Read Paite Chin EZEKIEL 44 Bible Online

EZEKIEL 44 - Paite Chin bible

EZEKIEL 44

¹Huan Mun Siangthou kongpi pawnung zaw, suahlam a nga ah a honpi kiknawn a, kong khaksa a na hi.

²TOUPA’N ka kiang ah, hiai kongpi a kikhak gige ding a, a kihong kei ding a, kuamah a lut sam kei ding uhi; TOUPA, Israel Pathian a honglut khit ziak in; a kikhak gige ding ahi.

³Kumpi bel TOUPA ma a an ne ding in huai ah a tu phet ding; sumtong kongkhak ah a lut ding a, huai mah ah a pawtnawn ding, a chi hi.

⁴Huan mallam nga kongpi ah Inpi intual ah a honpi a; ka en a ngai dih, TOUPA inn TOUPA thupina in a dimvek a; huchi in khupboh in ka pukta hi.

⁵TOUPA’N ka kiang ah, Mihing tapa, TOUPA in zatdan leh a dan tengteng na kiang a ka gen tungtang ah na bildoh inla, na mitsuan inla, na lungsim ah chiamteh hoih dih: a Inpi lut dante, a Mun Siangthou a kipan pawtdante, na lungsim ah hoihtak in chiamteh in.

⁶Huan helhat, Israel inkawte ngei kiang ah huchi in na gen ding ahi: TOUPA Pathian in hichi in a chi hi: Aw, nou Israel inkawte aw, na kihhuaina tengteng uh behlap ding a pautuam mi,

⁷Lungtang leh sa zeksum louh, ka tanghoute, thaute na lat lai ua ka Mun Siangthou, ka inn mahmah hihbuah ding a na pilut ua, ka thukhun a na tatlek uh, na kihhuaina tengtengte uh na tawpta hen.

⁸Ka thil siangthoute nou na kem kei ua, hiai pautuam mite ka Mun Siangthou ah nou sik a kemmi in na sepzaw uhi.

⁹TOUPA Pathian in hichi in a chi ahi: Pautuam mi kuamah, lungtang leh sa zeksumlouh, Israel tate lak a pautuam mi ka Mun Siangthou ah a lut ding uh a hi kei hi.

¹⁰Levi chi, Israelte milim delh a a vakmang lai ua kei a kipan a gamlapi a paisate’n bel a thulimlouhna uh a paw ding uh.

¹¹Ka Mun Siangthou ah nasemmi in a pang ding ua; Inpi kongkhakte a ngak ding ua; Inpi sung ah na a sem ding uh: haltum kithoihnate, mipi adia kithoihnate a gou ding ua; mipi na sepsak ding in a ma uah ading ding uhi.

¹²A milimte uh ma ah a na uh a sepsak ding ua; Israelte Inkawte adin thulimlouhna a pukna a hihnak ziak un a tung uah ka khut ka lik ding a; a thulimlouhna uh a paw ding uh, chih TOUPA Pathian thupawt ahi.

¹³Huchi in ka kiang ah siampu nasem ding in a honnaih ngeikei ding ua; ka thil siangthoute, thil siangthoupente a honnaih ngei sam kei ding uh; a zahlakna uleh a thil kihhuai hih sate uh a paw zaw ding uh.

¹⁴A Inpi kemmite ding in ka bawl ding a, nasepna tengteng leh hih ding om peuhmahte hih ding in.

¹⁵Siampu Levi chi, Zadok ta, kei a kipan a Israel tate a vakmanglai ua ka Mun Siangthou kemmite’n bel ka nasem ding in a hongnaih ding uh; thau leh sisan lan ding in ka ma ah ading ding uh, chih TOUPA Pathian thupawt ahi.

¹⁶Ka Mun Siangthou ah a lut ding ua, nna hon sepsak ding in ka dohkan a honnaih ding ua, kei hon kemmi in a pang ding uh.

¹⁷Huan, huang sungnungzaw kongpite a a lut un puanaktual malngat in a kithuam ding ua, huang sungnungzaw leh inn sunglam a na a sep sung un samul puan a silh ding uh ahi kei hi.

¹⁸Dial malngat a khim ding ua, puanmalngat pheitom a bun ding ua, kho-ul sak thei a silh ding uh ahi kei hi.

¹⁹Huan huangsung pawnung zaw, vantang kiang a a hong pawtkhiak uleh a nasepna puansilhte uh a suah ding ua, dantan siangthou ah a koih ding uh, puansilh dang a silh ding uh; mipite a puansilh ua misiangthou a a bawl tei louhna ding un.

²⁰A lute uh a metgiau ding uh ahi kei a; a sam uh leng a hawisau ding uh ahi sam kei; a met lel ding uh ahi.

²¹Siampu peuhpeuh huang sungnung zaw pen a lut chiang un uain a dawn ding uh ahi kei hi.

²²Meithai hiam maksa nung hiam zi in a nei ding uh ahi sam kei hi; Israel Inkawte, nungak siangthou hiam siampu sihsan meithai a kitenpih zawk ding uh ahi.

²³Ka mite thil siangthou leh siangthoulou kibatlouhdan a hilh ding uh ahi; thil siang leh siang lou a khentuam sak ding uhi.

²⁴Thubuaite leng a ngaihtuah ding uh ahi; ka ngaihtuah bangzel in a ngaihtuah ding uh: Ka Ankuanglui sehsa tengteng ah ka dante leh ka dan bawlsate a zuih ding uh ahi; ka khawlnite leng a tan ding uh ahi.

²⁵Amau kihihbuah ding in misi luang a naih ding uh ahi kei; himahleh nu hiam, pa hiam, tanu hiam, tapa hiam unaupa hiam sanggamnu pasal neilou hiam adin a kihihbuah thei ding uh.

²⁶Huan a kisiansak nung in amah ading in ni sagih simsak nawn ding ahi.

²⁷Huang sungnungzaw Mun Siangthou a nasem ding a a lut ni’n khelh ziak a kithoihna amah ading in a lan ding, chih TOUPA Pathian thupawt ahi.

²⁸Goutan bangmah a neikei ding ua; a goutan uh kei ka hi ding. Israel ah tan bangmah na pe ding uh ahi kei, a tan uh keimah ka hi.

²⁹Nekding latte, khelh ziak a thillatte, mawh ziak a thillatte a ne ding ua; Israel lak a thil siangthou peuhmah amau ading ahi.

³⁰Gah masate lak a a hoihpente, na thillat chiteng ua a hoihpen, na thillat tengteng ua siampute ading ahi: na inn ua vualzawlna a tamden theihna ding in tangbuang meklom hoihpen siampu kiang ah na pe ding uh ahi.

³¹Siampute’n sapul a neklouh ding uh ahi. Vasa hiam gamsa hiam khut thuak hiam, amah sih a si hiam a nekding uh ahi kei hi.