Read Paite Chin EZEKIEL 43 Bible Online

EZEKIEL 43 - Paite Chin bible

EZEKIEL 43

¹Huchi in kongpi ah, suahlam kongpi ah a honpi hi.

²Ngai dih, Israel Pathian thupina suahlam a kipan in a hongtung a; a husa tui tampi ging bang a hi a, lei a thupina in a tanvak hi.

³Kilakna ka muh a a latdan, khopi hihse ding a a hongpai leh Kebar luigei a kilakna ka muh bangmah ahi a; huchi in, khupboh in ka pukta hi.

⁴Suahlam nga kongpi ah a Inpi sung ah TOUPA thupina a lut hi.

⁵Kha in a hon domkang a, huang sungnungzaw ah a hon pilut a; huan, ngai in, TOUPA thupina in a inn a dimvekta hi.

⁶Huan mi khat ka kiang a a dinlai in mi kuahiam hon houpih in ka za a, ka kiang ah,

⁷Mihing tapa, hiai ka mangtutphah omna mun, ka khepek ngakna, Israel tate lak a tangtawn a ka tenna ding mun ahi: ka min siangthou Israel Inkawte’n amau in hiam, a kumpipate uh hiam, a hukna uleh a kumpipate uh luangvuina a zang in a hih thanghuai nawnta kei ding uh;

⁸A kongpi uh ka kongpi chin mahmah a bawl in, a kongpi biang uh ka kongpi biang zul a koih in amau leh keimah kikal ah bang kia omsak in a thilhih kihhuaite un ka min siangthou a hih thanghuai uhi; huaiziak in ka hehna in amau ka hihmangta hi.

⁹Tu a kipan in huknate, a kumpipa uh luangte kei a kipan a gamlapi ah koihmang le uh; huchi in a lak uah tangtawn in ka teng ding hi.

¹⁰Nang mihing tapa, a Inpi lim uh Israel Inkawte kiang ah ensak in; a thil hihkhelh uh a zumpih theihna ding un, a bawldan ding leng na teh uhen.

¹¹Huan a thilhih tengteng uh a zumpih ua a Inpi omdante, a pawtkhiaknate, a lutnate, a geldante, a zatdante, a kepdante ensak inla, a mitmuh mahmah uah gelh in; a dan pumpi leh a zatdan tengteng a vom ua, a zuih theihna ding un.

¹²Hiai a Inpi adia dan ding ahi: tang vum tungtam kim tengteng mun siangthoupen ding ahi; ngai dih, hiai Inpi adia dan ding ahi.

¹³Huan tong a teh in hiai maitam letlam ahi, tong khat chih tong khat leh khutpek tuam ahi, a kingakna tong khat a sang, tong khat a za, a gei a kim a khap khat a pawng zel ahi.

¹⁴Huan maitam sanlam hichibang ahi: lei a a kingakna a kipan a dohdan nuainungzaw pen tong nih ahi a, a zatlam tong khat; a dohdan neuzaw pen a kipan a a dohdan lianzaw pen tong li ahi a, tong khat a za ahi.

¹⁵A maitam tungtam tong li a sang ahi nawn a, maitam tungtam a kipan in ki li ading hi.

¹⁶Maitam tungtam a dung leh a vai tong sawmlehnih tuaktuak ahi; a dung a vai kikim ahi.

¹⁷A dohdan a dung leh a vai tong sawmlehli tuaktuak ahi; a dung a vai kikim ahi: a gei tong kimkhat ahi: a kingakna a kim in tong khat ahi; a kalbi in suahlam a ngat ding ahi, a chi hi.

¹⁸Huan ka kiang ah, Mihing tapa, TOUPA Pathian in hichi in a chi ahi: A bawl khit chiang ua maitam zatdan ding hichibang ahi: Halmang kithoihna dingte, sisan thehna dingte ahi.

¹⁹Levi chi siampu Zadok suan a mi, n’on sepsak ding a honnaih sekpa kiang ah khelh ziak a kithoihna ding in bawngpa tuai na piak ding ahi, chih TOUPA Pathian thupawt ahi.

²⁰A sisan na la dia, maitam ki lite leh a dohdan ning lite, a gei kimvel in na luan ding a; huchibang in maitam na hihsiang in na siangsak ding hi.

²¹Khelh ziak a kithoihna bawngpa tuai na la ding a, Mun Siangthou pawlam a, huai ding a inn a seh ua hal ding ahi.

²²Huan a ni nihna in keltal, dem bei, khelh ziak a kithoihna ding a lat ding ahi; huchi in maitam bel bawngpa tuai a a hihsiang mah bang un na siangsak ding hi.

²³Maitam hihsiangpen na hih khit chiang un bawngpa tuai gensiat bei leh belamtal, gensiat bei, a hon lak a na lan ding hi.

²⁴TOUPA ma ah na lan ding a, siampu in chi a soh ding a, TOUPA kiang ah haltum ading in a lan ding.

²⁵Ni sagih sung ni teng khelh ziak a kithoihna ding in keltal na zang ding ahi; bawngpa tuai leh belamtal, a hon lak a, gensiat bei leng a zat ding uh ahi.

²⁶Maitam hihsiang leh siansakna in ni sagih a la ding a; huchi in maitam siangthou ahita ding hi

²⁷Huan huai nite a hih tangtun khit chiang un, a ni giat ni a kipan in siampute’n na haltum kithoihnate uh leh lemna kithoihnate a maitam uah a lan ding ua, huan k’on na sang ding chih TOUPA Pathian thupawt ahi, a chi hi.