Read Paite Chin EZEKIEL 45 Bible Online

EZEKIEL 45 - Paite Chin bible

EZEKIEL 45

¹Huailou in leng goutan ding a gam na hawm hun chiang un gamseh siangthou, TOUPA kiang ah thilpiak na bawl ding uhi: A dunglam tong sing nih leh sang nga, a vai lam tong sing nih, a pum in gam siangthou ahi ding hi.

²Hiai ah Mun Siangthou adin a dung leh a vai tong za nga tuaktuak, kimkot ahi ding a, a kim in tong za nga a za mun ong a om ding ahi.

³Huan hiai tehsa a kipan in a dung tong sing nih leh sang nga leh a vai tong sing khat na tehkhe ding a, huai ah Mun Siangthou pen a om ding ahi.

⁴Gamseh siangthou bel, siampu, Mun Siangthou a nasemmi, a nasem ding a TOUPA naih semmite ding ahi ding a, a inn mun ding un leh Mun Siangthou ding in gam siangthou ahi ding hi.

⁵Mun dang a dung tong sing nih leh sang nga, a vai tong sing khat, Levi chi Inpi a nasemmite tuam ding in, a tenna khopi ding in a om ding ahi.

⁶Gamseh siangthou latsa zul ah khopi tan a vai tong za nga leh a dung tong sing nih leh sang nga na sep ding uhi, Israel Inkaw pumpi ading ahi ding.

⁷Huan, kumpitapa tan bel gam siangthou latsa leh khopi tan malam ah tumlam a tumlam nga in, suahlam a suahlam nga in a om ding ahi. A dung bel tumlam gamgi a kipan a suahlam gamgi pha in, gamseh dang tanmah ahi.

⁸Huai bel Israel gam a amah tantuam ahi ding ahi: ka vaihawmte’n ka mite a nuaisiah nawn kei ding ua, Israel Inkawte a nam tuamdan bangzel in gam a pe zaw ding uhi.

⁹TOUPA Pathian in hichi in a chi ahi: Aw, Israel vaihawmte aw, hunta hen, hiamgamna leh kigapna tawpsanta unla; diktattak a vaihawm leh diktak a hih chingta unla, ka mite delhkhiak nak pen tawpta un, chih TOUPA Pathian thupawt ahi.

¹⁰Bukna dik, ephah dik leh bath dik na zat ding uh ahi.

¹¹Ephah leh bath a kikim ding uh ahi, bath homer seh sawm a khen a seh khat ahi ding a, ephah leng homer seh sawm a khen a seh khat ahi sam ding: homer a kipan a tehkhiak ding ahi ding.

¹²Huan sekel bel gerah sawmnih ahi ding a: sekel nga bel sekel nga geih ahi ding a, sekel sawm bel sekel sawm geih ahi ding a, na min a uh sekel sawmnga geih ahi ding hi.

¹³Huan hiai thillat na lat ding uh ahi ding; buh homer khat zel ah ephah seh guk a khen a seh khat leh buh man homer khat zel ah ephah seh guk a khen a seh khat na pe ding uhi:

¹⁴Huan sathau latdan ding kor khat zel ah bath seh sawm a khen a seh khat; kor bel bath sawm ahi.

¹⁵Israel gantatna mun hoih a kipan belamhon lak a za nih zel ah a nou khat, nekding lat ding in, haltum kithoihna ding in lemna thillat ding in amaute hihsiangna bawlna ding in a lat ding uh ahi, chih TOUPA Pathian thupawt ahi.

¹⁶Gam a mi tengteng in Israel vaihawmpa kiang ah hiai thillat a pe ding uh.

¹⁷Ankuang luina ah, kha thak ah, khawlni ah, Israel Ankuanglui ni sehsa tengteng ah haltum kithoihna, nekding lat, dawn ding latte lan in a ngaihtuah ding a; khelh ziak a kithoihna, nekding lat, haltum kithoihna, lemna thillat Israel Inkawte kisiansakna ding in aman a tumsak ding ahi.

¹⁸TOUPA Pathian in hichi in a chi hi: Kha khatna, huai kha ni khat ni’n bawngtal tuai gensiat beina zang ding a, Mun Siangthou na siangsak ding ahi.

¹⁹Huan siampu in khelh ziak a kithoihna sisan a la ding a, Inpi kongpi biang leh maitam dohdan ning lite leh huang sungnung zaw pen kongpi bangka ah a tat ding hi.

²⁰Huai kha ni sagih ni’n hihkhak hiam theihlouh ziak hiam a thil hihkhial mite ading in leng huchi mah bang in na hih ding a, huchibang in Inpi hihsianna na bawl ding hi.

²¹Kha khatna, huai kha ni sawmlehli ni’n Paikan Ankuang na tang ding ua; huan, ni sagih sung tanghou silngou sohlouh na ne ding uh:

²²Huai nin vaihawmpa in amah leh a gam a mi tengteng adia khelh ziak a kithoihna dia bawngtal tuai a tum ding ahi.

²³Ankuanglui hun ni sagih sung teng in bawngtal tuai gensiat bei sagih leh belamtal sagih zel TOUPA adin haltum kithoihna ding in a tum ding, khelh ziak a kithoihna ding in niteng in keltal khat toh.

²⁴Huan tanghou lat ding in bawngtal khat zel ah ephah khat, belamtal khat zel ah ephah khat leh ephah khat zel ah sathau hin khat a tum ding hi.

²⁵Kha sagihna, huai kha ni sawm leh ni nga ni a Ankuangluina ah ni sagih sung huchibang mah in a hih ding a, khelh ziak a kithoihnate, haltum kithoihnate, tanghou latte leh sathau latte a tum ding ahi, a chi hi.