Read Paite Chin EZEKIEL 32 Bible Online

EZEKIEL 32 - Paite Chin bible

EZEKIEL 32

¹Huan hiai ahi, kum sawmlehnihna, kha sawmlehnihna, huai kha ni khat ni a TOUPA thu ka kiang a hongtung hi:

²Mihing tapa, Aigupta kumpipa Pharo sunna la phuak inla, a kiang ah: Namte humpinelkai lunlai kibatpih: tuipi a Olepi na bang zaw hi; na nak a tuite phuansak in, na khe in na toknin a, a luite uh na ninsak vekta.

³TOUPA Pathian in hichi in a chi: ka len in ka honkhuh ding a, mi tampi toh, ka len in nang a honman ngeingei ding uh.

⁴Gamlak ah k’on nuse ding a, gamlak ah k’on pai ding; tung a leng tengteng ka samkhawm ding, na tung ah; nang in leipumpi gamsa, ka taisak ding hi.

⁵Tang chih ah na sa ka lui ding a; na luang in guamte ka dimsak ding.

⁶Na tenna gam tang tan in, na sisan in ka sil ding a, guam chih leng nangmah in a dim ding hi.

⁷K’on chimih sak hun chiang in, van ka khuh in aksi ka mialsak ding; meipi in ni ka liah mang ding; kha in a vakna a suah kei ding hi.

⁸Na tung ah van vakna teng ka mialsak ding; na gam ah khomial ka leng sak ding, chih TOUPA Pathian thupawt ahi, chi in.

⁹Na theihlouh gam a namte lak a na siatna ka tunsak hun chiang in mi tampite lungtang ka lungzingsak ding.

¹⁰Ahi, mi tampi nangmah ah lamdangsa in ka bawl ding a, a ma ua ka namsau ka leh hun chiang in nang ziak in a kumpipate uh leng mulkimhuai a sa un a lau mahmah ding uh; na puk ni’n michih in a hinna uh tan lau in a lingling ding uhi.

¹¹TOUPA Pathian in hichi in a chi ngal a: Babulon kumpipa namsau na tung ah a hongtung dek hi.

¹²Na mite ka puksak ding, galhatmite namsau in, namte lak a kihtakhuai pente ahi uh, a hihse ding uh. Aigupta mite thupina, a mipite tengteng a hihmang ding uh.

¹³Tui tampi gei gamsa teng ka hihmang ding; mi khete’n a ngap ninta kei ding; gamsa khete’n leng a ngap nin sam kei ding hi.

¹⁴Huchi in tui ka chimsak ding a, ka luangsak ding, luite, sathau bang in, chih TOUPA Pathian thupawt ahi.

¹⁵Aigupta gam ka hihse gawp dia, a hauhna tengteng ah vuaktang in, asung a tengte ka phukmang hun in kei TOUPA ka hi chih a thei ngei ding uh.

¹⁶Hiai a kahla ding uh ahi; namchih tanute’n hiai a kah in Aigupta leh a mi tengteng a sun ding uh, chih TOUPA Pathian thupawt ahi.

¹⁷Huan hichi ahi a, kum sawmlehnihna, huai kha ni sawmlehnga ni’n TOUPA thu ka kiang ah a hongtung a, ka kiang ah,

¹⁸Mihing tapa, Aigupta mipite kah ekek inla, amah leh nam minthang tak tanute kawkhuk a paisuk khinte toh lei nuainung lam ah paikhia in.

¹⁹Kilawmna ah kua a khup a? Paisuk inla zeksumlouhte lak ah lum in.

²⁰Namsau a thahsate lak ah a puk ding ua, namsau kiang a piak ahi khin ua, amah leh a mite tengteng kaimang un.

²¹Sheol a om galhat mi mahmahte’n amah leh a panpihmite a houpih ding ua; a paisuk ua, a lum nilouh ua, namsau a thah, zeksumlouhte.

²²Huai ah Assuria leh a heute tengteng a om ua; a hante uh amah kim ah a om a: avek un thah, namsau a pukvek ahi uh.

²³A hante uh kawkhuk thuk pen ah a om a, a han kim ah a heute a om uh; avek ua thah, namsau a puk vek, mihing gam galmuanglou sakmite ahi uh.

²⁴Huai ah Elam leh a han kim ah a heute a om ua; avek ua, namsau a puk, lei nuainung a zeksumlouh a paisuk ua, mihing gam galmuanglou sakmite, a zahlakna uh kawkhuk a paipih sukte ahi uhi.

²⁵Mi thahte lak ah amah leh a heute lupna a bawlsak ua, a hante amah kim ah a om a; avek un zeksumlouh, namsau a thah, ahi ua; a kihtakhuaina uh mihing gam gallauna ahi nak a; kawkhuk a paisuktate toh a zahlakna uh a pua ua, mi thahte lak ah a omsak uhi.

²⁶Huai ah Meshek leh Tubal, a heute utoh a om ua; a hante uh amau kim ah a om a; avek un zeksumlouh, namsau a thah ahi uh; a kihtakhuaina un mihing gam a hihmang zel hi.

²⁷Zeksumlouh, mihat pukte, kidouna galvan toh Sheol a paisuktate, a namsau uh lukham a nei, a guhte uh tung a a lum omte kiang ah a lum kei uh: amau lah mihing gam a mi hatte launa ahi.

²⁸Nang zaw zeksumlouhte lak ah kitan lemlum in na om ding a, namsau a site kiang ah na lum ding hi.

²⁹Huai ah Edom, a kumpipate leh a heutute tengteng a om ua: a hatna ua; namsau a thahte lak ah a sial uh hi; zeksumlouh, kawkhuk a paisuksate kiang a lum uhi.

³⁰Huai ah mallam heutute, avek un, Sidon mi tengteng, thahte lak a paisuksate a om ua, a hatna un mi a gallausak na a, a zum ua, zeksumlouh in namsau a thahte lak ah a lum ua; kawkhuk a paisuk khinte toh a zahlak khawmta uhi.

³¹Pharo in amaute a mu ding a, a mite tengteng a lungmuan loh ding, Pharo leh a sepaih hon tengteng, namsau a thahte ngei leng, chih TOUPA Pathian thupawt ahi.

³²Mihing gam ah gallauna a lengsak a, zeksumlouh, namsau a thahte lak ah a lum ding uhi, Pharo leh a mi tengteng ngei, chih TOUPA Pathian thupawt ahi, a chi hi.