Read Paite Chin EZEKIEL 36 Bible Online

EZEKIEL 36 - Paite Chin bible

EZEKIEL 36

¹Huan nang mihing tapa, Israel tangte kiang ah thu gen inla, Nou Israel tangte aw, TOUPA thu ngaikhia un. TOUPA Pathian in hichi in a chi hi:

²Na tung ah na melmate’n, “Aha! ‘nidang munsang tengtengte kei a ahita’ a chih ziak un” thu gen in.

³TOUPA Pathian in hichi in a chi ahi: Nam omsunte ading a kil chih a nang a honnek ua, a hon sukgawp ziak un leh mi kamtamte houlimna leh gensiat a a hon omsak ziak un:

⁴Nou Israel tangte aw, TOUPA Pathian thu ngaikhia un, TOUPA Pathian in tangte, mualte, luiguamte, guamte, leh mun sesate, khopi kigawpsa, a kim a nam omsunte samat lel ding leh nuihsan dingte kiang ah hichi in a chi ahi:

⁵Huaiziak in TOUPA Pathian in hichi in a chi ahi: Nam omsun leh Edom tengteng lungsim kipaktak a ka gam nana kiseh tawm ua; n’on musit mahmah ua, gallak a bawl mite tung ah ka mullitna thangpaih mahmahna in thu ka gen ngei ahi.

⁶Huaiziak in Israel gam tungthu ah thu gen inla, tangte, mualte, luiguamte leh guamte kiang ah TOUPA Pathian in hichi in a chi ahi: ngai un, namdangte simmohna na thuak ziak un mullit mahmah leh thangpai tak in thu ka gen ahi:

⁷Huaiziak in TOUPA Pathian in hichi in a chi ahi: Na kim a namte’n amau zahlakna a paw ngei ding uh chi in ka khut ka zak hi.

⁸Nou bel, Aw Israel tangte aw, hiang na suah ding ua, ka mi Israelte adin gah na suah ding uh; a hongpai dek uhi.

⁹Ngai un, nou lam a pang ka hi ngal a, nou lam ka nga ding a, kalhnen in na om ding ua, chi tuh in na omlai ding uhi.

¹⁰Na tung uah mihing ka pungsak ding a, Israel inkawte tengteng, avek un: mun sesate bawlphat in a om ding a, khopite luah in a om ding.

¹¹Na tung uah mi leh sa ka pungsak ding a, a pung un a lamzang ding uh: Na omdan masa bang in luahin k’on omsak ding a, a tung a na omdan sang ua hoih in k’on bawl ding hi: huchi in kei TOUPA ka hi chih na thei ding uh.

¹²Ahi, na tung uah mi ka vaksak ding a, ka mi Israelte ngei; a honluah ding ua, a goutan uh na hi ding a, tubansiah a tate uh na tansak ngei nawn kei ding hi.

¹³Hichi in TOUPA Pathian in a chi ahi: “Nang mihingte ne mang, na mite tansek na hi” a hon chih ziak un,

¹⁴Mihingte na ne bei nawnta kei ding a, na mite leng na tan ngei n’on sam kei ding, chih TOUPA Pathian thupawt ahi;

¹⁵Pautuam mite muhsitna k’on thuaksak nawn kei ding a, mite gensiat na thuak ngei nawn kei ding; na mite na tan ngei nawn kei ding, chih TOUPA Pathian thupawt ahi, chi in, a chi hi.

¹⁶TOUPA thu ka kiang ah a hongtung nawn a,

¹⁷Mihing tapa, Israel inkawte amau gam a a tenlai un a omdan uleh a thilhihte un a kihihnin ua; ka ma a a omdan uh numei kizenlouh lai a a sianthou louhna bang mai ahi.

¹⁸Huaiziak in gam tung ah sisan a suah ua, a milimte ua a kihihnit ziak un a tung uah ka hehna ka lungdam sak hi.

