Read Paite Chin EZEKIEL 42 Bible Online

EZEKIEL 42 - Paite Chin bible

EZEKIEL 42

¹Huan huang sungnungzaw malam pang ah a hon pikhia a; mun ong zawn mallam kulh khuam doh dantan ah a hon pilut hi.

²Mallampang a dantante tong za a sau tong sawmnga a za ahi a.

³Huang sungnung zaw pen mun ong tong sawmnih lamnga leh huang pawnung zaw suanglep lamdoh inchial thum a om tuaktuak hi.

⁴Dantante kikal ah tong sawm a za, tong za a sau paisuakna a om a, a kongkhakte’n mallam a nga hi.

⁵Dantan tungnungte a kawchik zaw a; inchial nuainung zaw leh a laitate sang in a inchialte’n mun lian a luahzaw uhi.

⁶Chial thum a lam ahi a, huangsung khuamte bang in khuam a nei ngal kei a; huchi in a laita sang in a tungnungpen a kawchik a, a laita leng a nuainung pen sang in a kawchikzaw lai hi.

⁷Huan dantan pang pawlam ah huangsung pawnung zaw pen lamdoh bang tong sawmnga a sau a om hi.

⁸Huang sung pawnung zaw a dantante tong sawmnga a sau ahi ua: Inpi zul a pen tong za a sau ahi.

⁹Huan huai dantante nuai ah suahlam pang ah huangsung pawnung zaw a kipan a lutna a om a, pawlam bang kiban sapna ah.

¹⁰Simlam ah leng mun ong zawn a kulh bang doh in dantante a om nawn hi;

¹¹A ma a paina leng mallam dantante paina mah bang ahi a: a dung leh a vai leng, a pawtkhiaknate, a lepkhawm dante, a kongkhakte’n simlam a nga chih kia loungal kibang vek ahi.

¹²Huai dantante lutna ding paisuakna tawp suahlam bangchi’n ah kongkhak a om hi.

¹³Aman ka kiang ah, “Simlam leh mallam dantan, mun awl hondohte dantan siangthoute ahi ua; thil siangthoute a koihkhawm ua; nekding latnate, khelh ziak a kithoihnate, mawh ziak a kithoihnate a latna ding uh ahi: a mun bel Mun Siangthou ahi.

¹⁴Huailai a siampute a lut phot uleh, Mun Siangthou a kipan in huangsung pawnung zaw ah a pawtkhe ding uh ahi kei; huai ah a nasepna puansilhte uh a koih zawding ua, puansilh siangthou ahi ngal ua; puansilh dang silh kia in vantang lak ah a gamtang thei ding uh” a chi hi.

¹⁵Inpi sungnungzaw pen a teh khit in suahlam nga kongpi ah a hon pikhia a, a kimvel in a teh hi.

¹⁶Tehna chiang in suahlam pang a teh a, tong za nga ahi a; a tehna chiang a teh in.

¹⁷Mallampang a honteh nawn leuleu a, tong za nga ahi a, a tehna chiang a teh in.

¹⁸Simlampang a teh nawn a, tehna chiang a teh in tong za nga mah ahi.

¹⁹Huan tumlam a hon teh nawn a, a tehna chiang a teh in tong za nga mah ahi.

²⁰A pang li in a tehta a: a dunglam tong za nga, a vailam tong za nga ahi; a kim in kulhbang nei ahi a; huai mun siang leh siang lou deidanna ding a bawl ahi.