Read Paite Chin EZEKIEL 35 Bible Online

EZEKIEL 35 - Paite Chin bible

EZEKIEL 35

¹TOUPA thu ka kiang ah a hongtung nawn a,

²Mihing tapa, Seir tang masuan inla, a tung ah thu gen in. A kiang ah,

³TOUPA Pathian in hichi in a chi ahi: Ngai in, Aw Seir tang, k’on dou hi, na tung ah ka khut ka lik ding a, k’on hihgawp in mulkimhuaitak in k’on bawl ding hi.

⁴Na khopite ka suse ding a, na kigawp ding; huan TOUPA ka hi chih na thei ding.

⁵Na nitna uh gawtna nanungpen a a siat ni ua Israel inkawte namsau thilhihtheihna a na lata, na kinakpih gige ziak in,

⁶A hin a ka hin laiteng, sisan ading in k’on bawl ding a, sisan in a hondelh ding: sisan na huat louh zak in sisan in a hondelh ding, chih TOUPA Pathian thupawt ahi.

⁷Hichi in Seir tang bel mulkimhuaitak a bawl in ka sugawp ding; a tung a mi vialvakte ka tawpsak vek ding hi.

⁸A tangte amah mi thahte in ka dimsak ding: na tangte ah, na guam leh na luiguam kuakte ah namsau a thahte a puk phengphung ding uh.

⁹K’on sugawp den ding a, na khopite luah in a omkei ding: huan kei TOUPA ka hi chih na thei ding hi.

¹⁰TOUPA zaw a om gige na a, “Hiai nam nihte leh gam nihte kei a ahi ding a, ka tang maiding uh” na chih ziak in.

¹¹A hin a ka hin laiteng chih, TOUPA Pathian thupawt ahi, na hehna bangzel leh na huatna ziak a hazatna na suklatdan bangzel in ka hih ding ahi: na tungthu ka ngaihtuah hun chiang in a lak uah ka hihlang ding hi.

¹²“Hihgawp in a omta ua, ka kiang ah piak in a omta uh” chi a Israel tangte na gensiatna tengteng kei TOUPA’N ka zavek chih na thei ding hi.

¹³Ka tung ah na kam in na kiliansak in ka tung ah thu na tamsak a, ka za vek hi.

¹⁴Hichi in TOUPA Pathian in a chi ahi: Lei pumpi kipahna ding in k’on sugawp ding hi.

¹⁵Israelte gouluah a siat ziak a na kipah mah bang in na tung ah ka hih ding: Aw Seir tang leh Edom tengteng, avek in a kisegawp ding: huchi in TOUPA ka hi chih na thei ding uh.