Read Paite Chin EZEKIEL 4 Bible Online

EZEKIEL 4 - Paite Chin bible

EZEKIEL 4

¹Nang mihing tapa, teklei pek la inla, na ma ah koih in, huai tung ah khopi Jerusalem khopi lim bawl in.

²A kim a um in kulh khohkhum inla, mualpawng bawlkhum in sepaih giahbukte bawlkhum inla, kulh suksiatnate a kim in bawlkhum in.

³Sikpek la inla, nangmah leh khopi kikal ah sik bang ding in tung in; huai lam masuan inla, um in a om ding a, nangmah in na um ding ahi. Hiai Israel inkawte adia etsak kholhna ahi ding.

⁴Huan nang bel na veilam pang delh in lum inla, a tung ah Israel inkawte gitlouhna nga in; a tung a nalup sung ni zah bangzel a gitlouhna uh na puak ding ahi.

⁵A gitlouhna kumte uh nang ading a nite hi ding in lah ka septa ngal a, ni za thum leh ni sawmkua ding: Huchibang in Israel inkawte gitlouhna na paw ding ahi.

⁶Hiaite na khit hun chiang in na taklam pang delh in na lum leuleu dia, Judah inkawte gitlouhna na paw ding: ni sawmli nang din ka sep a, ni khat kum khat zel hi ding in.

⁷Na ban khuhlou a zak in Jerusalem kisim lam nga inla, a tungthu gen khia in.

⁸Ngai in, khauhual in k’on hentawm a, khopi kisim sung nite a bei masiah koilam ah leng na kihei ding ahi kei hi.

⁹Buh, buhman, be, behiang, vai buhman la inla, bel khat ah koih inla, tanghou in bawl in; na pangkhat delh a na lup sung teng, ni za thum leh sawmkua sung, huai na ne ding ahi.

¹⁰Na an nekding tehvek ding ahi, nikhat in sekel sawmnih ahi ding ahi: hunbi neitak in na ne ding hi.

¹¹Tuite leng tehvek in na dawn ding ahi, hin khat seh guk suah a seh khat ahi ding ahi, hunbi neitak in na dawn ding ahi.

¹²A mit muh un mihing ekgaw sing dia zang in na kang ding a, buhman tanghou nek in na ne ding, a chi hi.

¹³Huchi in TOUPA’N, “Hichibang an thanghuai Israel tate’n ka delhmangna ding namte lak ah a ne ding uh” a chi hi.

¹⁴Huan ken, “Eh! TOUPA Pathian, Ngai dih, ka hinna hihnit ahi ngeikei a, ka tuailai a kipan tutan in leng, amah sih a si hiam, gamsa keih hiam ka ne ngei naikei a, sa kihhuai ka kam ah a lut ngei naikei hi” ka chi hi.

¹⁵Huan aman ka kiang ah, “En in, mihing ek sik in bawng ek k’on pia, huaite zang in nek dingte na bawl ding hi” a chi hi.

¹⁶Huailou leng ka kiang ah, aman, “Mihing tapa, ngai dih, Jerusalem ah, an hinna bul ka hihse ding a, a an uh tehvek in lauthawng tak in a ne ding uh; tui leng tehvek in, lungkhamtak in a dawn ding uhi.

¹⁷An leh tui tasam a, lungkhamtak a kientuah a, a gitlouhna ua a thammang khitna ding un.”