Read Paite Chin EZEKIEL 30 Bible Online

EZEKIEL 30 - Paite Chin bible

EZEKIEL 30

¹TOUPA thu ka kiang ah a hongtung nawn hi.

²Mihing tapa, thu gen inla, TOUPA Pathian in hichi in a chi hi:

³Kikou un, maizen! maizen, tua ni tel: ni a nai hi, TOUPA ni a nai hi, mei kai ni, pautuam mite siatna ding.

⁴A hongtung ding, namsau, Aigupta tung ah; sinlai natna, Ethiopia tung ah, Aigupta ah mi thah a puk un; a thil hauh ziazuate a lamang ding ua, a suangphumte a chimse ding hi.

⁵Ethiopia, Pud leh Lud, namchih omkhawm, Kub leh gam tate tel teite tengteng, a puk ding uh, namsau in.

⁶TOUPA’N hichi in a chi: Aigupta tungding mite leng a puk ding ua, a hatna suanpen uleng a vuallel ding; Migdol a kipan Suene pha in namsau in a puk ding ua, TOUPA Pathian in a chi ahi.

⁷Gam hihgawpsate lak a khat ahi ding a, a khopite leng khopi gawpsate lak a ahimai ding uh.

⁸Aigupta gam ah mei ka khah ding a, amau panpihmite tengteng ka hihsiat hun chiang in TOUPA ka hi chih a thei ding uh.

⁹Huai ni chiang in Ethiopia mi kigingloute lunglelsak ding in ka kiang a kipan mi sawl long in a pai ding ua; Aigupta ni mah bang in lungtang mangbatna mahmah a tung uah a tungsam ding hi: ngai in, a hongtung lellel hi:

¹⁰TOUPA Pathian in hichi in a chi ahi: Babulon kumpipa Nebukadnezzar khut in Aigupta thil hauh ziazuate ka hihmang ding.

¹¹Gam hihse ding in amah leh a lawite, namte lak a kihtakte tunsak ahi ding uh; Aigupta tung ah a namsau uh a lik ding ua, gam mi luang in a dimsak ding uh.

¹²Huan luipite ka kangsak ding a, gam migiloute kiang ah ka khong ding; a gam leh asung a om tengteng pautuam mite khut in ka hihgawp ding: kei TOUPA’N ka chita ahi.

¹³TOUPA Pathian in hichi in a chi ahi: Milimte ka hihse ding a, Noph khua a kipan milimte ka hihmang ding, Aigupta ah heutu a omta kei ding uh: huchi in Aigupta gam ah launa ka omsak ding.

¹⁴Pathros ka hihgawp ding a, Zoan ah mei ka khah dia; No khua ah ka tangtung sak ding.

¹⁵Huan Aigupta kulh Sin khaw tung ah ka hehna ka lungdamsak ding a, No khua a mipite ka phukmang ding.

¹⁶Huan Aigupta ah mei ka khah ding a, Sin khua buaitak in a om ding a, No khua leng a chim vek ding: Noph khua in sun chiang in melma a nei nilouh ding.

¹⁷Aven leh Pibeseth khaw tangvalte namsau in a puk ding ua, huai khuate sal a pi in a om ding uh.

¹⁸Aigupta hakkol ka hihtan a, a hatna a kisaktheihpih ka hihbei hun Tehphanhes khua ah ni a mial ding; amah zaw meipi in a liah ding a, a tanute sal a pi in a om ding uh.

¹⁹Hichibang in Aigupta gam ah thu ka tangtung sak ding: huchi in kei TOUPA ka hi chih a thei ding uh, chi in.

²⁰Huan hichi ahi a, kum sawmlehkhatna, kha khatna, huai kha ni sagih ni’n TOUPA thu ka kiang ah a hongtung hi.

²¹Mihing tapa, Aigupta kumpipa Pharo ban ka kitansak a, ngai in, namsau tawi ding a hat nawnna din damdawi nuh leh tuam a loh kei hi.

²²Huaiziak in TOUPA Pathian in hichi in a chi ahi: Ngai in Aigupta kumpipa Pharo ka dou ahi, a ban a hoih lam leh a kitansa nunglam leng ka kitansak ding a; huchi in, a khut a kipan namsau ka kitansak ding hi.

²³Aigupta mite namte lak ah ka dalhsak ding a, gamchih ah ka thelthangsak ding.

²⁴Babulon kumpipa bante ka hatsak ding a, a khut ah namsau ka tawisak ding a; Pharo bante ka kitansak ding a, a ma ah sihpih khop liam thum in a thum ding hi.

²⁵Huchi in Babulon kumpipa bante ka hatsak ding a, Pharo bante bel a luaikhe ding; Babulon kumpipa khut ah ka namsau ka tawisak a, Aigupta kumpipa tung a a lik hun chiang in kei TOUPA ka hi chih a thei ding uh.

²⁶Aigupta mite namte lak ah ka dalhsak ding a, gamchih ah ka thelthangsak vek ding; huchi in, TOUPA ka hi chih a thei ding uh, chi in.