Read Paite Chin EZEKIEL 33 Bible Online

EZEKIEL 33 - Paite Chin bible

EZEKIEL 33

¹TOUPA thu ka kiang ah a hongtung hi.

²Mihing tapa, na nam tate kiang ah thu gen inla, a kiang uah, Gam tung a namsau ka hontut leh gam mite’n a lak ua pat mi khat a telkhiak ua, galvilmi dia a koih uleh,

³Aman gam tung a namsau hongtung a muh leh pengkul a mut ding a, mipite a kigalging sak ding;

⁴Huchi in kuapeuh pengkul ging za a poisalou mi, namsau hongtung in manloh tamahleh, a sisan mawh amahmah in a paw ding ahi.

⁵Pengkul ging a zak a a poisaklouh ziak in a sisan mawh a puak mai ding ahi: a na poisak lebel a hin a humbit ding ahi.

⁶Himahleh galvilmi in namsau hongtung a muh a, a pengkul a mutlouh a, mipite a kigalgin louh ua, namsau a hongtun a, a lak ua mi kuahiam in a manloh leh a thulimlouhna in a mangthang ding a, a sisan phu galvilmi a kipan ka la ding, chi in.

⁷Huchibang in nang, mihing tapa, Israel inkawte adia galvil dia k’on bawl na hi; huaiziak in ka kam a thupawt ngaikhia inla, ka kiang a kipan kigalginna ding thu a kiang uah hilh in.

⁸Migilou kiang ah, “Aw migilou, si mahmah ding na hi” ka chih a, migilou a omdan paisan ding a na hilh kei leh migilou a gitlouhna ah a si ding a, a sisan phu bel nang a kipan ka la ding.

⁹Himahleh migilou a omdan paisan ding a na hilh a, a omdan a paisan kei lai leh, a gitlouhna ah a si ding a, nang bel na hin na humbit ding hi.

¹⁰Huan mihing tapa, nang Israel inkawte kiang ah thu gen inla, Hichibang in na chi ua, “Ka tatleknate uh leh ka khelhnate un a hon delhkhum a, huaiziak in ka thanggawp uh ahi, bangchi’n ka hing nilouh thei ding ua?” na chi uhi.

¹¹A hin a ka hin laiteng, migilou sihna ah kipahna ka neikei a, migilou in a omdan a paisan a a hin ka kipahlam ahizaw. Na omdan hoihlou ua kipan kik un, kik un, Aw Israel inkawte, bangdia si ding na hi ua? chih TOUPA Pathian thupawt ahi, chi in gen in.

¹²Nang, mihing tapa, na nam tate kiang ah gen inla, Mi diktat diktanna in a tatlekna ni’n amah a humbit kei ding a, migilou gitlouhna in leng a thulimlouhna a lehngatsan ni’n a puksak kei ding a, mi diktat lah a khelhna ni’n a diktatna in a hing thei tuan sam kei ding.

¹³Mi diktat kiang ah, na hing ngeingei ding, chih ka gen in, a diktatna muang a thil a hihkhelh leh a thil dik hih khat leng theih gige ahi kei ding; a thil hihkhelhsa ah a sizaw ding.

¹⁴Huan migilou kiang ah, “Na si ngeingei ding” ka chih nawn leuleu in, a gitlouhnate a lehngatsan a a siang leh a dik a na hih a,

¹⁵Migilou in mi koih khamnate pekik a, a thilgukte a piaknawn a, hinna dante a zuih a, thulimlouhna bangmah ahihkei leh a hing ngeingei ding a, a si kei ding hi.

¹⁶Khelhna a na hihsa bangmah theihgige ahita kei ding a, a siang leh a dik a na hihta a, a hing ngeingei ding hi.

¹⁷Himahleh na nam tate’n, “TOUPA thilhihdan a kikim kei” a chih un amau hihdan a diktat kei zaw hi.

¹⁸Mi diktat in a diktatna a lehngatsan a, thil gilou a na hihleh huaiziak in a si maiding.

¹⁹Huan migilou in a gitlouhna a lehngatsan a, a siang leh a dik ahihleh huaiziak in a hing ding.

²⁰Himahleh “TOUPA hihdan a kikim kei” na chi ua, aw Israel Inkawte michih noumau hihdan bang in k’on lelsak ding hi, a chi hi.

²¹Huan hichi ahi a, i saltan kum sawmlehnih, kha sawmna, huai kha ni nga ni’n Jerusalem a kipan taikhia mi khat ka kiang ah a hongpai a, “Khopi zoh ahita” a hong chi hi.

²²Huai mi taikhia a hongtun ma nitaklam in TOUPA’N ka tung ah a khut a nga a; zinglam a ka kiang a hongpai in ka kam a hon ka sak a, huchi in ka kam ka ka a, pautheilou in ka omta kei hi.

²³TOUPA thu ka kiang ah a hongtung a,

²⁴Mihing tapa, Israel gam a mun segawpsa nung a omte’n, “Abraham khat ahi a, gam a luah a; eite bel tampi i hi ua, gam gouluah ding a piak hita ve hang” chi in a gen uhi.

²⁵Huaiziak in a kiang uah TOUPA Pathian in hichi in a chi: Sa sisan na ne ua, na milimte uh lam ah na mitte uh na lengtou sak ua; sisan na suah ua, noute’n gam na tang ding umaw?

²⁶Na namsau uh na muang ua; thilkihhuai na hih ua; michih in invengpa zi na hihbuah ua; noute’n gam na tang ding uh maw?

²⁷Hichibang a a kiang ua na gen ding ahi, TOUPA Pathian in hichi in a chi ahi; A hin a ka hin laiteng, mun segawpsa nung a omte namsau in a puk ngeingei ding ua, gamlak a omte sahang kiang ah nekkhit dia pe ding ka hi; kulh kip leh khuk a omte hipi in a si ding uh.

²⁸Gam leng ka hihsia in, mulkimhuaitak in ka bawl ding a; a thilhihtheihna, a kisaktheihpih a beita ding; Israel tangte a segawp ding a, kuamah a vialvak nawnta kei ding uh.

²⁹Thil kihhuai a hih ziak ua gam ka hihgawp a, mulkimhuai tak a ka bawl hun chiang in kei TOUPA ka hi chih a thei ding uh.

³⁰Huan nang, mihing tapa, bangbul ah kongpite ah na nam tate’n a hon ngen susup ding ua, michih in a unaute kiang ah, “Kisa dih ua: TOUPA kiang a kipan thupawt i ngaikhe ding uh” a kichi ding uh.

³¹Huchi in a hon hon in na kiang ah a hongpai ding ua, ka mite bang mai in na ma ah a tu ding ua, na thu a ngaikhe ding ua, himahleh a zui tuankei ding uh; a kam un itna thupitak a hihlang ding ua, a lungtang un bel punna lam a zuan ding.

³²Ngai in, nang bel amau ading in itna la, kilawm tak a sakleh tum bang na hi ding: na thute a ngaikhia ua, himahleh a zui tuankei ding uh.

³³Hiai a hongtun hun chiang in Ngai in, a hongtung lellel hi, a lak uah zawlnei a om chih a thei ding uhi, chi in, a chi hi.