Read Paite Chin EZEKIEL 38 Bible Online

EZEKIEL 38 - Paite Chin bible

EZEKIEL 38

¹TOUPA thu ka kiang ah a hongtung a:

²Mihing tapa, Magog gam a mi, Rosh leh Meshek leh Tubal heutupen Gog masuan inla, a tung ah thu gen inla.

³TOUPA Pathian in hichi in a chi ahi: Ngai in, aw Gog, Rosh, Meshek leh Tubal heutu pen, k’on dou ahi:

⁴K’on lehngat sak ding a, na haizek ah ngakuai in k’on kuai ding a, k’on khaikhe ding; na sepaih hon tengteng, sakol leh a tungtuang mite, galvan buching a kithuam tengteng, pawl thupitak, lum lian leh lum neu zang a namsau tawichiatte toh in.

⁵Persia, Kush, Putte toh, avek ua lum leh sik lukhu neite;

⁶Gomer leh a sepaih hon tengteng; Togarmah inkawte, maltawp a mi leh a sepaih hon tengteng, na kiang a mi tampipte toh leng.

⁷Kigalging inla, ahi, na man in, nang leh na kiang a omkhawm, na kithuahpih tengteng toh; huan amau vengpa na hi in.

⁸Ni tampi nung in sap khawm na hi ding a, kum nanungte ah namsau a kipan hotkhiak, nam tampite lak a kipan lakkhawmte omna gam, Israel tang se gigete na honsual ding; namte lak a kipan pikhiak a, tua avek ua lungmuangtak a a omna gam uh.

⁹Na kuantou ding a, huihpi bang mai in na hongtung ding a, meipi in gam a tuam moimoi bang mai na hi ding, nang leh na kiang a sepaih hon tengteng leh na kiang a mi tampite.

¹⁰Huan hichi in TOUPA in a chi ahi: Huai ni chiang in hichi ahi ding a, na lungsim ah thil a honglut ding a, thil hoihlou na suangtuah ding;

¹¹Huchi in, kulh neilou khuate gam ka sim ding a, mi bittak a om hiathiat, avek ua kulh lou a teng, kulh kongkhak leh a kalhna sik neiloute ka sual ding, na chi sim ding hi.

¹²Gallak sum leh vante la ding leh mun sesa nung luahnawn mite leh namte lak a kipan pikhawmsa, ganhon leh vante hau a, lei laizang a tengte tung ah na khut lik na tum ding hi.

¹³Sheba leh Dedan leh Tarshish sumsinmite leh a humpinelkai lunlai tengtengte’n na kiang ah, gallak la ding in na hongpai maw? Honlok ding a na pawlte honkhawm na hi maw? Dangkasik, dangkaeng, ganhon leh van, thupitak suhsak a lamang ding na hi maw? a honchi ding uh, chi in.

¹⁴Huaiziak in, mihing tapa, thu gen inla, Gog kiang ah, TOUPA Pathian in hichi in a chi hi: Huai ni, ka mi Israelte bittak a a om hun ding uh na theikei maw?

¹⁵Mallam gam tawp pek, na mun a kipan in na hongpai ding a, nang leh na kiang a mi tampi sakol tung tuang chiat, pawl thupi mahmah, sepaih hon thupitak mai.

¹⁶Meipi in gam a tuam lunglung bang in ka mi Israelte tung ah na hongpai ding; hichi ahi ding a, ni nanungte ah ka gam dou ding in konpi ding a, namte’n a hon thei ding ua, Aw, Gog, a mitmuh ua nang a hih siangthou a ka om hun chiang in.

¹⁷Huan TOUPA Pathian in hichi in a chi ahi: tuma lam a ka nasempa Israel zawlnei, huailai kum tampi sung a thu na gente’n amaute sual ding a k’on pi ding thu a gensek uh pa na hi hia? chi in, a chi hi.

¹⁸Huan huai ni’n hichi ahi ding a, Israel gam sual ding a Gog a hong kuan hun in ka hehna ka nak khukhe lunglung ding, chih TOUPA Pathian thupawt ahi.

¹⁹Ka mullit a ka thangpaih laitak in, huai ni’n Israel gam ah zin nakpi’n a ling ngeingei ding hi.

²⁰Huchi in tuipi ngate, tungleng vasate, gamsate, leitung a vak ganhing tengteng, leitung a mihing tengteng ka ma ah a ling ding ua, tangte niamsak in a om ding a, kawlte a chim ding a, kulh bang chih lei ah a puk ding, chi in ka gen hi.

²¹Ka tang tengteng ah amah sualna ding in namsau ka sam ding a; michih in namsau in a unaupa a dou ding, chih TOUPA Pathian thupawt ahi.

²²Huan sisan pawt leh hipi in amah ka sual ding a; amah leh a sepaih honte leh a kiang a mi tampite tung ah vuahpi leh gial thupi leh mei katte ka zusak ding.

²³Huan ka thupidan leh ka siangthoudan ka hihlang ding a, nam tampite mitmuh in ka kihih lang ding, huchi in, kei TOUPA ka hi chih a thei ding uh.