Read Paite Chin EZEKIEL 40 Bible Online

EZEKIEL 40 - Paite Chin bible

EZEKIEL 40

¹I saltan kum sawmnih leh ngana, huai kum bul kha ni sawmna, khopi siatnung kum sawmlehlina, huai ni mahmah in TOUPA khut ka tung ah a hongom a, huai ah a honpi hi.

²Pathian kilakna ah Israel gam ah a honpi a, tang sangtak ah a honkoih a, huai simlam ah khopi dinsaksa bangtak a om hi.

³Huai ah a honpi a, ngai dih, mi khat a na om a, a mel latdan dal bang mai ahi a; khauzang leh tehna chiang a tawi a, kongpi ah ading hi.

⁴Huan, huai mi in ka kiang ah, “Mihing tapa, na mit in en inla, na bil in doh in; k’on etsak ding lam ah na lungsim nga chinten in; huai k’on etsak ding ziak a hiai a konpi na hi ngal a: na muh tengteng Israel inkawte kiang ah phuang in” a chi hi.

⁵Huan ngai dih, inn kim ah kulhbang a na om a, huai mi’n tehna chiang, tong guk a sau a tawi a, a tong khat bel tong khat leh khutpek bok chia ahi a; kulh bang sah lam a teh a, chiang khep khat ahi a, a san lam leng chiang khep khat mah ahi.

⁶Huchi in suahlam chial kongpi a hongtung a, a kalbi ah a paitou a; kongpi lutna dantan a teh a, chiang khep khat a za ahi.

⁷Huan vilna dantante a dunglam chiang khep khat, a vailam chiang khep khat chiat ahi; vilna dantan kikal tong nga chiat ahi a; huan Inpi lam kongpi sumtong kongpi lutna dantan chiang khep khat ahi.

⁸Inpi lam sumtong leng a teh a, tong giat ahi.

⁹A bangkate tong nih chiat ahi a, kongpi sumtong Inpi lam ah ahi.

¹⁰Huan suahlam kongpi vilna dantante a langtuak ah thum tuaktuak ahi a, a thum un a kikim vek uh ahi: huan, bangkate leng a langtuak ah a kikim ahi.

¹¹Kongpi lutna vailam a teh a, tong sawm ahi a; kongpi pai suakna vailam tong sawmthum ahi.

¹²Huan vilna dantan ma ah deidanna langkhat ah tong khat a sah tuaktuak a om a; huchi in vilna dantante langtuak tong guk tuak ahi hi.

¹³Huan, kongpi a teh a, vilna dantan khat tung a kipan a a langkhat tungpha in tong sawmnih leh nga a za ahi, kongkhak leh kongkhak kizom chiat in.

¹⁴Sumtong leng a teh a, tong sawmnih ahi a; kongpi sumtong pua bel huangsung ahi kei hi.

¹⁵Huan kongpi pawnungpen a kipan a kongpi sumtong sunggil pen chiang tong sawmnga ahi.

¹⁶Huan kongpi sunglam ah a kimvel in dantante ah tohlet hon theihlouh a om a, a kikal a khuamte ah leng; a sumtongte ah leng, a sunglam ah leng a kimvel in tohlet a om a, a khuamte ah tum singlim a om chiat nawn hi.

¹⁷Huan huangsung pawnung zaw ah a honpi a; ngai dih, dantante a om a, huangsung a kimvel in suanglep ahi a; huan, suanglep ah dantan sawmthum a om hi.

¹⁸Huan suanglep bel kongpi a kipan a lep ahi a, kongpi tan ding mah a lep ahi a, huai bel suanglep nuainung zaw ahi.

¹⁹Huchi in kongpi nuai zaw pen zawn a kipan in huang sungnung zaw pen pawlam pha in a teh a, a zatdan suahlam leh a mallam leng tong za khat ahi..

²⁰Huan, huangsung pawnung zaw pen kongpi mallam pang a a dung leh a vai leng a teh hi.

²¹Huan vilna dantante a langtuak ah thum tuaktuak a om a, a bangkate leh a kongpi sumtongte leng amasa bang vek ahi; a dung tong sawmnga ahi a, a vai tong sawmnih leh nga.

²²A tohlette a sumtongte a tumsing limte suahlam kongpi a bang vek ahi; kalbi sagih a omtou a; a sumtong a sunglam ah a om hi.

²³Huang sungnung zaw pen lutna ding kongpi bel kongpi dang zawn ah a om zel a, mallam leh suahlam ah leng; kongpi leh kongpi kikal a teh a, tong za ahi.

