Read Paite Chin EZEKIEL 47 Bible Online

EZEKIEL 47 - Paite Chin bible

EZEKIEL 47

¹Huchi in Inpi kongkhak ah a hon pikik a; ngai dih, Inpi kongpi chin nuai a kipan, suahlam nga in tui a hong luangkhia a; Inpi suahlam nga ahi a, huan tui maitam simlam Inpi pang taklam nuai a kipan in a hong luangkhia hi.

²Huan mallam nga kongpi ah a hon pikhia a, inkuan ah suahlam nga kongpi pawnung zaw pha in a honpi a; ngai dih, taklam pang ah tui a hong luangkhia hi.

³Huan huai mi’n tehna khau tawi in suahlam nga a pai in tong sang khat a teh a; tui a honngap galkah sak a, siakmit tan ahi.

⁴Huchi in tong sang khat a teh nawn a; tui a hon ngap galkah sak nawn a, khuk tan ahi. Huan, tong sang khat a teh nawn a; hon ngap galkah sak nawn a, tui kawng tan ahi.

⁵Huan tong sang khat a teh nawn a; ngah galkah vuallouh luipi a hong hita a; tui a hong sangzel a, a ngah a ngah galkah vuallouh, a leuh a leuh tham luipi a hong hita hi.

⁶Ka kiang ah, “Mihing tapa, hiai na mu hia?” a chi hi. Huan luigei a kiknawn ding in a honpi kikta hi.

⁷Huchi in ka kik a, ngai dih, luigei tawn in, luigei langtuak in sing tampi a na om hi.

⁸Aman ka kiang ah, “Hiai tui suahlam gam lam a luang Arabah gam a luanglut ding ahi; tuipi ah a luanglut ding a, tuipi tui al tui siangthou a suaksak ding.

⁹Huan hichi a honghi ding a; luite a luanna peuh uah ganhing chiteng in a damloh ding ua, ngasate a om huthut ding uh: tuipi tui a siangthouna ding leh a luanna peuh a ganhingte’n a hinlohna ding un hiai lui hongluang ahi.

¹⁰Huan hichi a honghi ding a; a gei ah ngamanmite a ding ding ua; Engedi a kipan Eneglaim pha in lenpaihna mun ahi ding; a ngasa pen a chi bangzel un, tuipi lian ngasa bang mai in a tam mahmah ding uh.

¹¹Buannawi leh chiklakte bel a siangthou teikei ding ua, chi khuk ding a nutsiat ahi ding hi.

¹²A luigei ah a gei langnih in theikung chichih a pou ding a, huaite a nah a vuai ngeikei in a gahlou ngei sam kei ding, Mun Siangthou a kipan a lui hong luangkhia vak a hih ziak in kha chih in a gah ding: a gah nekding ahi ding a, a nah bel hihdamna ding ahi ding” a chi hi.

¹³TOUPA Pathian in hichi in a chi ahi: Hiai Israel nam sawmlehnih lak a gam kihawmdan ding ahi hi: Joseph in tan nih a tang ding.

¹⁴Kibang chiat in na tang ding uh ahi; na pipute uh kiang a piak ding a ka kichiamsa ahi: hiai gam na gam tan un a puk ding ahi.

¹⁵Hiai a gam pumpi gi ding ahi: Mallam ah Tuipi Lian a kipan in Hethlon paisuak in Hamath lutna guam ah Zedad a tung a;

¹⁶Berothah, Damaska leh Hamath kigitna lai a om Sibraim, Hauran gamgi zul a om Hazorhattikon pha in.

¹⁷Huchi in gamgi bel Tuipi Lian a kipan in Damaska gamgi zul a Hazarenan pha in ahi ding a: mallam ah Hamath gamgi ahi ding hi. Hiai mallam gamgi ahi.

¹⁸Huan suahlam ah Hauran leh Damaska kikal ah Gilead leh Israel gam kikal a Jordan lui dung a zui ding; mallam gamgi a kipan in suahlam tuipi ah Tamar a pha ding. Hiai suahlam gamgi ahi ding hi.

¹⁹Simlam ah Tamar a kipan in Meibothkadesh tuite pha in Aigupta lui zui in Tuipi Lian a tung ding. Hiai simlam gamgi ding ahi.

²⁰Tumlam ah Tuipi Lian in a gi ding a, simlam gamgi a kipan in Hamath lutna guam zawn pha in. Hiai tumlam gamgi ahi ding hi.

²¹Huchi in hiai gam Israel nam dungzui in na lak uah na hawm ding uh.

²²Huan hichi ahi ding a, na gam tan ding uleh na lak ua namdang teng, zi leh ta nei sate gam tan ding bel na hop ding uh ahi. Amau lah Israel ta dia piang mawng ahi ding uh ahi; Israel namte lak ah noute bang in tan a neih ding uh ahi.

²³Huan hichi a honghi ding a; kua nam lak ah leng namdang na nateng leh, huailai a a gam tan ding na sehsak ding uh ahi, chih TOUPA Pathian thupawt ahi.