Read Paite Chin EZEKIEL 3 Bible Online

EZEKIEL 3 - Paite Chin bible

EZEKIEL 3

¹Ka kiang ah, Mihing tapa, na muh ne in; laibuzial ne inla, Israel inkawte kiang ah thu vagen in, a chi hi.

²Huchi in ka kam ka ka a, laibuzial a hon nesakta hi.

³Huan aman ka kiang ah Mihing tapa, na gil ah pai inla, hiai laibuzial k’on piak in na gilsung hihdim in, a chi hi. Huchi in ka neta a, a khumdan ka kam ah khuaizu bang ahi hi.

⁴Aman ka kiang ah: Mihing tapa kuan inla, Israel inkawte kiang ah ka thute zang in vagen in.

⁵Pau tuam leh pau haksate kiang a sawlna hi kei a, Israel inkawte kiang a sawl na hizaw hi;

⁶Nam pau tuam leh pau haksa a thu uh na theih theihlouhte kiang a sawl na hi kei hi. A kiang ua nang k’on sawl in pellou in na thu a ngaikhe mahmah ding uhi.

⁷Himahleh Israel inkawte’n a hon ngaikhe kei ding ua, kei a hon ngaikhe kei ding uhi, Israel inkawte tengteng taltang tak leh lungtang genhak mahmah ahi uhi.

⁸Huan ngai in, na mai amau mai lak ah khauhsak in, na taltang leng amau taltang sang a takzaw in k’on bawl hi.

⁹Suang tak mahmah, meisuang sang a tak in na tal ka bawl a, lau kenla, a mithah uah lunglel sam ken, helhat inkuan hi mahle uh, a chi hi.

¹⁰Huailou leng ka kiang ah Mihing tapa, na kiang a ka thugen ding tengteng na bil in ngaikhia inla, na lungtang ah khum in.

¹¹Kuan inla, na chipih saltangte kiang vatung inla; a ngaikhia uhiam, a ngaikhe kei uhiam. “Hichibang TOUPA thupawt ahi” chi in gen inla, hilh in, a chi hi.

¹²Huchi in kha in a hon domkangta a, amun a kipan TOUPA thupina a dinkhiak lai in, ka nunglam ah zinling thawm ka za hi;

¹³Huai tuh thilhingte kha kisukha leh a kiang ua kangtalai peite, zinling thawm bang nei ahi uhi.

¹⁴Huchi in kha in a hon domkang a, a hon lamangta a: heh mahmah leh utlou pipi in ka kuanta hi, TOUPA khut lah ka tung ah a hat ngal a.

¹⁵Huchi in, Telabib a saltangte, Kebar lui a tengte kiang ka vatung a, a tutna uah ka tu a; lamdangsa tak in huai ah ni sagih ka tuta hi.

¹⁶Huchi in ni sagih bei in hichi ahi a, TOUPA thu ka kiang a hongtung a,

¹⁷Mihing tapa, Israel inkawte vilpa in nang k’on sep hi; huchi in ka kam a thu na za ding a, kei sik in amau vauna na pe ding hi,

¹⁸Migilou kiang a ka thu, “Na si mahmah ding ahi” ka chih a, huai migilou a hinna hum ding a a gitlouhna lampi paisan ding a vauna na neih louh a, vauna thu leng na hilh sam louh a, huai migilou a gitlouhna a a sih leh a sisan mawh nang lak ah k’on sik ngeingei ding hi.

¹⁹Himahleh huai migilou na vau a, a gitlouhna a paisan louh a, a gitlouhna lampi a lehngatsan sam kei leh a gitlouhna ah a si ding a, nang bel na hinna na humbit ahizaw ding hi.

²⁰Huan mi diktat in a diktatna lehngatsan a gitlouhna a hih a, a ma a pukna ka koih leh, a si ding: vauna na neih louh ziak in a khelhna ah a si ding a; a thil diktat a hihsate theihgige ahi kei ding; a sisan mawh ahihleh na lak ah k’on sik ding hi.

²¹Himahleh mi diktat khiallou ding a na vau a, a khelh keileh vauna a khawksak ziak in a hing ding; nang leng na hinna na humbit ding hi, a chi hi.

²²Huan huai ah TOUPA khut ka tung ah a om a, ka kiang ah, Thou inla, phaizang ah pai inla, huai ah k’on houpih ding, a chi a. Huchi in ka thou a, phaizang ah ka paita hi.

²³Ngai in, huai ah TOUPA thupina, Kebar lui a ka muh thupina bang mai in a hong ding a, kei ka khup pukta hi.

²⁴Huchi in, kei ah kha a honglut a, ka khe in a hon dingsak a, a hon houpih a, Pai inla, na inn ah kikhak khum in.

²⁵Nang zaw, mihing tapa, khauhual in a honkhih ding ua, a hon gak ding ua, a lak uah na pawtkhe nawn kei ding.

²⁶Na lei na dangtawng ah ka belhsak ding a, na pau nawn kei ding a, amaute salpa na hinawn kei ding, helhat inkuan ahi ngal ua.

²⁷Himahleh na kiang a thu ka gen hun chiang in na kam k’on ka sak ding a, a kiang uah “TOUPA Pathian in hichi in a chi: ‘A ngaikhia in ngaikhia henla, a ngaikhelou in ngaikhe kei hen, helhat inkuan ahi ngal ua, a chi’ ” chi in na gen ding hi.