Read Paite Chin EZEKIEL 39 Bible Online

EZEKIEL 39 - Paite Chin bible

EZEKIEL 39

¹Huan, nang, mihing tapa, Gog tung ah thu gen inla, TOUPA Pathian in hichi in a chi ahi: Ngai in, Aw Gog, Rosh, Meshek leh Tubal heutu pen, ka hondou ahi:

²K’on lehngatsak ding a, k’on pi zel ding a, mal tawp pek a kipan k’on pikhe ding a, Israel tangte ah k’on tun ding hi:

³Na khut veilam a kipan na thalpeu ka kitansak ding a, na khut taklam a kipan na thalte ka kesak ding hi.

⁴Israel tangte ah na puk ding a, nang leh na sepaih hon tengteng leh na kiang a mipi omte toh: vasa sasialne chitengte kiang leh gam sahangte kiang ah nekkhit ding in k’on pe ding hi.

⁵Gamlak ah na puk ding a; ken ka chita a, chih TOUPA Pathian thupawt ahi, chi in.

⁶Magog leh tuigei gam a bittak a tengte tung ah mei ka khah ding; huchi in, kei TOUPA ka hi chih a thei ding uhi.

⁷Huan ka mi Israelte lak ah ka min siangthou ka hih lang ding a, ka min siangthou hihbuah ka phal nawnta kei ding a: huchi in namte’n kei, TOUPA Israel Mi siangthoupa ka hi chih a thei ding uhi.

⁸Ngai un, a hongtung hi: hih tangtun in a om ngei ding, chih TOUPA Pathian thupawt ahi; hiai ni ahi ka na gen.

⁹Huan Israel khopi a tengte a pawtkhe ding ua, galvante a khul ding ua, a kangmang ding; lum lian leh lum neute, thal leh a peute, teipi leh chiang zumte kum sagih sung a khul ding uhi.

¹⁰Huchi in gam sing a pokei ding ua, gammang singte a phuk kei ding uh, galvante sing khul ding in a zang ding ahi ngal ua; gallaklamite gallak in a latei ding ua, a lokmite a lokthuk ding uh, chih TOUPA Pathian thupawt ahi.

¹¹Huan huai ni’n hichi ahi ding a, Gog ding in Israel gam ah vuina mun ka sep ding a, tuipi suahlam, Abarim guam ngei; huai in khualzinte a dal ding, Gog leh a lawite a vui ding ua; huchi in, huai guam Hamongog guam a sa ding uhi.

¹²Huan Israel inkawte’n a gam uh khuahsiang in kha sagih sung a vui ding uh.

¹³Ahi, a gam ua mi tengteng in a vui ding ua; pahtawi a ka om ni’n ka minthanna ahi ding, chih TOUPA Pathian thupawt ahi.

¹⁴A gam uh khuahsiang na din, luang vuilouhte teng zongkhia a vui ding in nasep a neiding mi a septuam ding uh, kha sagih beinung in a zong pan ding uhi.

¹⁵Gam velmite’n a vel un, mihing guhte a muh uleh chiamtehna a bawl ding ua, Hamongog guam a vuimite’n a vui ma uh.

¹⁶Huan Hamonah khopi min ahi ding. Huchibang in gam a khuahsiang ding uhi.

¹⁷Nang, mihing tapa, TOUPA Pathian in hichi in a chi ahi: Vasa chichihte leh sa chichihte kiang ah thu gen inla, Pung khawm unla, hongpai un, sa na nek ua sisan na dawn theihna ding un Israel tang a kithoihna thupitak, nou adia ka bawl kim ah hong kikhawm un.

¹⁸Mi thupi sate na ne ding ua, lei a heutute sisan na dawn ding ua; belamtalte, belamnoute, kelte, Bashan gam a bawngtal vak thau tengteng sisan toh.

¹⁹Nou dia kithoihna Ankuang ka lui thau, vah kikeih in na ne ding ua; a sisan kham khop in na dawn ding uh.

²⁰Huchi in sakolte, kangtalai kai mite, mi thupite leh galdoumi tengteng in ka Ankuang ah na tai ding uh, chih TOUPA Pathian thupawt ahi.

²¹Huchi in namte lak ah ka thupina ka koih ding a, nam tengteng in a thu gel hihpuksate leh a tung ua ka khut khakdante a mu ding uh.

²²Huai ni a kipan Israel Inkawte’n kei TOUPA a Pathian uh ka hi chih a theita ding uh.

²³Namte’n Israel inkawte a thulimlouhna ziak un salin a tang uh ahi chih a thei ding ua; ka tung a ginom louh mahmah ziak un amau tung ah ka mel ka sel a, huchi in a melmate uh khut ah ka pia a, namsau in a puk vek uhi.

²⁴A sianthou louhna bang zel uleh a tatlekna bang zel un a tung uah ka hihtei a; amau a kipan ka mel ka sel ahi.

²⁵Huaiziak in TOUPA Pathian in hichi in a chi ahi: Tun zaw Jakobte omdan ka hei ding a, Israel inkuan pumpi tung ah zah ka ngai ding, ka min siangthou gum in ka thikthu a se ding hi.

²⁶Kuamah lausakmi omlou a, a gam ua bittak a a ten hun un leng a tatlekna tengteng uh, ka tung a a tatlekna uh leh a zahlakna uh a paw ding uhi.

²⁷Mite lak a kipan ka pikhiak nawn a, a melmate uh gam a kipan ka kaihkhawm a, amau nam tampi mitmuh a hih siangthou a ka om hun chiang in.

²⁸Huan namte lak a sal a ka tansak nawn a, a gam ngei ua ka pikhawm nawn dan ah kei TOUPA a Pathian uh ka hi chih a thei ding uh; huai ah a lak ua khat lel leng ka nuse kei ding hi;

²⁹Amau a kipan ka mel ka sel nawnta kei ding: Israel inkawte tung ah ka kha ka sungta ngal a, chih TOUPA Pathian thupawt ahi, chi in.