Read Paite Chin EZEKIEL 5 Bible Online

EZEKIEL 5 - Paite Chin bible

EZEKIEL 5

¹Huan, nang mihing tapa, namsau hiam mahmah la inla, na lu leh na khamul metna ding in sammetmi tem in zang in; huan bukna la inla, sam khen in.

²Seh thum a khen a seh khat sim a a omsung nite a bei hun chiang in khopi lai a mei ah na hal ding ahi; seh thum a khen a seh khat nawn na la dia, a kim ah namsau in na satnen ding ahi; huan, seh thum a khen a seh khat nawn huih mutleng ding in na thehzak ding hi, ken namsau in ka delh zui ding hi.

³Huan tawmchik na la dia, na puanaktual mong ah na tun ding hi.

⁴Hiaite lak a tamlou na la ding a, mei ah na thehlut ding ahi, a kangding; huai a kipan in Israel inkawte tengteng ah mei a hongpawt ding, a chi hi.

⁵TOUPA Pathian in hichi in a chi ahi: Hiai Jerusalem khua ahi: namte laizang ah ka koih a, a kim ah gamte a om hi.

⁶Namte sang a nakpi a gitlouhna hihzaw in ka thugel tung ah a hel a, a kim a gamte sang a thupi in ka dan bawl tung ah a hel uhi. Ka thugelte a paikhia ua, ka dan bawlte bang in a omkei uhi.

⁷Huaiziak in TOUPA Pathian in hichi in a chi ahi: Na kim a namte sang a buai hatzaw in na om a, ka dan bawl bang in na omkei a, ka thugelte leng na zuikei ua, namte adia ka thusehte na hihlouh ziak un, TOUPA Pathian in hichi in a chi ahi:

⁸Ngai un, kei nasan in leng k’on nang ahi, namte mitmuh ngei in na lak uah vaihawmna ka tangtung sak ding hi.

⁹Na kihhuaina tengteng uh ziak in thil ka hih ngei nailouh, hih leng ka hih ngei nawnlouh ding na tung uah ka hih ding hi.

¹⁰Huchi in pate’n na sung ah a tate uh a ne ding ua, tate’n leng a pate uh a ne ding uh; nang a mi omsun tengteng ka dalhsak vek ding.

¹¹Huchi in hiai TOUPA Pathian thupawt ahi: Na nitna leh na kihhuainate a ka biakin na hihnit ziak in, a hin a ka hin laiteng, k’on kiam sak ding a, ka mit in a hon maih hetkei ding a, k’on hehpih sam kei ding hi.

¹²Seh thum a khen a seh khat hi in hiam, kial in hiam na lak uah a si ding uh; seh thum a khen a seh khat nawn ka hihdalh ding a, namsau in ka delhzui ding hi.

¹³Hichibang in ka hehna ka tangtung sak ding a, a tung uah ka hehna ka lungdam sak ding a, ka om a nuamta ding hi: kei TOUPA’N a tung ua ka hehna ka lungdam sak hun chiang in phatuamngaitak in ka genta chih a theikhe ding uhi.

¹⁴Huailou in, na kim a namte lak ah leh vialvak tengtengte mitmuh in khaw segawp leh simmohhuai in k’on bawl ding hi.

¹⁵Huchi in, thangpai leh heh mahmah a, nakpi a taihilh a, na tung a thugelte ka tunsak hun in na kim a namte mitmuh in nuihsat leh kouna leh hilhna leh mulkimhuai na hi ding: Kei TOUPA’N ka chita hi:

¹⁶A tung uah kialna thaltang hoihlou tak manna ding, noumau manna ding k’on kesak ding; na tung uah kialna ka uangsak ding a, na an uh, hinna bul ka hihse ding hi.

¹⁷Huchi in na tung uah kialna leh gamsa hangte k’on sawl ding a, ta leh nau tan in a hon laksak ding uhi; hipi leh sisansuahna na lak uah a leng ding; na tung uah namsau k’on lek ding, kei TOUPA’N ka chita hi, chi in.