Read Paite Chin EZEKIEL 48 Bible Online

EZEKIEL 48 - Paite Chin bible

EZEKIEL 48

¹Hiaite a nam minte uh ahi: Mallam gamgi Tuipi Lian a kipan a Hethlon paisuak in Hamath lutna guam ah Damaska gamgi a Hamath kiang mallam pang Hazarenan pha in, suahlam leh tumlam sang ah tan khat Dante tan ahi.

²Dante tan toh a kigi in suahlam leh tumlam sang ah tan khat Asherte tan ahi.

³Asherte tan toh a kigi in suahlam leh tumlam sang ah tan khat Naphtalite tan ahi.

⁴Naphtalite tan toh a kigi in suahlam leh tumlam sang ah tan khat Manassehte tan ahi.

⁵Manassehte tan toh a kigi in suahlam leh tumlam sang ah tan khat Ephraimte tan ahi.

⁶Ephraimte tan toh a kigi in suahlam leh tumlam sang ah tan khat Reubente tan ahi a.

⁷Reubente tan toh a kigi in suahlam leh tumlam sang ah tan khat Judahte tan ahi.

⁸Judahte tan toh ki gamgi in suahlam leh tumlam ah, thilpiak na lat ding uh a vai tong sing nih leh sang nga ahi ding a; a dung suahlam leh tumlam sang ah tan dang bangmah in ahi a, a lai a Mun Siangthou om in.

⁹Thilpiak TOUPA kiang a na lat ding uh a dung tong sing nih leh sang nga, a vai tong sing nih ahi ding ahi.

¹⁰Huan hiai ah siampute adin gam siangthou thilpiak ding ahi ding a; mallam sang ah a dung tong sing nih leh sang nga leh tumlam sang ah a vai tong sing khat leh suahlam sang ah a vai tong sing khat, simlam sang ah a dung tong sing nih leh sang nga ahi ding ahi: A laizang ah TOUPA Mun Siangthou a om ding hi.

¹¹Siampu siansaksa, Zadok tapate ka thu kemmite ding ahi ding. Huaite Israel tate a vakmang lai ua Levi chite a vakmang sam bang ua vakmang loute ahi uhi.

¹²Huan gam thilpiak pumpi a kipan amau a piaktuam, mun siangthoupen ahi ding a, Levi chi tan toh a kigi in.

¹³Siampu tan zulzul ah Levi chite’n tan a nei ding ua, a dung tong sing nih leh sang nga, a vai tong sing khat ahi ding hi.

¹⁴Huan a zuak ding uh ahi kei a, a khen ding uh leng ahi sam kei: a gam hoihna tata leng midang kiang a piak ding ahi kei hi: TOUPA adia siangthou ahi ngal a.

¹⁵Huan a vai tong sing nih leh sang nga ban ah tong sang nga vantang tan, khopi dinna ding, tenna inn dingte leh khopuate a ding ahi ding: khopi bel a laizang ah a om ding hi.

¹⁶Huchi in a teh vialdan hichibang in ahi ding: A mallampang tong sang li leh za nga, a simlam pang tong sang li leh za nga; a suahlam pang tong sang li leh za nga, a tumlam pang tong sang li leh za nga ahi:

¹⁷A khopi in khopua a nei ding a; mallam pang in tong za nih leh sawmnga; simlam pang tong za nih leh sawmnga, suahlam pang tong za nih leh sawmnga, tumlam pang tong za nih leh sawmnga ahi.

¹⁸A dunglam val lai thilpiak siangthou zul a pen suahlam ah tong sing khat, tumlam ah tong sing khat ahi ding: thilpiak siangthousa zulzul ahi ding hi: huai a thilpawtte khopi a nasemmite nekding ahi ding.

¹⁹Huchi in, khopi a nasemmi Israel nam tengteng a mite’n a lei a let ding uhi.

²⁰Thilpiak pumpi a dung tong sing nih leh sang nga, a vai tong sing nih leh sang nga ahi ding; thilpiak siangthousa, dung leh vai kikim khopi tan toh na lat ding uh ahi.

²¹A val thilpiaksa siangthou leh khopi tan pang lang tuaktuak vaihawmpa tan ahi ding a, suahlam sang ah thilpiak tong sing nih leh sang nga ban, gamseh dangte zulzul vaihawmpa tan ahi ding: huchi in thilpiak siangthousa leh Inpi Mun Siangthou bel a laizang ah a om ding.

²²Huan Levi chi tan leh khopi tan vaihawmpa tante kikal ah a om ding a; vaihawmpa tan Judah tan leh Benjamin tan toh a kigi ding. Namdangte gam ding

²³Huan nam omlaite tungthu ah, suah leh tumlam sang ah tan khat Benjaminte tan ahi ding.

²⁴Benjaminte tan toh kigi in suah leh tumlam sang ah tan khat Simeonte tan ahi.

²⁵Simeonte tan toh kigi in suah leh tumlam sang Issakarte tan ahi a.

²⁶Issakarte tan toh kigi in suah leh tumlam sang tankhat Zebulunte tan ahi.

²⁷Zebulunte tan toh kigi in suah leh tumlam sang tan khat Gadte tan ahi.

²⁸Gadte tan simlam pang gamgi Tarmar a kipan in Meribah Kadesh tuite tan in Aigupta lui zui in Tuipi Lian a tung ding hi.

²⁹Hiai Israel namte goutan ding a gam kihawmdan ding leh a gam sehtuamte ahi uh chih TOUPA Pathian thupawt ahi.

³⁰Huan hiaite khopi a kipan pawtnate ahi uh; mallam pang tong sang li leh za nga ah kongpi thum:

³¹Khopi kongpite Israel nam min bangzel a sak ding ahi a; Mallam kongpi thumte, Reuben kongpi khat, Judah kongpi khat, Levi kongpi khat;

³²Suahlam pang tong sang li leh za nga ah kongpi thum: Joseph kongpi khat, Benjamin kongpi khat, Dan kongpi khat ahi ding hi.

³³Simlam pang tong sang li leh za nga ah kongpi thum: Simeon kongpi khat, Issakar kongpi khat, Zebulun kongpi khat ahi ding;

³⁴Tumlam pang tong sang li leh za nga ah kongpi thum: Gad kongpi khat, Asher kongpi khat, Naphtali kongpi khat, ahi ding hi.

³⁵A kimvel in tong sing khat leh sang giat ahi ding a; huai ni a kipan in khopi min bel, ‘TOUPA omna mun’ chih ahi ding hi.