁴Tuipi thuk a na siat ni’n, na sumsinna thil, na mite, nang toh a thelthang uhi.

³⁵Tui gei a teng mitengteng in mulkimhuai a honsa ua; a kumpipate uh lau in a sibup ua, a mel uh a lamdang hial hi.

³⁶Mite lak a sumsinmite’n nang a hon khoisat khum ua, mite ading in launa na hongsuakta hi; Na kilang nawn ngeikei dia leh, chi in a hon kahkhum uhi.