Read Paite Chin EZEKIEL 29 Bible Online

EZEKIEL 29 - Paite Chin bible

EZEKIEL 29

¹Kum sawmna, kha sawmna, huai kha ni sawmnihna ah TOUPA thu ka kiang ah a hongtung a,

²Mihing tapa, Aigupta kumpipa Pharo masuan inla, a tung ah leh Aiguptami tengteng tung ah thu gen in.

³Gen inla, TOUPA Pathian in hichi in a chi ahi: Ngai in, Aigupta kumpipa, Pharo luipite lai ah Olepi thupitak, Ka luipi kei a ahi, keimah ngei adia ka bawl, chipa kondou ahi.

⁴Na haizekte ah ngakuai in k’on man ding a; luipi a ngasate na lip ding in ka belhsak ding a; luipi lai a kipan na lip ah ngasate tengteng toh ka hon botkhe ding.

⁵Huan gamdai ah ka honpai ding a, nang leh na luipi a ngasa tengteng leng; gamlak ah na puk dia; na luang lawn a hi kei ding a, vui na hi sam kei ding; gam sahangte lehtungleng vasate kiang ah an dia honpe ding ka hi.

⁶Israel Inkawte adia sialluang chiang lel na hong hih ziak in Aigupta gam a teng tengteng in kei TOUPA ka hi chih a thei ding uh.

⁷Khut a honlet ua, a liangzang uh na tansak a, na satkhia; honngai ua, a kongte uh kitan a tanglou in na omsak hi.

⁸Huaiziak in TOUPA Pathian in hichi in a chi: Ngai in, na tung ah namsau k’on tun ding a, na lak a kipan mi leh sa ka phuk mang ding.

⁹Huan Aigupta gam, gam segawp leh khaw sia ahi mai ding a, kei TOUPA ka hi chih a thei ding uh. Luipi kei a ahi a, ka bawl ahi a, na chih ziak in.

¹⁰Huaiziak in kondou ahi, na luipi leng: Seveneh kulh a kipan in Ethiopia gamgi pha in Aigupta gam bel gam segawp leh khosia in ka bawl ding.

¹¹Mihing khe in a sik ngeikei ding a, sate leng a pai ngeikei ding ua; kum sawmli sung in luah in a omkei ding hi.

¹²Aigupta gam segawpte lak a khat in ka bawl ding a, a khopite ka khopi siate lak ah kum sawmli a kigawp ding: Aigupta mite namte lak ah ka dalhsak ding a, gamchih ah ka dalhsak ding hi.

¹³TOUPA Pathian in hichi in a chi hi; Kum sawmli nung in a dalhna mite ua kipan Aigupta mite ka lakhawm nawn ding:

¹⁴Aigupta mite omdan ka hei ding a, a pianna gam uh, Pathros gam ah ka kiksak ding; huchi in huai ah vualleltak in a lal ding uh.

¹⁵Lalna gam a vuallel pen ahi ding, namte lak ah leng a kilalsak nawn sam kei ding hi; Namdang tung a thu a neih nawn louhna ding un amau ka neusak ding hi.

¹⁶Amau lam nga peuhmah in a thulimlouhna uh a theihkhiak pih ziak in Israelte muanpi ahi nawnta kei ding uh; huan TOUPA Pathian ka hi chih a thei ding uh, a chi, chi in.

¹⁷Huan, hichi ahi a, kum sawmnih leh sagihna, kha khatna, huai kha ni khat ni’n TOUPA thu ka kiang ah a hongtung hi.

¹⁸Mihing tapa, Babulon kumpipa Nebukadnezzar in Tura tung ah na thupitak sem ding in a sepaih hon a sawl a, michih lu a giau loh a, michih liangzang in a dulh loh lai a; himahleh amah leh a sepaih honte’n a na sepna uah Tura a kipan punna bangmah a mu tuankei uhi.

¹⁹Huaiziak in TOUPA Pathian in hichi in chi ahi: ngai in, Aigupta gam Babulon kumpipa Nebukadnezzar kiang ah ka pe ding a, a thil hauh ziazuate a lamang ding a, a lok ding a, a gallak sak ding; huai a sepaih honte loh a himai ding.

²⁰Ka na a sep ziak un Aigupta gam a loh ding un ka pia ahi, TOUPA Pathian in a chi ahi.

²¹Huai ni chiang in Israel inkawte ding in ki ka pou khesak ding a; a lak uah na kam ka ka sak ding; huchi in TOUPA ka hi chih a thei ding uh, chi in.