Read Paite Chin EZEKIEL 41 Bible Online

EZEKIEL 41 - Paite Chin bible

EZEKIEL 41

¹Huan biakin ah a hon pilut a, a bangkate a teh a, a sik tuak ah tong guk a sah tuaktuak a om a, huai bel biakbuk vailam chia ahi.

²Huan a lutna tong sawm a za ahi a; a sik tuak ah bangkate tong nga tuaktuak ahi; huan asung a dung tong sawmli, a vai tong sawmnih ahi.

³Dantan sungnung ah a lut a, a lutna bangkate tong nih a sah tuaktuak ahi a; a lutna tong guk a za ahi a; a lutna bangkate tong sagih tuaktuak ahi.

⁴Dantan sungnung a teh a, a sungpi ban ah a dunglam tong sawmnih ahi a: a vailam leng tong sawmnih ahi. Huan ka kiang ah, hiai Mun Siangthou pen ahi, a chi hi.

⁵Huan a Inpi bang a teh a, tong guk a sah ahi; huan a sik chih ah dantan tong li a za chiat a om hi.

⁶Huan chial thumte ah pang dantante a om ua, huchi a huailai a letkipna a neihtheih louhna ding un, inn lam bang a letkipna neilou in.

⁷Huchi in a pang dantante a hong san hiaihiai in a za semsem a; a bangte a zuih touh ziak in, a kimvel in a sungpi a naih hulhul hi. Huchi in dantan nuainung pen a kipan a tungnungpen pha a pai ding in a lai a kantan ding ahi.

⁸Huan Inpi kim ah suanglep vum om in ka mu a; pang dantan suangphum tehna chiang, tong guk hial a sau tan a sang ahi.

⁹Pang dantan pawlam bang tong nga a sah ahi; pang dantan pawlam bang ban ah tong nga a awl lai hi.

¹⁰Inpi suanglep vum leh huangsung dantante kikal a kim in tong sawmnih a za ahi.

¹¹Pang dantan kongkhakte mun awl lam a hon ahi a, khat ngial in nga ahi, khat simlam a nga ahi: a kim a mun ong tong nga a za ahi.

¹²Huan tumlam a Inpi phaitam mun ong ban ah inn tong sawmsagih a za ahi; huai inn bang a kim in tong nga a sahvek ahi a, a dung tong sawmkua ahi.

¹³Huan Inpi a teh in tong za a sau ahi; Inpi phaitam mun ong leh huai inn bang sahdan sim tel in tong za ahi nawn hi;

¹⁴Inn kongtual munawng tong za a sau ahi.

¹⁵Huan Inn phaitam munawng khen a inn dunglam a teh a, a pang tuak a bangte huap in tong za ahi.

¹⁶Huan a sungpite, mun siangthoupente, pawlam sumtongte singpek in a thuap ua; a thum un a kimvel in hon theihlouh tohlet leh inchial a nei a; a inpi lutna kongpi tan in a pialkhang a kipan a tohlet pha a a pum a singpek a thuap ahi, tohlet leng thuap ahi lai hi.

¹⁷Kongpi lu tungte, dantan siangthoupente leh a pawlam toh, bang tengteng a sunglam leh a pawlam tan in.

¹⁸Huaite Cherub limte leh tumsing limte a zep ahi a, Cherub leh Cherub kikal ah tumsing a om zel a; Cherubte’n mai nih a neichiat uhi.

¹⁹Mihing mel bang in langkhat a tumsing lam a nga a, humpinelkai tuailai mel bang in langkhat a tumsing lam a nga nawn hi. Hiaite inn kimvel vek in a gelh uhi.

²⁰A pialkhang a kipan in kongpi tung pha in Cherub leh tumsing lim a zepvek ahi; Inpi bang bel huchi vek ahi.

²¹Sungpi kongpi biang khuamte bel a sah a zat kibang ahi. Mun Siangthoupen ma ah sing a bawl maitam bangtak a om hi.

²²Tong thum a sang, tong nih a za, a ningte, a tawte leh a pangte sing a bawlvek ahi. Huan aman ka kiang ah, "Hiai TOUPA ma a dohkan ahi," a chi hi.

²³A sungpi leh Mun Siangthoupen in kongkhak nih tuaktuak a nei hi.

²⁴Kongkhak in phel nih a nei tuaktuak a; a phel khat bel kheptheih chiat ahi; kongkhak khat ah phel nih, a dang ah phel nih a nei hi.

²⁵Bang a a gelh mah bang un sungpi kongkhakte ah Cherub leh tumsing lim a gelh chiat lai ua; sumtong pua ah singpek sah mahmah a phalh uhi.

²⁶Huan sumtong bang langtuakte leh singpek phalhte ah tohlet hon theihlouh leh tumsing lim a omlai a; a Inpi pang dantan leh sing pek phalh leng huchibang mah ahi.