Read Paite Chin EZEKIEL 46 Bible Online

EZEKIEL 46 - Paite Chin bible

EZEKIEL 46

¹Huchi in TOUPA Pathian in hichi in a chi ahi: Huang sungnung zaw pen kongpi suahlam nga pen nasep ni, ni guk sung a kikhak ding a, khawlni leh kha thak ni’n a kihong ding ahi.

²Huan vaihawmpa bel kongpi sumtong ah a lut ding a, kongpi bangka chin ah ading ding a, siampute’n a haltum kithoih leh lemna thillatte a bawlsak ding ua, lutna kongpi dantan ah Pathian a be ding; huchi in a pawtkhe ding a, kong bel nitaklam tan a khaklouh ahi ding ahi.

³Huan vantang in bel khawlni leh kha thakte ah kongpi lutna chinte ah TOUPA ma ah Pathian a be ding uhi.

⁴Khawlni’n vaihawmpa’n TOUPA kiang a haltum kithoihna a lat ding bel belamnou gensiat bei guk leh belamtal gensiat bei khat ahi ding;

⁵Belamtal khat zel ah tanghou lat ephah khat, belamnou pen ah bel a piak theih bangbang, leh ephah khat ah sathau hin khat zel ahi ding hi.

⁶Kha thak ni’n bawngtal tuai gensiat bei khat, belamnou guk leh belamtal khat ahi ding a, gensiat bei ahihvek ding uh ahi:

⁷Huan tanghou lat a bawl ding a, bawngtaltuai ah ephah khat, belamtal ah ephah khat, belamnou pen ah a theih bangbang, leh ephah khat zel ah sathau hin khat ahi ding hi.

⁸Vaihawmpa a lut in kongpi sumtong ah a lut ding a, huai mah ah a pawtkhe nawn ding hi.

⁹Vantangte bel Ankuanglui ni sehsa a TOUPA ma a a hongpai uleh Pathian be ding a mallam kongpi a honglut simlam kongpi ah a pawtkhe ding uh; simlam kongpi a honglut mallam kongpi ah a pawt khe leuleu ding uh; a lutna kongpi uah a kik ding uh ahi kei a, a malam ah a paizaw ding uh ahi.

¹⁰Huan a lut un vaihawmpa bel a lak uah a lut ding a, a pawt un a pawtkhe nawn ding hi.

¹¹Nopbawlna leh sehsa Ankuanglui nite, tanghou lat bawngtal tuai khat ah ephah khat, belamtal khat ah ephah khat, belamnou pen ah a piak theih bangbang, ephah khat ah sathau hin khat zel ahi ding hi.

¹²Huan vaihawmpa’n utthu a thillat a lat dek leh haltum kithoihna hiam lemna thillat hiam TOUPA kiang a utthu a a thillat bang a a lat dek leh suahlam nga kong a honsak ding a, khawlni a hih bangmah in, haltum kithoihnate leh lemna thillatte a bawl ding: huchi in a pawtkhe ding a, a pawtkhiak nung in kong a khak ding uhi.

¹³Niteng a TOUPA kiang a haltum kithoihna ding in belamnou kum khat a upa, gensiat bei na zang ding a, zingsang in na zat ding ahi.

¹⁴Zingsang teng in tanghou lat na bawl ding a, ephah seh guk a khen seh khat leh sathau hin khat seh thum a khen seh khat tangbuang nel mahmah nawmsakna din: huai bel tangtawn a TOUPA kiang a tanghou latdan ding ahi.

¹⁵Hichibang in haltum thillat gige ding in belamnou, tanghou latte, sathaute zingsang teng in na bawl ding ahi, chi in.

¹⁶TOUPA Pathian in hichi in a chi ahi: vaihawmpa in a tapate, kua kiang ah leng, goutan bangpeuh a piak leh a tapate a ahi ding a, a gou uh luah a himai hi.

¹⁷Himahleh a goutan a pen a nasemmi kuahiam kiang a a piak leh salpawtna kum tan in a nei ding a, huai ah vaihawmpa kiang ah a pekik nawn ding hi. Amah gou ngeingei bel a tapate ading ahi ding.

¹⁸Huailou in vaihawmpa in mite goutan a suhsak ding ahi kei a, a inn leh lou ua kipan a delhkhe ding ahi sam kei; amah a pen mah a tapate kiang ah goutan in a pedia; Amau inn leh lou a kipan mite a vakzak louhna ding un, a chi hi.

¹⁹Huan kongpi pang a siampute adia dantan siangthou mallam nga ah a hon pilut a; ngai dih, a phaitam tumlam pang ah mun a na om hi.

²⁰Aman ka kiang ah, “Hiai siampute’n mawh ziak a thillat leh khelh ziak a thillat a huanna mun uh, tanghou lat omna mun ahi; huangsung pawnung zaw a a tawikhiak ua mite hihsiangna dia a bawllouhna ding un” a chi hi.

²¹Huang pawnung zaw ah a hon pikhia a, huangsung ningzul ah a hon paisak a; ngai dih, a huangsung ning chiat ah huang a om nawn hi.

²²Huangsung ning li ah huang, bang nei, a dung tong sawmli, a vai tong sawmthum a na om a; huai a ning a te a li un a kikim vek uhi.

²³Huai mun li sunglam ah a kimvel in suang vualin a lem ua, huai vual nuai ah a kim in huanna ding thuk a om hi;

²⁴Huchi in ka kiang ah, “Hiaite huanna in, Inpi nasemmite’n mite kithoihna sa a huanna dingte uh ahi” a chi hi.