¹⁹Namte lak ah ka dalhsak a, gamchih ah a thehthangta ua: a omdan uleh a thilhihte uh bangzel in a tungthu uh ka gensak hi.

²⁰A vahohna namte kiang a tun un ka min siangthou a hihbuah ua; mite’n, “Hiaite TOUPA mite ahi ua, gam a kipan hong pawtkhia ahi uh” a na chih nakna uah.

²¹Himahleh Israel inkawte’n a vahohna namte lak a a hihbuah uh, ka min siangthou ka lainat ahi.

²²Huaiziak in Israel inkawte kiang ah, TOUPA Pathian in hichi in a chi ahi: Aw, Israel inkawte, noute k’on lainat ziak hilou in, na vahohna namte lak a na hihbuah uh, ka min siangthou ka lainat ziak zaw in hiai ka hih ahi.

²³Ka min thupitak, namte lak a buah, a lak ua noumau ngei a hihbuah ka siangthousak ding ahi; huchi in a mitmuh ua noute a hih siangthou a ka om hun chiang in TOUPA ka hi chih a thei ding uh, chih TOUPA Pathian thupawt ahi.

²⁴Namte lak a kipan ka hon pikhe ding a, gam tengtengakipan k’on kai khawm ding a, na gam mahmah uah k’on pilut ding hi.

²⁵Huan na tung uah tuichim ka theh ding a, na hong siangthou ding ua, na nitna tengteng uleh na milimte lak ua kipan ka honkhuah siang ding.

²⁶Lungtang thak ka honpe dia, na sung uah kha thak ka koih ding: na sa ua kipan lungtang suang bang a sak ka lamang ding a, lungtang sa bang a nip k’on pe zaw ding hi.

²⁷Na sung uah ka kha ka koih ding a, ka dan bawl ah k’on vaksak ding a, ka thupiakte na kem ding ua, na zui ding uh.

²⁸Na pipute uh kiang a ka piak gam ah na teng ding uh; nou ka mite na hi ding ua, kei na Pathian uh ka hi ding.

²⁹Na nitna tengteng ua kipan k’on hunkhe ding a, buh leh bal ka sam ding a k’on pungsak ding, na tung uah kial a ke nawn kei ding hi.

³⁰Singgahte ka pungsak ding a, louma ka pungsak ding a, kial ziak a namte lak a zahlakna na thuak kei ding uhi.

³¹Huchi in na omdan giloute uh, na thilhih hoihloute uh na theigige ding ua, na kihhuaina uleh na thulimlouhna uh ziak in noumau mitmuh mahmah in na kihta ding uhi.

³²Nou ziak a hiai hih ka hi kei chih na thei mai un, chih TOUPA Pathian thupawt ahi. Aw, Israel inkawte aw, na omdan ziak un zum unla, lamdangsa un.

³³Na thulimlouhna tengteng ua kipan k’on khuahsiang ni chiang in, khopite ka luahnawn sak ding a, mun sesa ka bawlnawn ding.

³⁴Huchi in gam sesa, tuma lam a mi vialvakte mitmuh a sesa nung himahleh leh in a om ding hi.

³⁵Hiai gam sesa nung Eden huan bang mai a honghi nawnta, a chi ding uh; khopi sia a, na kigawpsate luah leh um in a om nawn ding hi.

³⁶Huan na kim ua nam omlaite’n kei TOUPA’N mun siate ka bawl nawn a, gam na sekhinsa ka hihhoih nawnta chih a thei ding uh: kei TOUPA ka pauta a, ka hih ngei ding hi.

³⁷Huan TOUPA Pathian in hichi in a chi ahi: Huailou in hiai Israel inkawte k’on dingsak ding a; ganhon bang mai a a mite uh hihpung ding in.

³⁸Kithoihna ding ganhon, a Ankuanglui sehsa a Jerusalem ganhonte bang mai in; huchibang in khopi sesa nung mipi tampi in a hong dim ding ua; huchi in kei TOUPA ka hi chih a thei ding uh, a chi hi.