²⁴Huan, simlam ah a hon pinawn a, ngai in, simlam kongpi a na om a; a tehdan ngei in a bangkate leh a sumtong a teh hi.

²⁵Huai ah a dangte bangmah in a kimvel in tohlette a om a, a sumtong ah leng; a dung tong sawmnga ahi a, a vailam tong sawmnih leh nga ahi.

²⁶Huan kalbi sagih a omtou a, sumtong a sunglam ah a om a; a langtuak a bangkate ah tumsing lim a om zel hi.

²⁷Simlam ah huang sungnung lutna ding kongpi a om a, simlam kongpite kikal a teh a, tong za khat ahi.

²⁸Huan simlam kongpi ah huang sungnung zaw pen ah a honpi a, tehna ngei in simlam kongpi a teh a;

²⁹Vilna dantante, a bangkate sumtongte tehna mah in; huai ah tohlette a om a, a sumtong leng a kimvel in: a dunglam tong sawmnga, a vailam tong sawmnih leh nga ahi.

³⁰Huan a kimvel ah sumtongte a om a, a dunglam tong sawmnih leh nga, a vailam tong nga ahi.

³¹A sumtongte huangsung pawnung zaw lam a nga a; a bangkate ah tumsing lim a om a: a kahtouhna in kalbi giat a nei hi.

³²Huan suahlam ah huang sungnung zaw pen ah a honpi a, a tehna ngei in kongpi a teh hi;

³³A vilna dantante, a bangkate, a sumtongte tehna mah in: huai ah tohlette a om a, sumtong leng a kimvel in: a dunglam bel tong sawmnga, a vai lam tong sawmnih leh nga ahi.

³⁴A sumtongte’n huangsung pawnung zaw pen lam a nga a, a bangkate ah langtuak ah tumsing lim a om a; a kahtouhna in kalbi giat a nei.

³⁵Huan mallam kongpi ah a honpi nawn a: a tehna ngei in a teh a; a vilna dantante, a bangkate, a sumtongte;

³⁶Huai ah a kimvel in tohlette a om a: a dunglam tong sawmnga ahia, a vailam tong sawmnih leh nga.

³⁷A bangkate huangsung pawnung zaw pen lam ah a om a; a bangkate ah a langtuak ah tumsing lim a om hi: a kahtouhna in kalbi giat a nei hi.

³⁸Kongpi sumtong a kipan a lut theih in dantan a om a, huai ah haltum kithoihna ding a silzel uhi.

³⁹Kongpi sumtong langtuak ah dohkan nih tuak a om a; haltum kithoihnate, khelh ziak a kithoihnate, mawh ziak a thillatte gohna ding.

⁴⁰Mallam kongpi lutna kahtouhna pawlam sik khat ah dohkan nih a om a; kongpi sumtong langkhat ah leng dohkan nih a om nawn hi.

⁴¹Huchi in kongpi sik langkhat ah dohkan li a om a, a langkhat ah dohkan li a om nawn; kithoihna gan gohna dohkan giat ahi.

⁴²Huan haltum kithoihna dia dohkan li, suangsek a bawl, a dunglam tong khat leh a kimkhat, a vailam tong khat leh a kim khat, a sanlam tong khat a om a: huai ah haltum kithoihna leh thillat gohna ding vanzatte a koih zel uhi.

⁴³Huan a sunglam ah a kimvel in kuaika, khutpek khuh a sau a bulh ua; dohkan tungte ah thillatsate a om hi.

⁴⁴Huan huang sungnung zaw pen ah a hon pilut a, ngai dih, huang sungnung zaw pen ah dantan nih a na om a; khatpen mallam kongpi chin ah, simlam nga in a om a, khatpen simlam kongpi chin ah mallam nga in a om hi.

⁴⁵Huan aman ka kiang ah, Hiai dantan simlam nga, a inkem siampute omna ahi a;

⁴⁶Dantan mallam nga maitam kem siampute omna ahi; hiaite Zadok tate, Levi tate lak a a nasem ding a TOUPA hongnaih sekte ahi uh, a chi hi.

⁴⁷Huan huangsung a teh a, a dunglam tong za khat, a vailam tong za khat, kimkot ahi; maitam bel intual laitak ah a om hi.

⁴⁸A tempul inlim ah a honpita a, sumtong bangkate a tehchiat a, a langtuak ah tong nga a sah tuaktuak a om a, a lutna tong sawm leh tong li a za ahi; a siktuak a kongpi bangkate tong thum tuaktuak ahi.

⁴⁹A sumtong a dunglam tong sawmnih, a vailam tong sawmlehnih ahi a; lut touhna ah kalbi sawm a om a, bangka chin ah a langtuak ah khuam lian a om hi.