Read Paite Chin EZEKIEL 34 Bible Online

EZEKIEL 34 - Paite Chin bible

EZEKIEL 34

¹TOUPA thu ka kiang ah a hongtung a:

²Mihing tapa, Israelte belamchingte tung ah thu gen in, thu gen inla, a kiang uah, belamchingte kiang mahmah ah, huchi in TOUPA Pathian in a chi ahi: Israelte belamching, amau kivak maimahte tung a gik hi: belamchingte’n belamte vak lou ding ahi uhia?

³A thaute na ne ua, a mul in na kizem ua; a thauthau na gou ua, belamte na vak kei uhi.

⁴Natna veite, mangte n’on pi kei uh; a mangte na zong kei ua; khauhtak leh na mahmah in na thunun zaw uh.

⁵Belampute a omlouh ziak un dalhsak in a na omta ua; a na dalh ua, gam sahangte an lel a hong hita uhi.

⁶Ka belamte tang chih leh mual chih ah a vakmang ua; ahi, ka belamte leitung tengteng ah a na dalhkhin uh; limsakmi leh zawngmi a omkei uh, chi in gen in, a chi hi.

⁷Huaiziak in belamchingte aw, TOUPA thu ngaikhia un:

⁸A hin a ka hin laiteng, chih TOUPA Pathian thupawt ahi, belamching a omlouh ua, belamchingte’n ka belamte a zon louh ua, belamchingte’n ka belamte a vak louh ua, amau a kivak zawksop ziak un ka belamte gam sahangte an lel a honghi ua; ka belamte samat lel a honghi petmah uh.

⁹Huaiziak in nou belamchingte aw, TOUPA thu za un.

¹⁰Hichi in TOUPA Pathian in a chi ahi: Ngai un, belamchingte ka dou ahi; a khut ua kipan ka belamte ka sut ding a, ka belamte a kepna uh ka tawpsak ding a, belamchingte leng amau a kivak takei ding uh; a angsung ua kipan ka belamte ka lakhe ding a, amau dia nekding a hih nawnlouhna ding un, chi in.

¹¹Hichi in TOUPA Pathian in a chi ngal a: Ngai un, kei, keimahmah in ka zong ding a, ka zongkhe ding hi.

¹²Belamching in a belam dalhte lak a a belamhonte a zonlai bang in ka belamte ka zongkhe ding; khonim ni leh mial nuai a a dalhna tengteng ua kipan ka zongkhe ding,

¹³Huan mite lak a kipan ka lakhe ding a; gamchih a kipan ka kaikhawm ding a; amau gam ngei ah ka pilut ding; Israel tangte ah, lui geite ah, mi tenna mun tengtengte ah ka tasak ding.

¹⁴Loupa hoihtak munte ah ka tasak ding a; a huangsung uh Israel tang sangte ah a om ding; huang hoihtak sung ah leng a om ding ua, Israel tang tung a loupa dawng munte ah a ta ding uh.

¹⁵Kei mahmah in ka belamte ka vak ding a; ka kualsak kinken ding a, chih TOUPA Pathian thupawt ahi.

¹⁶A mang ka zong ding a, delhmangte ka pikik nawn ding a, a khe kitante uh ka tuam ding a, ka hatsak ding: a thau leh a hatte leng ka ching ding a; diktak in ka vak ding hi.

¹⁷Huan nou tungthu ahihleh, aw ka belamhonte, hichi in TOUPA Pathian in a chi: Ngai un, ka belamte kalthu ka gensak ding a, belamtalte, keltalte leng.

¹⁸Gan tatna mun hoihtak tung a tat nou din thil bang thamlou bang a lang in, na tatna neihsun na chilse zawsop uh ahi maw?

¹⁹Huan tuichim mahmahte na dawn khit un na ngap nin mawkmawk uh ahi maw? Ka belamte’n na siksa uh a ne un, na ngahsa uh a dawn ding umaw?

²⁰Huaiziak in hichi in TOUPA Pathian in a kiang uah a chi: Ngai un, kei, keimahmah in gan gawngte leh gan thaute kalthu ka ngaihtuah ding hi.

²¹A hatloute na liang un leh na sikte un na phu ua, na khete un na pik ua, na dalhsak uhi.

²²Huaiziak in ka belamte ka humbit ding; samat lel ahi nawn kei ding ua, belamte kalthu ka gensak ding hi.

²³Huan a tung uah belamching khat ka koih ding a, ka nasempa David ngei: aman amaute a vak ding a; amah amau chingpa ahi ding a, amau a vak ding hi.

²⁴Huchi in kei a TOUPA Pathian uh ka hi ding a, ka nasempa David a tung ua heutu ahi ding; kei TOUPA ngei in ka chita hi.

²⁵Amau toh lemna thukhun ka bawl ding a, sahangte gam a kipan ka hihmang ding: gamdai ah leng bittak in a teng ding ua, gammang nuaite a ihmu hihit ding uhi.

²⁶Amau leh ka tang kim munte ka vualzawl ding a; a hun geihgeih in vuah ka zusak ding a, vualzawl vuahte a zu ding hi.

²⁷Huan gam a sing in gah a suah ding a, lei in a punna a suah ding a; a gam uah bittak in a om ding uh; a hakkolte uh ka kitansak a, sikha a bawlmite khut a kipan ka hutkhiak hun chiang in kei TOUPA ka hi chih a thei ding uh.

²⁸Namdangte samat lel ahi nawnta kei ding ua, gam sahangte nekmang mai ahi nawn kei ding uh; bittak in a omzaw ta ding ua, kuamah in a lausak ngei nawn kei ding uh.

²⁹Thilsuan minthang mahmah ka bawlsak ding a; huai gam ah kial in a hihmang nawn kei ding a, namdangte muhsitna leng a thuak nawn kei ding uh.

³⁰Huan kei TOUPA a Pathian uh a kiang uah ka om chih a thei un, amau Israel inkawte leng ka mite ahi uh chih a thei ding uh, chih TOUPA Pathian thupawt ahi.

³¹Huan nou ka belamte, ka gantatna mun a belamte na hi ua; kei na Pathian uh ka hi, chih TOUPA Pathian thupawt ahi, chi in.