Read Paite Chin EZEKIEL 37 Bible Online

EZEKIEL 37 - Paite Chin bible

EZEKIEL 37

¹TOUPA khut ka tung ah a om a, TOUPA kha in a hon pikhia a, phaizang laitak ah honkoih a; huai phaizang guh ngen in a dim hi.

²Huan a lak uah a honpi vialvial a; phaizang ah guh tampi a na om lemlom a; ngai dih, a keu ngen ahi.

³Ka kiang ah, “Mihing tapa, hiai guhte a hing thei diam?” a chi hi. Ken, “Aw, TOUPA Pathian, nang na theizaw hi” ka chi hi.

⁴Huan aman ka kiang ah, “Thu gen inla, a kiang uah, ‘Aw, nou guh keute aw, TOUPA thu ngai un.

⁵Hiai guhte kiang ah TOUPA Pathian in hichi in a chi ahi: Ngai un, noute ah nakna ka lutsak ding a, na hing ding uh.

⁶Noute ah thagui ka koih ding a, sa in kontuam ding a, vun in k’on khuh ding; huan na sung uah nakna ka omsak ding a, na hing ding uh’; kei TOUPA ka hi chih na thei ding uh” chi in, a chi hi.

⁷Huchi in a hon thupiak bang in ka genta a; ka gen leh husa a hongom a, ngai in, a ging luilui a, guhte amau kizoppih chiat ah a kisutuah khawmta uh.

⁸Ka et leh, ngai in, amau ah thagui a hongom a, sa in a tuam a, vun in a khuhta a; nakna bel amau ah a om nai kei hi.

⁹Huchi in aman ka kiang ah, “Huih kiang ah thu gen inla, mihing tapa, gen mahmah in, huih kiang ah, TOUPA Pathian in hichi in a chi hi: Aw, Nakna, kawlmong li a kipan in hongpai inla, hiai mi thahte tung ah nak in, a hintheihna ding un, chi in, a chi hi.

¹⁰Huchi in a hon thupiak bang in ka gen a, nakna amau ah a honglut a, a hingta ua, amau khe chiat in ading ua, sepaih hon thupitak a hong hita hi.

¹¹Huchi in ka kiang ah, “Mihing tapa, hiai guhte Israel inkaw pumpi ahi ua: Ngai dih, amau, Ka guhte uh a keu khin in, ka lamet uh a bei khinta, phukmang in ka omta uh, a chi uhi.

¹²Huaiziak in thu gen inla, a kiang uah TOUPA Pathian in hichi in a chi hi: Ngai un, a hante uh ka hong ding a, aw, Ka mite aw, na han ua kipan k’on khah ding a; huchi in, Israel gam ah k’on pilut ding hi.

¹³Na hante uh ka hon a, na han ua kipan k’on pawtsak hun chiang in, aw, ka mite aw, TOUPA ka hi chih na thei ding uh.

¹⁴Huan noumau ah ka Kha ka koih ding a, na hing ding uh, na gam ngei uah k’on koih ding a; kei TOUPA’N ka chita a, ka hihlai ding ahi chih na thei ding uh, chih TOUPA thupawt ahi” a chi hi.

¹⁵TOUPA thu ka kiang ah a hongtung nawn hi.

¹⁶Nang, mihing tapa, chiang khat la inla, a tung ah, “Judah leh a kithuahpih Israel tate” chih gelh in: chiang dang leng la inla, a tung ah, “Joseph leh Ephraim chiang leh a kithuahpih Israel inkawte tengteng” chih gelh in.

¹⁷Huan chiangte peh inla, na khut a khat a hih theihna ding in.

¹⁸“Hiaite bang chihna ahi ua, n’on kawkmuh kei dia hia?” Na nam tate un na kiang a honchih uleh a kiang uah,

¹⁹TOUPA Pathian in hichi in a chi ahi: Ngai un, Joseph chiang, Ephraim leh a kithuahpih Israel chite khut a ka la ding a, huaite Judah chiang toh ka peh ding a, khat in ka bawl ding a, ka khut ah khat a honghi ding, na chi ding hi.

²⁰Chiang, a tung a na gelhnate mahmah a mitmuh ngei uah na khut ah a om ding hi.

²¹Huan a kiang uah, TOUPA Pathian in hichi in a chi hi: Ngai un, nam, a vahohnate uh lak a kipan ka pi ding a, ning chih a kipan ka kaikhawm ding a, a gam uah ka pilut ding hi.

²²Huan huai gam, Israel tangte ah nam khat in ka bawl ding a, kumpipa khat avek ua kumpipa ahi ding: huan, nam nih ahi nawnta kei ding ua, vaihawmna gam nih in leng a kikhen n’on sam kei ding hi.

²³A milimte uh, a thil kihhuaite uh, a tatleknate un leng a kihihnin ngei nawnta kei ding ua: a puk ua a khelhna nak tengteng ua kipan ka honkhe ding a, ka khuahsiang ding: huchi in ka mite ahi ding ua, kei a Pathian uh ka hi ding hi.

²⁴Ka nasempa David a tung ua kumpipa ahi ding a, avek ua tung ah belamching khat a om ding: ka thupiakte a mang ding ua, ka dan bawlte a zui ding ua, a zang ding uh.

²⁵Ka nasempa Jakob kiang a ka gam piak, na pipute uh na tenna sek ah a teng ding ua; huai ah tangtawn in a teng ding ua, amau leh a tate uh, a tate uh tate leng: ka nasempa David tangtawn in a heutu uh ahi ding hi.

²⁶Huailou leng amau kiang ah lemna thukhun ka bawl ding a, amau ading in tangtawn thukhun ahi ding a, a kiang uah kape ding a, amau ka pungsak ding a, a lak uah tangtawn in ka biakbuk ka dingsak ding hi.

²⁷Ka biakbuk leng a kiang uah a om ding a, a Pathian uh ka hi ding a, amau ka mite ahi ding uh.

²⁸Huan a lak ua tangtawn a ding a ka biakbuk adin hun chiang in kei TOUPA, Israel hih siangthoupa ka hi chih namte’n a thei ding uh, a chi, chi in.