Read Paite Chin EZEKIEL 31 Bible Online

EZEKIEL 31 - Paite Chin bible

EZEKIEL 31

¹Huan hichi ahi a, kum sawm leh khatna, kha thumna, huai kha ni khat ni’n TOUPA thu ka kiang ah a hongtung a;

²Mihing tapa, Aigupta kumpipa Pharo leh a khua leh a mite kiang ah gen inla: Thupina ah kua na bang a ahia?

³Ngai in, Lebanon hiang kilawm leh bawkpha, lim sah, sang kilawm, a dawn meilak ah a om hi.

⁴Tui in a hon vak a, tuithuk in a khangsak hulhul, a phuhna luite’n a luan kual ua, gam sing chih vakna d’in a luangsak hi.

⁵Huchi in gam sing teng zou in a sang tuan a; a hiang a khang, a hiang a sau, tuipi vak, a meng khesak hi.

⁶A hiang ah tungleng vasate’n bu a bawl ua; a hiang nuai ah sa chiteng in nou a nei ua; a lim nuai ah a nam thupi teng a teng uhi.

⁷Huchi in, a kilawm, a thupina, a hiangte sauna ah zel in; a zung lah tui tampite kiang ah a om ngal a,

⁸Pathian huan a sidar singte’n a phazou kei ua; a bawk, meilah sing in a dem zou kei a; a hiang sesing in a phazou sam kei; a kilawmna ah Pathian huan a sing a bang zoukei hi.

⁹A hiang tamsak in ka bawl hoih a, Pathian huan a Eden sing teng in a haza uhi, chi in.

¹⁰Huaiziak in TOUPA Pathian in hichi in a chi ahi: A hongsan mahmah a, meipi lak a a dawn a len a, a lungtang a a sandan a kisaktheihpih ziak in,

¹¹Namte lak ah mihat tak khut ah ka mansak ding: a thulimlouhdan bang in a gawt ding a, ka delhkhe ding.

¹²Huchi in pautuam mi namte lak a kihtakhuai mahmahte’n a phuk ding ua, a nuse ding uh: tangte, guamte ah a hiangte a ke lemlum ding a, huai gam tuiluanna guam tengteng ah a hiangte a kitan lemlum ding: khovel a mi tengteng a lim a kipan a pawtkhe ding ua, amah a paisan ding uh.

¹³A siatna ah tungleng vasa tengteng a teng ding ua, a bawk tung ah gamsate a om ding uh.

¹⁴Hiai bel tui a vak sing tengteng a kisan saklouh ua, a dawn uh meipi kal a lengsak lou a, tui a vak sing in a sandan uh a suan sam louhna ding uh ahi: lei mun nuainungpen a kawkhuk a paisukta, mihing tate lak ah pai ding in, sihna a matsak ahivekta ngal uhi.

¹⁵TOUPA Pathian in hichi in a chi ahi: Sheol a a paisuk ni’n amah ka sunsak a, luitui thuktak te ka khawlsak a; huai ah tui tampi let dingte ka daltan a; Lebanon amah ka sunsak lai a; gam sing tengteng amah ziak in a gim khin uhi.

¹⁶Namte leng a puk ging ah ka lingsak a, kawkhuk a paisuksate kiang a Sheol a ka paihkhiak ni’n; Eden sing tengteng, Lebanon sing hoih tata, tui a vak tengteng lei nuainungpen ah lungmuang in a omta uhi.

¹⁷Namsau a thahte kiang ah Sheol ah a paisuk ua; ahi, namte lak a, a limnuai a tengte leh namte lak a a kizoppihte toh hankhuk a tungsuk uhi.

¹⁸Eden singte lak a thupina leh letna ah kua ahia nang bang om? Himahleh Eden singte toh lei mun nuainungpen ah paihkhiak na hi ding; namsau a thah, zeksumlouhte lak ah na lum ding hi. Hiai bel Pharo leh a khua leh tuite ahi uh, chih TOUPA Pathian thupawt ahi.